Wine & Dine 2020預告 免費網上學品酒 精選品酒套裝率先睇
5天前

年度盛事香港美酒佳餚巡禮,因應疫情關係,今年轉個形式,改為「線上+線下」進行,更由以往嘅4日延長至5個星期!參與活動嘅餐廳有超過500間,酒商亦有過百間,除咗可以預早買定各式品酒套餐或美食外,更可以免費參加網上大師班,學品酒、學烹飪。

OpenRice作為官方媒體伙伴,當然會為大家預告同精選一啲重點活動啦。先介紹今年新增嘅「網上品酒大師班」啦。18個品酒班中,無論係葡萄酒、清酒、威士忌、氈酒定本地手工啤酒等都有涵蓋到,絕對照顧到各個酒迷嘅需要。由11月21日起連續三個禮拜六、日都有堂上,費用全免仲可以隨時重溫添,揀啱邊堂就可以喺11月11日起開始報名。有部分網上學堂更設有品酒套裝可以預訂添,咁就可以一路上堂一路實戰品嚐喇。每堂頭50個訂嘅仲有得免運費!即刻睇下有咩精選課堂啦~

 波爾多新風- 品酒套裝

主題:波爾多新風
講者:James Suckling (世界葡萄酒評論家)
日期及時間:11月21日,2pm-2:30pm

葡萄酒嘅世界多姿多彩,唔同產區、唔同品種嘅葡萄,釀出嚟嘅酒都各有特色。而呢個網上大師班就將會主力介紹法國最著名嘅葡萄酒產區——波爾多,CP值較高嘅葡萄酒。單係波爾多內嘅酒莊或生產商,都已經超過8000間,要喺當中精挑細選都唔容易,酒迷要趁今次機會,用半個鐘速成一下啦!

想喺直播時可以同大師同步體驗嘅,就要預早買定品酒套裝喇,包括:帶有青檸、青芒果、檸檬同礦物等味嘅Le Blanc Sec de Suduiraut Bordeaux Blanc 2019、呈桃紅色,味道清新又有微微艱澀嘅Chateau Giscours Bordeaux Le Rose de Giscours 2019同埋果味濃郁嘅Chateau Le Rey Castillon Cotes de Bordeaux Les Argileuses 2019。三款酒喺JS評分中都高過90分架!

 hEROES聯合創辦人及首席釀酒師,黃思偉 (Chris )

主題:手工啤酒配對便利店小食
講者:黃思偉 (hEROES Beer Co.聯合創辦人及首席釀酒師)
日期及時間:12月5日,4:45pm-5:15pm

本地手工啤酒嘅發展同變化愈嚟愈多,唔同美食同啤酒嘅配搭亦出現更多嘅可能性。不過如果講到啤酒嘅最佳拍檔,非零食莫屬,特別係夜晚喺屋企睇波睇戲嘅時候就最夾啦。之但係,唔同款式嘅啤酒配咩零食會最match呢?呢個網上大師班就會有專人同大家分享喇,除咗一齊玩pairing之外,仲會講下一啲啤酒配搭食物嘅基本知識,同埋本身點樣品嚐啤酒嘅心得。

啤迷坐定定等直播之前,最好梗係買定set酒喺屋企,到時邊聽邊食邊飲啦。hEROES嘅品酒套裝都好豐富,一set有齊晒三款零食同三款啤酒,包括瑞士糖、鱈魚絲、繽紛樂;有咖啡味嘅波特酒Hunk Sir、由雞尾酒觸發靈感嘅菠蘿味啤酒Wingman,同埋最近新推出,同Honbo合作嘅檸檬奶昔味啤酒,另外會有多隻酒杯同埋hEROES網店現金券呢!

主題:當Johnnie Walker遇上咖啡的調配美學
講者:黎振南(Quinary’s 調酒師)、藍永發(Omotesando Koffee and Koffee Mameya Hong Kong 首席咖啡師)
日期及時間:12月6日,3:15pm – 4:00pm

威士忌同咖啡,兩者一向都被視為生活品味嘅象徵,對於原材料嘅產地、烘焙/蒸餾技術都相當講究,如果將兩者融合,相信呢個搭配一定好有魅力。今次就請嚟世界級調酒師Antonio Lai 同專業咖啡師藍永發合講一堂網上大師班, Antonio係香港多間著名酒吧嘅創辦人,擅長多重感官調酒術;而藍永發則曾喺多次世界性咖啡調酒比賽中獲奬,近年致力研究咖啡同調酒嘅配方。佢哋將會同大家分享咖啡、威士忌可以點樣調和,將兩者進一步昇華。

有興趣嘅酒迷同啡迷,建議可以盡早買定set品酒套裝參與體驗,套裝包括:喺蘇格蘭各產區、超過40種熟成12年以上嘅威士忌調配而成嘅Johnnie Walker 黑牌、頂級珍釀Johnnie Walker 藍牌、Johnnie Walker 調酒工具套裝 、咖啡沖配套裝 、同埋3包單一產地咖啡豆及綜合咖啡豆 。有齊套裝,上完今次呢堂之後,自己都可以繼續實習呢~



香港美酒佳餚巡禮
日期:11月11日至12月15日
網址 (按此)


文:Kar
相:Tom Li


關鍵字
Wine & Dine
香港美酒佳餚巡禮
啤酒
手工啤酒
精釀啤酒
葡萄酒
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
【隨時更新】零食速報 每周新款零食、酒品點評
5天前
九龍城$388 大閘蟹+台式小吃放題 任食多膏大閘蟹、肥美蚵仔滷肉飯
2020-10-27
優雅小聚 11月下午茶推介
2020-11-03
【訂座感謝祭】 快閃$20餐飲券第八彈 激抵燒烤優惠
2020-11-06
Wine & Dine 2020預告 免費網上學品酒 精選品酒套裝率先睇
5天前