疫症已經橫行咗超過一年，對我哋嘅日常生活當然有好多影響，亦改變咗大家唔少嘅習慣。不過即使喺疫情下，我哋都可以從新常態中，尋找趣味！年度盛事「OpenRice優秀開飯熱店大賞」即將開始接受投票喇，今年以「日嚐作樂」為主題，希望大家從每日品嚐到嘅美食中創造樂趣，從探索餐廳中感受香港「味」力。3月24號就開始可以一人一票投選你心目中嘅本土出色熱店！而喺未開始投票前，大家都可以先參與「有獎分享活動」，有機會贏取獎品總值超過30萬！想知點玩？記得睇到最尾！

雖然香港人過去一年都無得去旅行，卻成為大家更願意出走香港郊區嘅契機。其實香港真係好靚㗎，見到朋友喺Instagram 打卡嘅大自然美景相，唔講仲以為係外國秘景！唔好以為得靚景無啖好食，原來香港郊區仲有好多隱世美食，你會估唔到地道親民嘅士多咁高質；文青Cafe 直頭好似飛咗轉日本咁。

沙頭角谷埔村　松記士多

 沿路海景恬靜，大樹則豎立於士多旁，整個旅程都好療癒。
(圖：港女港食、Wisteria)

走地雞、客家醋鴨好受歡迎。
(圖：細哨、IreneCHUI2238)

想輕鬆行吓山、食吓嘢嘅，去松記士多嘅路程就啱啱好，喺粉嶺港鐵站坐56K小巴至鹿頸總站，步行約50分鐘就到，沿路仲可欣賞海景同紅樹林適合行山初哥。士多細細，餐牌卻足有30幾款菜式揀㗎。老闆仲會每朝向沙頭角漁民入海鮮，甚至落海捉生蠔煎蠔餅，夠晒新鮮！走地雞、客家醋鴨、炆牛尾都好多人推介，飯後更稱大廚係「隱世廚神」𠻹！

 留意營業時間：上午11時至晚上6時 (星期六、日及公眾假期)
*暑假休息

大埔山寮路　Mr Cardigan

 餐廳係白色貨櫃好特別，隔籬仲有小農場。
(圖：Foologerhk、Nataliekwan17)

甜品同飲品均賣相精緻，隨手都可影靚相。
(圖：Geoffreytwy、littlefoodie_hk)

呢間Café 係以白色貨櫃改建而成，對出就係露天座位隔籬仲有小農田，白色貨櫃加埋大自然靚景好啱大家影相打卡。呢度主打輕食，鬆脆酥皮蘋果批、香蕉藍莓奶香多士同三文魚多士都好受歡迎。微風下飲杯紅石榴梳打、西柚紅茶、玫瑰花茶好舒暢。

留意營業時間：下午2時至晚上6時 (星期六及日)

西貢塔門 弓字邊海鮮

 塔門有無敵海景，不時見到漁民出海捕魚。
(圖：shuki cheung、gdtop)

 餐廳有近海之利，海鮮菜式先贏在鮮味。
(圖：desmond.ymlai、cecilia.cheung)

近年好多人都去塔門欣賞無敵大海景，大草地更係野餐勝地。但越來越多人嚟朝聖卻令草地貧瘠稀薄，影響當地牛牛生活。如果大家嚟塔門郊遊，記住避免生火或露營減少對草地傷害。旅客可去島民經營嘅弓字邊海鮮用餐，近海之利當然有新鮮魚獲、海膽、鮮魷等，招牌海膽炒飯非常出名，豉油皇中蝦、白灼鮮魷、炸墨魚丸同薑蔥炒蟹都好推薦。

粉嶺馬會道　添飲咖啡館

 雖然咖啡館鄰近市區，卻自成一格地寧靜舒服。
(圖：美食焚化爐)

放假喺度慢食個All Day Breakfast好放鬆。
(圖：美食焚化爐、Ching0712)

想有郊遊感覺但懶得搭車又搭船，呢間咖啡館就夠接近市區喇！位置鄰近粉嶺港鐵站，C出口步行約6分鐘就到。簡約落地玻璃建築風格，離遠已相當吸睛，原來前身係粉嶺裁判法院，活化後地下同露天位置成為Café，喺度嘆個All Day Breakfast，又或點個甜品—黃糖無花果蛋糕、柚子蛋卷配杯咖啡都好Chill。

愉景灣　HanMade Teahouse Cakes Flowers

 愉景灣椰林樹影充滿異國風，仲有靚教堂好啱情侶浪漫遊。
(圖：Ctyings、Vegan Expression)

飲杯熱茶、食啖日式甜點，成個氣氛好似去咗日本咁。
(圖：foodiechans、workingwithfood)

充滿異國風嘅愉景灣，背山面海又集合多國美食同玩樂設施，中環搭船去只係25分鐘，啱晒城市人快閃唞吓氣。呢間木系日式茶室就係忙裡偷閒好地方。高樓底掛滿溫暖黃光，加上簡約木系、綠色植物點綴，環境寫意好適合放空。推薦櫻花造型菓子Igable，花瓣造型亦方便同朋友Share，甜度恰好、酥皮鬆化。其他甜品仲有橙皮綠豆餅、英式鬆餅、Cupcake等。同場有Tea-tasting area 畀大家試茶後再Order，名副其實係慢活空間。

投票未正式開始前，您可以先分享一張與美食的快樂時刻😋到個人FB/IG (必須設定為公開)，加Hashtag #日嚐作樂 #OpenRice。完成整個投票活動後，即有機會贏取獎品總值超過30萬！

投票和獎品詳情將於3月24日正式公佈，密切期待：https://bit.ly/3bRsGaH
*活動須受條款及細則約束

文：Kate