雖然已經秋分，但韓國熱潮喺香港似乎仲未降溫，因為韓國知名炸雞品牌TwoTwo Chicken嚟咗大坑開第一間香港分店！炸雞跟足韓國配方，暫時有六款唔同口味，包括其中一款香港獨家！開飯仔率先幫各位韓國菜同炸雞Fans試食，發現「重口味」反而更有驚喜......？

TwoTwo嘅特點係特別薄嘅炸皮，同皮脆柔嫩嘅口感。原味炸雞先加入蒜料醃製，再裹上特製炸粉炸至香脆。咬落蒜香慢慢滲出，特別香口。雖然雞肉唔算非常Juicy，但的確做到外脆內嫩。

而喺韓國大受歡迎嘅甜辣炸雞就係加上特製甜辣醬，辣得嚟又有少少甜味，非常討好。而且抵讃嘅係就算有醬包住，炸皮亦唔會變得過淋，依然食到豐富口感。

開飯仔覺得當中最出色嘅，就係呢個蒜香炸雞！雖然賣相唔算特別吸引，但一上枱就有好大股香味，食落濃濃嘅蒜香味立刻攻佔成個口腔，惹味得嚟仲令你忘記炸雞嘅油膩感，一唔小心就會食完又食。溫馨提示一句，蒜香炸雞最好食先，因為蒜香汁比較容易令炸雞皮變淋，扣咗分就唔好啦。

另外推介香港分店獨有嘅麻辣炸雞，特別參考咗川菜做法，少少麻而唔會辣到完全唔敢食，有刺激感之餘更有新鮮感！大廚仲表示嚟緊會研發港式本土口味，例如避風塘等等，各位炸雞Fans可以期待！

當然係創新之餘，亦保持韓式風味。喺韓國三十幾年歷史同超過三百間分店嘅TwoTwo Chicken今次嚟香港開分店，由雞肉處理、特製炸粉到開發嘅壓力炸雞爐都跟足韓國配方，務求令各位唔洗飛韓國一轉都食到地道炸雞。

食完炸雞都仲係意猶未盡嘅話，仲有麵食、飯同小食。最特別嘅就要數到呢個Golbang-I香辣海螺冷麵，初入口會先食到少少酸味，然後韓國辣粉嘅辛辣感就會開始湧出嚟，覺得太辣嘅時候再食翻啖涼麵中和，非常過癮。辣味後勁都幾厲害下，大廚亦話初期會先跟足韓國配方，但為咗照顧香港人口味，日後可能會有減辣版本。

當然想解辣亦可以食下佢地嘅特製醃白蘿蔔，酸爽開胃，唔夠嘅話仲可以Encore𠻹。

有嘢食當然亦要有嘢飲，除咗韓國啤酒之外另外亦有香港獨有嘅特色Cocktail同Mocktail。不過暫時為止餐廳因為未有酒牌嘅關係，呢幾日嚟試炸雞嘅朋友可能要先試下其他Mocktail喇。

TwoTwo Chicken
2016年9月28-30日試業
2016年10月1日正式開幕