疫情下想搵間有異國風情又有空間感嘅餐廳？西營盤呢間新店就啱晒喇，以意大利小食文化Cicchetti為靈感，供應正宗意式小食，同新鮮自家製手工意大利麵食！而且樓高三層，地下樓底高又有Cocktail Bar，一樓就有Open Kitchen睇到廚師製作多款美食，二樓就勝在私隱度高可以開Party，感覺好Chill。
 

餐廳由行政總廚兼老闆Anthony主理，曾任職於米芝蓮二星餐廳Amber

Casa Cucina & Bar餐廳意念嚟自店主Anthony之前去威尼斯旅行，會去位於後巷、遊客稀少嘅地方小酒吧放鬆一下，當地嘅Cicchetti有啲似西班牙嘅Tapas，係意大利人放工後晚餐前小聚嘅小食。店主就將呢種文化帶嚟香港，希望令大家嚟到就好似置身威尼斯咁，有旅行嘅感覺！餐廳名Casa係意大利文，即係「家」咁解，因此裝修以粉藕色為主，加上採光度高，營造好似屋企咁放鬆舒服嘅氣氛。
 

意大利特色Cicchetti

帶子薄片（$108）

以北海道帶子為主角，切成薄片後配搭龍鬚菜，然後以菠蘿、柚子、豆蔻、胡椒等調味。帶子軟嫩鮮甜，加上以水果酸甜為主嘅醬汁，感覺清爽醒胃。
 

酥炸海鮮（$180）

意大利Cicchetti有唔少適合送酒嘅炸物，呢度嘅酥炸海鮮亦有齊炸蝦、魷魚、帶子，脆皮薄身而酥脆，注重返海鮮本身嘅原汁原味。搭配自家製蕃茄乾大蒜蛋黃醬，集酸、甜、鹹香於一身，配炸海鮮相當惹味。
 

小食拼盤（$188）

小食拼盤就以意大利經典小食為主，方便開心Sharing之餘都好啱配酒。新鮮水牛芝士柔軟幼滑富牛奶香，配酸甜多汁嘅Datterino蕃茄味道清新。蕃茄麵包選用鬆脆嘅西班牙Crystal Bread，加上蕃茄、蕃茄汁及蒜油，酸味自然清爽。而風乾火腿卷裡面係新鮮嘅火箭菜，最後淋上油醋增添風味。
 

自家製手工意粉

餐廳另一主打係手工意粉，選用意大利00麵粉、粗粒小麥（Semolina）麵粉同新鮮蛋黃。只用蛋黃可以為意粉提供色澤同風味，亦令意粉煮出嚟更挺身。手工意粉製作過程非常講究廚師經驗，因為需要靠手感去決定揉麵同折疊嘅次數同方式，先可以製作出有彈力，但又唔會好似橡筋咁韌嘅手工意粉。
 

鴨胸肉醬闊麵（$178）

餐廳目前供應三款手工意粉，其中一款闊麵（Pappardelle）傳統上會配肉醬，而店主Anthony就選擇用鴨胸肉醬！鴨胸先烤香，手撕成肉絲後加入意大利蕃茄醬同烤鴨汁炆5-6個鐘成為肉醬。煮意粉嘅時候再加入雞肝凍、忌廉、芝士等一齊煮，最後再撒上巴馬臣芝士碎。闊麵相當掛汁，肉醬帶香濃鴨肉同雞肝香氣！
 

鮮魷（$188）

呢道亦係功夫菜，要先將米意粉（Puntalette）以蟹肉同日本海膽煮至半熟，然後釀入鮮魷當中，再慢煮45分鐘。黑色嘅醬汁就以鮮魷墨汁、港式魷魚乾同牛油煮成。特別加入港式魷魚乾令醬汁除咗鮮味更添一分鹹香。整體集鮮魷、海膽等鮮味於一身，味道同口感層次豐富。
 

其他推介美食

蘑菇燴飯（$150）

素食朋友就可以選擇呢份蘑菇燴飯，綠色嘅燴飯係意大利飯加入菠菜蓉、香草、芝士煮成。而中間就係以焦化牛油煮成嘅蘑菇泡沫，再配搭靈芝菇。蘑菇泡沫口感輕盈，入口即化而菇味非常濃郁，而靈芝菇增加口感層次，整體味道香濃。
 

意式煮鱈魚（$248）

黑鱈魚先煎香，再加入醬汁煮熟，鱈魚皮脆肉嫩，醬汁嘅酸味亦帶起魚肉嘅鮮味。醬汁以新鮮Datterino蕃茄、鮮蜆同黑橄欖等煮成，酸香清爽，同時亦有黑鱈魚嘅鮮味，所以用麵包點醬汁食就最啱。
 

 

提拉米蘇（$58）

經典Tiramisu採用意大利家庭式做法，以Mascarpone芝士、Espresso、雞蛋同手指餅製作，當中加入Kahlua咖啡酒同杏仁甜酒，所以食落除咗芝士同咖啡香，亦帶淡淡酒香。口感軟滑綿密。
 

意式豆腐奶凍（$58）

另一經典意式甜點Panna Cotta就加入港式元素，以豆腐花為靈感，因此選用新鮮豆腐製作。口感綿密柔滑嘅同時又有少少豆香。醬汁就用黃糖加淡豉油製作而成，食落出乎意料豉油嘅鹹味唔算出，有啲似海鹽焦糖嘅效果，襯托出甜味之餘仲有發酵嘅香氣！
 

（左）Green Mile（$88），（右）Bloody Mary Martini（$88）

餐廳亦提供地中海特色嘅雞尾酒，Green Mile以Gin酒為基底，加入菠蘿汁、羅勒及洋甘菊糖漿調配而成。而Bloody Mary Martini就混合龍舌蘭酒、香橙利口酒、番茄同紅辣椒汁，兩款味道都偏清爽。
 

Passion Fruit Bellini（$58）

亦有無酒精雞尾酒，例如呢杯Passion Fruit Bellini以熱情果、蜜桃、新鮮檸檬汁同梳打水調製，味道酸甜，加上氣泡感好消暑醒神。
 

二樓為多用途空間，可舉辦Party或其他活動

一樓有開放式廚房

一樓另一邊係主要用餐區

地下設Cocktail Bar，餐廳樓底高富空間感，長樓梯亦係打卡熱點

Casa Cucina & Bar
地址：西環干諾道西158A號均益大廈3期地下8-9號舖

文：Cathy
相、片：Tom Li