「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？今次同大家兜下葵芳一帶先～唔想喺葵廣掃街區同人迫餐死嘅，呢幾間可以諗諗喎。
大窩雞湯米線 麻辣川米線
圖：mandymanlovefoodie、Tasty.Party
好多時自己一個人都會食米線，方便吖嘛，所有餸一碗搞掂，又平又快。呢間嘅米線主要分兩種湯底，雞湯或者麻辣，食得辣嘅當然就揀麻辣啦，呢度嘅辣係辣得幾過癮，但麻嘅感覺就略嫌唔夠；咩都想食又懶得揀餸嘅，大窩雞湯米線幾OK，滷豬大腸、蘿蔔、腐皮、雞絲……都幾多料，實夠飽。
港式漢堡 嘉寶小食
圖：呢間港式漢堡店好出名，雖然個位係格涉咗少少，但嚟開葵芳呢頭又自己一個人，行遠少少去搵好西食有乜所謂？當大大份漢堡喺港島九龍區賣到近成百蚊個嘅時候，呢度一個黑松露芝士牛堡都不過係40幾蚊咋，味道一樣有保證。另外，蝦牛堡亦係好吸引，疊到都幾高下，啲蝦肉都幾彈牙。除咗漢堡，仲有撈麵魚蛋之類嘅小食，但嚟得，都係為漢堡嚟㗎啦。
鹹菜胡椒豬肚泡飯 鄧媽媽過橋水餃
圖：呢間餐廳雖然都喺葵廣，但笨唔係掃街嗰區，而且位置算大，多位，啲人食得快走得快，仲好多都係同道中人——一個人嚟食呀，啱晒。呢度啲水餃，現場新鮮包製嘅，椰菜或菲菜餡，煎又得湯又得，幾足料。另外，推介食下佢哋嘅泡飯，特別係海鮮泡飯或者鹹菜胡椒豬肚泡飯，好香口，豬肚亦都係爽口嘅。
街坊越南粉 金來越南粉
圖：如果同朋友一齊嘅話，都幾肯定你冇乜機會食到呢間，因為佢身處喺個罨耷商場入面，地方較為淺窄，未必個個肯陪你嚟呀，但係就充滿住一種街坊街里嘅味道。火車頭越南湯粉又好，牛肉湯粉又好，個湯底做得唔錯，用牛骨熬㗎，幾清香，重點係冇味精！
快食熱狗 Oh! My Dog!
圖：另一間性價比都幾高嘅漢堡、熱狗店，美式肉醬熱狗呀、芝士煙肉熱狗呀等等份量都唔少，啲芝士仲舖滿晒成條腸，自己一個食都會有治癒嘅感覺。漢堡包亦相當足料，洋蔥圈、蕃茄、車打芝士……一層疊一層，視覺效果良好之餘口感亦豐富，塊牛肉仲好juicy添。
文：Kar