L.D.K. by Ufufu Café (新都會廣場)

營業中

休息中

之前經過都見唔少人排隊，好彩今日都唔多人排，都係等兩三張枱。但明明響門口見到有空既枱，但都唔帶位，呢方面感覺麻麻。好鍾意食烏冬既關係，叫左個牛肉壽喜燒烏冬。湯底非常甜，一開始感覺唔錯。有蛋黃溝埋湯底做湯汁，牛肉夠薄，份量夠，仲有d金菇，大蔥咁。烏冬既麵底都好食。不過食到一半就黎料，可能濃味既關係，真係非常非常口渴！食完碗麵，直接飲哂成杯水都唔夠！呢個質素既烏冬我食過平價d既都有，但我從來未試過食完咁口渴。吉豚佐咖喱蛋包飯一食落個醬汁就偏酸，我自己就唔多鍾意，但朋友覺得okay。炸豬扒口感非常脆，但佢為左個脆既效果，其實炸粉非常厚，朋友一開頭都幾鍾意，但食食下都覺得粉太多，要切左豬扒皮黎食，切左就會發現其實舊豬扒並唔係咁大塊。蛋都可以既，幾滑。整體黎講，我覺得價錢偏貴，唔值呢個價。本身想食佢d甜品，但叫個朱古力黑炭蛋糕，七點幾叫，佢已經話賣晒。我相信佢呢度既甜品比較出色既，佢強調材料來自日本又盛咁，不過今次就試唔到。雖然佢呢度裝潢比較靚，但d枱又窄，二人座位大部分同隔離又好近，坐得都唔舒適。食完之後都唔明點解會有咁多人排隊食，基於好口渴既感覺，我唔會再食呢間。