黎巴嫩喺阿拉伯國家中相當特別，最古老嘅文明古蹟遠自幾千年外，亦係一個西方式國家，首都更有東方巴黎之稱。因為近地中海沿海，飲食習慣更貼近地中海嘅健康文化，主要用穀物、蔬果、香草、橄欖油入饌，菜式比其他中東國豐富得多，因此有中東菜系之王。
講咗咁耐，其實香港食到黎巴嫩菜嘅地方真係少之又少，想一試真係唔知去邊好。最近中環就新開咗呢間Shahrazad Lebanese Dining Lounge & Bar，由黎巴嫩人開保證食到正宗味！而且菜式符合清真食品要求，唔會有豬肉㗎。
睇有咩正宗黎巴嫩菜式前，要先睇呢度嘅環境同特備節目，因為真係超吸引～一入門口就見到極夢幻藍色大梳化，加埋中東色彩嘅吊燈、特色牆全部都係影相位。如果鍾意Chill 啲，仲可以坐露天位，一整排梳化望住中環大館靚景。
藍色大梳化極夢幻，係影相靚位。
露天位望住大館夠開揚，同朋友飲酒傾計好Chill。
呢度除咗啱影相打卡，仲有肚皮舞同Live Band 表演，邊食、邊Chill、邊玩。夜晚九點後，逢星期四會有專業舞者表演肚皮舞，仲會穿梭全場邀食客一齊載歌載舞；逢星期五、六則有Live Band 演唱，食客仲可以即興點歌或上台獻唱㗎！
肚皮舞者會走勻店內每個角落，同大家載歌載舞。
Live Band 氣氛超好，仲可以走到店中央跳吓舞，好似置身外國舞會一樣。
Cold Mezze
黎巴嫩菜嘅餐前小菜叫Mezze，有醬類、沙律、小食等，呢度嘅Mezze 有冷、熱之選。冷盤當然唔少得醬類，口味選擇好多，推介以下經典五款口味，每款都有埋薄餅沾醬食。
Hummus
鷹嘴豆蓉配芝麻醬，口感軟綿。
Moutabal
煙熏茄子配芝麻及橄欖油，配埋微酸番茄好開胃。
Labneh
乳酪配新鮮薄荷葉，Creamy 質感配薄餅超好食。
Muhammara
香烤紅辣椒配麵包屑及核桃，口感濃厚，食落微辣。
Grape Leaves with Oil
葡萄葉包蔬菜及飯，打開葡萄葉就食到一口飯。飯粒濕潤帶酸，同我哋平時食開嘅白飯好唔同。
Cold Mezze 仲有沙律揀，味道亦以微酸為主，並帶濃郁香葉味，非常有中東特色。
Fattoush Salad
經典嘅黎巴嫩沙律，以青瓜、番茄、山葵、混合辣椒、新鮮薄荷或番茜，加埋輕甜石榴味道豐富。重點係有脆片點綴，有飽足感但無負擔，特別啱on diet 嘅女仔食。
Tabouleh
同樣係黎巴嫩經典沙律之一，根據傳統做法混合新鮮番茄粒、番茜、布格麥及檸檬醬，食材新鮮富有營養，蔬菜清爽配上小麥碎更有口感。
Hot Mezze
同黎巴嫩藉店主閒聊之下，知道店主希望呈現黎巴嫩菜地味道。除咗煮法地道，亦堅持只用靚食材，志在令食客食得開心，呢兩道Hot Mezze 屬於前菜熱盤，口味地道濃郁。
Makanek in Pomegranate Sauce
自製香腸配檸檬、石榴醃香料，用嚟佐酒傾計一流。
Grill Hallomi Cheese
烤芝士配新鮮石榴及生菜。芝士口感輕爽，入口輕鹹，後續有濃郁奶味，層次變化有驚喜。
超大份拼盤！
介紹咗咁多款前菜，嚟到主菜不得不提超大份嘅烤肉拼盤！拼盤可揀小份或大份，今次就試咗大份Size，上枱時已夠震撼，羊架、雞肉、牛肉都有，最特別係盤中仲有木炭保持熱度，食落亦帶淡淡炭燒味。
拼盤會跟兩個醬—Tomeya (忌廉蒜醬) 同 Tahini (中東芝麻醬)，配菜可揀飯 或 薯條。個人覺得個飯幾有特色，係用牛油同橄欖油入焗爐煮成，加埋極多Nuts，飯粒軟綿又有Nuts 脆口，口感特別。
獨家雞尾酒 呢度先飲到！
呢度有十幾款Cocktail 同 Mocktail，全部由駐場調酒師設計，出面飲唔到㗎～如果想試黎巴嫩特產酒，呢度亦有當地紅酒揀。
Mediterranean
以Bourbon威士忌、黑加侖甜酒、野莓濃縮汁、柑橘、新鮮黑莓同薄荷而成。
One Thousand One Nights
以汽酒、荔枝利口酒、玫瑰糖漿、柑橘、新鮮荔枝、烤迷迭香而成。
Arabian Spice
以紅辣椒伏特加、青蘋果利口酒、青蘋果濃縮汁、柑橘、蛋白及乾辣椒片而成。
