「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下銅鑼灣。
辣辣車仔麵 新記車仔麵
銅鑼灣有幾間車仔麵其實都幾啱一個人食，快靚正呀嘛，今次介紹呢間主要係因為呢度嘅辣汁，鍾意食辣嘅人就啱晒，佢嘅辣汁係用咗成12種材料去整㗎，食起上嚟層次好豐富。而最好配辣汁嚟食嘅應該就係蘿蔔，基本上食車仔麵都冇可能唔叫，索晒啲汁，除咗本身嘅甜仲會好鬼入味。另外，滷水都做得唔錯，食內臟嘅可以叫滷水豬腸豬紅，係重口咗少少，但一個人食，有乜所謂吖。
懷舊紅豆冰 金記冰室
一支公去冰室應該都會搵到幾多同道中人，而呢間冰室，就特別啱鍾意懷舊嘅人一個人嚟想當年。事關呢度成個裝修格局都充滿懷舊感，仲整到成架電車喺度咁，慢慢影相自拍打卡啦。食嗰方面選擇都多，咖喱雞扒撈公仔麵唔錯，咖喱係香濃但唔太辣嗰隻，再加多杯細個最鍾意飲嘅紅豆冰或者菠蘿冰都幾好。
麻辣牛肉 十二味貴陽牛肉粉
嚟呢度就一定係食牛啦，特別好食得辣，好鍾意食辣，但平時要遷就唔食得辣嘅朋友嗰啲人，要自己一個食嗰陣，就可以喺度盡情咁食！麻辣牛肉幾腍幾入味，而且仲會愈食愈辣，正呀喂！不過其實呢度嘅湯底都好值得留意，係每日用用100斤豬筒骨、牛筒骨，熬300碗湯出嚟㗎，所以就算幾好辣都好，唔好一味整到碗嘢得個辣字而蓋過咗碗湯原有嘅味呀。
永遠抵食肉丸 宜家家居美食站
一個人通常唔想食太貴，但要喺老銅呢啲地區搵平嘢食係有啲難度。宜家係一個幾好嘅選擇，佢符合晒一個人食嘢嘅條件：平同埋快。同埋喺度好多人都係一人一個位咁自己食自己，你一個人去都唔兀突呀。除咗由細食到大嘅肉丸同熱狗，而家仲多咗好多意粉呀窩夫呀雪糕呀咁，無論你係去食午餐下午茶定晚餐都一定食得飽！
咖喱羊腩 清真惠記
呢間餐廳喺鵝頸橋樓上嘅街市，又係啲平時唔會有朋友肯陪你去食嘅地方，但反而一個人喺度食又幾自在。嚟度唔使諗一定係嗌咖喱羊腩飯，一大碗多肉多汁，羊肉腍，咖喱香，送飯食好鬼開胃，係略嫌多油咗少少囉。
文：Kar
【一個人開飯】系列：
一個人喺尖沙咀食乜好？
一個人喺荃灣食乜好？
其他地區精選文章：
顏值爆燈 「色」飲「色」食在荃灣
石硤尾Lunch開餐街坊推介
大埔墟街市一日五餐之選
隨時接收最新資訊
讚好OpenRice專頁！