【驚喜串燒85折】必食燒游水海鮮 X 海膽  限定雲丹系列
如果你鍾意穿梭橫街小巷探索小店搵食,一定知道天后有好多小店,有時遇到隱世小店嗰種驚喜真係會特別深刻,呢間「黑木亭居酒屋」就係進駐天后嘅小店之一喇。踏入店內,大大幅和風畫作即映入眼簾,呢種日本地道居酒屋氣氛好啱慢食飲酒,好符合店家主打串燒、烤物路線。

店主坦言選址天后,全因發覺附近街坊、食客都鍾意食串燒,可惜串燒店常欠主食,多數只能作宵夜而非晚餐。於是把心一橫開間食得飽、飲得爽嘅食店啦~所以呢度除咗串燒外,仲主打每日入貨新鮮海鮮、日本和牛,食串燒都可以當晚餐食得飽,仲有清酒、紅白酒、生啤等多於20款酒類揀。

其他推介:
而家經OpenRice 訂座或優惠券仲有高至85折優惠𠻹,而優惠仲有半價享燒龍蝦 X 海膽(原價$868)及指定清酒、紅白酒買一送一,正呀!
優惠請按這裡: https://bit.ly/3pB9F1a
燒物之中,燒海鮮難度最高,呢度嘅師傅就有多年串燒經驗,拿捏火喉啱啱好,唔會燒乾海鮮表面之餘,亦Keep 到內嫩多汁先係高質。除咗講求燒烤技巧,海鮮鮮度都好重要,所以店家除咗由日本入貨,亦會每日親到街市買游水海鮮。食客可以預先Order各類鮮魚、扇貝、鮑魚等,特別係預訂龍蝦好受歡迎!

主打燒海鮮: 必食「海魚一夜干」+「雲丹系列」
今次第一道上枱嘅就係主打烤魚—「海魚一夜干」,係日本居酒屋一道高檔菜式。日本人會將原條開邊花魚浸海鹽後風乾,令魚肉紮實不油膩。所用嘅花魚無幼骨,料理方法亦令魚肉帶獨特鹹香,好啱大大啖爽快地食嚟佐酒。

黑木亭每個月都會推出限量系列,11月就有豐腴鮮甜嘅「雲丹系列」,厚身肥美嘅韓國海膽Crossover 各種海鮮一齊燒香,透過海膽鮮甜味為其他海鮮引味。特別推薦「海膽 x 鮑魚」呢個組合,海膽獨特嘅奶油軟滑口感+鮑魚嘅煙韌,真係可以用「難忘」二字形容。

「雲丹系列」嘅「海膽 x 扇貝」又係極度甘甜細膩,海膽隨扇貝慢慢融化口中,再飲啖清酒真係一大享受。

呢度嘅串燒選擇都好多,雞、和牛、黑豚、海鮮等都有,難得嚟到都Order 晒咁多類別,當中最深刻嘅有「厚燒牛舌」,目測足有1cm 厚,師傅只用少少鹽、黑椒引味,有嚼勁得嚟亦夠軟,咬落滲出淡淡牛味。
(左起) 明太子雞肉、京蔥雞肉、白鱔、雞翼、黑毛和牛串、厚燒牛舌、原條黑豚露筍卷
「明太子雞肉」將略帶鮮鹹嘅明太子加埋沙律醬,味道香濃,女仔一定鍾意。
 
A4和牛:「日本產和牛他他」+「板燒日本產和牛」
除咗一系列燒物,正如店家所講要有埋主食畀大家食得飽飽~所以今次一口氣點咗兩款同樣用A4和牛入饌嘅「日本產和牛他他」同「板燒日本產和牛」試試佢。雖然店家已細心提醒和牛他他係一成熟,但因為和牛非常薄切,所以唔會覺得好生入唔到口。配埋酸汁、洋蔥微辣帶酸,反而更突出和牛軟綿綿口感。

呢度嘅「板燒日本產和牛」燒至5成熟啱啱好,唔會因為過熟令和牛流失油脂香。個人比較鍾意呢款和牛有油香又有牛肉咬口,唔會失去愈咬愈有肉香嘅樂趣。

甜品日本直送 X驚喜可愛熊熊冰飲品
甜品就有「四莓生芝士蛋糕配沖繩海鹽雪糕」,由日本直接送到,芝士蛋糕質感偏向綿滑,唔係密度好高嗰種,配埋四莓微酸好解膩。如果咁啱朋友生日慶生,亦可以預先聯絡店家免費寫祝福字句。

食到最後,估唔到飲品都幾有驚喜,特別係呢杯「蜜桃烏龍熊茶」。係呀,係熊茶亦係紅茶,因為有粒超可愛熊熊冰喺杯中。熊熊冰同樣用蜜桃烏龍熊茶雪成,影相靚之餘,溶冰亦唔會令鳥龍茶變淡。

鍾意乳香味嘅話,可以一試用北海道奶調配而成嘅「北海道士多啤梨牛乳乳酸」,飲落仲會食到少少士多啤梨蓉,幾有咬口。

黑木亭居酒屋
地址: 天后清風街10號清風大廈地舖
電話: 26606373
* 資料由客戶提供