明，我真係明喎，唔少女孩子耐唔耐就想約好朋友或者男朋友一齊食個Afternoon Tea。相機食先同自拍打卡當然要做，但最重要嘅係可以畀自己一個理由放慢腳步放鬆下吖嘛。所以開飯仔幫大家搵嚟城中七間有靚景又有供應下午茶套餐嘅餐廳，人均消費$300以下仲唔洗怕太肉赤呀。
中環玻璃屋睇海景 The French Window
呢間法國菜餐廳位於IFC 3樓，加上玻璃屋設計，令大家可以盡情飽覽維港景色，而且有自然光影相都靚啲！下午茶不定期更換主題，例如之前嘅The Pandora's Box同最近嘅Ruby Sunrise，都係用雙層黑色木箱裝住，上面係甜品下層係鹹點。另外會有一款另外用碟奉上嘅甜品，不過下午茶唔包英式鬆餅，想食嘅話嘅話就要額外加點啦。
Ruby Sunrise Afternoo Tea
供應日期：即日起至另行通知，逢星期六至日及公眾假期
供應時間：15:30 - 17:30
價錢：$468/兩位（另加一服務費）
季節特別主題加分 Uptop Bistro and Bar
打卡想呃Like，除咗靚景之外當然想個Tea Set都夠搶眼啦，尖沙咀呢間酒店餐廳就勝在下午茶每次都有唔同主題。好似最近主題就係春暖花香，金色花鳥架同粉紅色甜品一定要相機食先。同時供應嘅另一Set下午茶就甜品就用摩天輪裝住，好玩又好食。加上餐廳位於19樓，居高臨下感覺特別舒適。
「春暖花香」主題下午茶 / 「幸福摩天輪」下午茶
供應日期：即日起至另行通知
供應時間：15:00 - 17:00
價錢：星期一至五 $348/兩位，星期六、日及公眾假期 $388/兩位（另加一服務費）
尖沙咀日式下午茶 NOBU
下午茶又唔係剩係得西式三層架嘅，呢間新派日式Fine Dining餐廳消費唔平，但食週末下午茶價錢就平易近人得多。Tea Set三個月更換一次，包五款滋味茶點同六款甘味甜品，每一件都相當精緻。餐廳位於尖沙咀洲際酒店2樓，想見到海景嘅話建議早啲訂枱，講底想坐窗邊位啦。
NOBU Simply T-Set 怡茶敍
供應日期：即日起至另行通知，逢星期六至日
供應時間：14:30 - 17:30
價錢：$328/位，$528/兩位（另加一服務費）
【已暫停供應】
期間限定藍色下午茶 樂聚廊
圖：Yan~*
藍色南極主題好有透心涼Feel！原來係位於太古廣場嘅呢間酒店餐廳同護膚品牌合作，用南極冰河魚子精華系列做主題，加入蛋白、魚子同牛油果等食材，三層架上放滿精緻甜鹹點，另外再加英式鬆餅，分量都唔細㗎。而且惠顧下午茶每位仲可以收到護膚品牌精華禮品包一份，又食又拎抵返哂！
DR.BELTER The Glamourous Treat
供應日期：即日起至2018年4月29日
供應時間：15:00 - 17:30
價錢：298元/位，$498/兩位（另加一服務費）
泰識嘆悠閒Tea Mango Tree
圖：stephyss
靚景下午茶唔係酒店餐廳嘅專利嚟嘅，呢間泰國過江龍亦有供應抵食下午茶，想睇維港靚景必去有大玻璃窗嘅尖沙咀分店！下午茶套餐以泰國菜式為主，但全部變成迷你版。好似柚子蟹肉沙律、軟殼蟹米紙卷、豬肉水晶小丸子。另一加分點係可以選擇剩食鹹點、剩食甜品或者鹹甜點包哂，男朋友們無藉口話唔食甜品唔陪你去啦。
Afternoon Tea Set
供應日期：即日起至另行通知
供應時間：15:00 - 17:30
價錢：鹹點+甜點$298/兩位（另加一服務費）
中環文華招牌玫瑰醬 快船廊
圖：this_is_nicole，connieayu3000
英式下午茶嘅精髓唔單止在於三層架同Bite Size茶點，仲有香噴噴嘅英式鬆餅！唔少歷史悠久嘅酒店餐廳下午茶定價都偏高，幸好呢間平日都總叫勉強符合$300/位嘅Budget。鬆餅食落唔會有過乾或者過軟嘅通病，識食一定加埋招牌自家製嘅玫瑰花果醬一齊食，一個字：無得輸。當然其他茶點水準都唔錯，加上開揚優雅嘅環境，偶然豪一次都得嘅。
Afternoon Tea
供應日期：即日起至另行通知
供應時間：星期一至五14:30-18:00，星期六及公眾假期14:30-16:00及16:30-18:00，星期日15:30-18:00
價錢：星期一至五$298/位，星期六、日及公眾假期 $318/位（另加一服務費）
【已暫停供應】
尖東中西點心雙層架 天外天
呢間中菜館位於尖東一間酒店頂層，落地玻璃窗令大家可以將維港景觀盡收眼底。配埋中西合璧嘅下午茶套餐都真係幾有香港特色：下層係中式點心，好似甜酸脆雲吞同烏龍茶燻蛋；上層係糕餅總廚主理嘅中西甜品，包括人參朱古力球同綠茶荔枝泡芙。另一亮點係飲品可以選擇唔同口味嘅花茶，花茶仲可以免費任添，吹水吹耐啲都無有怕啦。
【更新】
餐廳暫時停止供應點心下午茶套餐，不過點心供應時間亦延長咗。單點點心雖然無雙層架，但選擇可以更有彈性啦。
點心下午茶套餐
供應日期：即日起至另行通知，逢星期六至日及公眾假期
供應時間：15:00-17:50
價錢：$238/位，$438/兩位（另加一服務費）
更多【二人前指南】： |
文：Cathy
