中環茶記 (已結業)

去到中環見到翠華餐廳結業，個心都有啲唔係太開心，行吓行吓原來呢度都有唔少嘅餐廳，不過由於對茶記情有獨鍾，所以決定去中環茶記食下。啱啱正好係下午茶時間，就入去試吓佢個茶餐，以中環來講呢個價格真係非常便宜，$30都唔使就有西多士跟嘢飲或者佢呢度嘅特色豬扒包，經過嘅店員都同我哋講今日嘅豬扒包好得，所以我決定叫一份黎試。不過係食豬扒包之前，好想醫飽個肚！見到原來佢哋嘅蔥花叉燒炒蛋飯都係值得推介，所以又嗌左一份。冇幾耐個飯就送到，叉燒做得非常好，食完有銷魂嘅感覺。滑蛋亦都好滑嫩，煮得好有技巧，但係美中不足嘅係碗裏面嘅飯好像冇經過特別嘅處理，熱度爭咁少少，損失左一啲啲分數。另外廈門炒米粉好足料，裏面有叉燒絲、火腿絲同炒蛋，仲有番茄酸酸地嘅味道，師傅話係即叫即炒，所以都好熱辣辣夠新鮮。跟餐餸杯嘢飲，點紅豆冰屬於特飲，就要另外加$8，我覺得加$8好抵啊，因為呢度嘅紅豆冰真係有好多紅豆，冰只係佔一個杯少少空間。西多士又係大大件，加埋獨立包裝嘅牛油同埋糖漿，特別邪惡，令人垂涎欲滴！另外的豬扒包好大份，包硬身少少，豬扒煎得幾靚仔，裏面仲夾雜生菜同埋蕃茄，是下午茶必選推介。