發哥粥底海鮮火鍋 (已結業)

好多時喺九龍灣都唔知食咩好，食嚟食去都係啲大型商場嘅餐廳，又或者連鎖店。今次經過九龍灣附近嘅工廈， 發現一間都幾旺場嘅海鮮粥底火鍋， 於是決定去試下。見有唔少人都叫呢度嘅海鮮粥底火鍋，可以選擇龍蝦餐或者肉蟹餐， 兩個都好似好吸引，不過我都決定係食龍蝦，因為唔使點剝殼吖嘛。先上一盅燉湯，非常足料，入面有雞肉、瘦肉、花膠等等，飲落好清甜。再嚟一個蒜蓉焗青口，每隻都好大隻，加埋蒜蓉好香好惹味，唔錯。 當然最重要嘅都係火鍋啦，呢度嘅海鮮真係好正好新鮮，龍蝦大大隻，加埋其他嘅海鮮，例如蟶子、大蜆、多寶魚、海蝦等等，淨係食海鮮拼盤都夠飽。尤其係龍蝦好鮮甜彈牙，而且仲有膏， 非常好食。至於其他配料都好豐富，我哋就選擇咗墨魚滑、滑牛肉、 韭菜餃、釀冬菇同幾款蔬菜，每樣嘅份量都好足夠。而且睇得出好有心機，尤其是呢個蝦滑，非常特別。最後食飽飽仲可以叫侍應幫手加啲南瓜、粟米、菜脯、芫茜等等嘅配料，加埋粥底一齊去煮，粥底吸收曬海鮮嘅鮮甜味，飲落真係好滿足。每人埋單都係三百蚊唔使，但就食到咁豐富咁高質嘅海鮮粥底火鍋， 值得一試。