咖啡迷今個周末有節目！中環PMQ將一連三天舉行The Coffee Agenda咖啡生活市集，今次同本地咖啡媒體啡聞Coffeeder合作，請來八間來自日本、台灣及澳門嘅咖啡品牌來港開pop-up，亦有大量本地人氣店駐場，唔使飛去第二度都飲到靚精品咖啡！

來自日本嘅代表有座落在目黑區那間咖啡店Switch Coffee Tokyo，選用世界各地咖啡豆，如洪都拉麵藝妓豆、耶加雪夫圓豆等作自家烘焙淺炒，每次只生產少量保持新鮮。日籍咖啡師亦親自來港，炮製出帶微酸嘅奶啡。

另一間來自福岡嘅Coniglio，創辦人Ito Ryo為拉花比賽亞軍。除咗有好靚嘅拉花咖啡之外，亦特別用本地雪糕製作出三款咖啡特飲，朱古力雪糕配上咖啡、朱古力漿，香甜又消暑。

Taster’s Coffee饕選咖啡來自台灣，由著名台灣咖啡評審胡正元創立，弟子Cha Cha亦親自來港，以自家設計的滴濾器製作手沖咖啡，亦帶來自家品牌的掛耳包。

另一間台灣品牌Kopi Ibrik唔係賣台灣咖啡，反而係土耳其咖啡！選用非洲精品咖啡豆，再以土耳其傳統方法沖泡，放入沙堆加熱。咖啡比一般土耳其咖啡口感更幼滑，如果汁般甘甜帶酸，有驚喜！

咖啡迷都可能聽過台北Artista Perfetto，由六位香港年青咖啡師創立，今次「回流」於市集設店。拉花冠軍Kim Yeung亦在場即席獻技，有奶啡亦用兩款非洲耶加雪夫咖啡豆製成的冷泡咖啡，取其香氣及口感。

Eaves Coffee係台灣設計師自創品牌，於工作室前擺擋。貓貓logo夠可愛，有自家烘焙咖啡豆、咖啡糖漿，亦有咖啡爆谷及腰果，食落有咖啡香味，送咖啡一流！

來自澳門嘅Blooom Coffee House推出一款特飲，用上新鮮檸檬、茶、冷泡咖啡、蜜糖、薑味汽水等shake成，帶有微微酒香，但飲落似蜂蜜糖咁香甜！

本地薑都有唔少好出名咖啡店，好似有名牌咖啡機代理Glory Coffee、旅居日本人開設的Porch Coffee、手沖達人Michael Wong的Freshness Coffee、西貢日式咖啡店米珈琲等。

如果想一試用咖啡機沖咖啡，更可以到WPM咖啡車仔試玩。$30可以自己沖一杯，有咖啡師在場指導，由磨豆到打奶都一手包辦。

食物方面都有好多選擇，太子包店包販子以文青插畫公仔打響名堂，今次帶來北京填鴨、煙肉蕃茄同洋葱芝士菇菇三款包，兼有大量精品售賣。

夏雪就有用house blend製成嘅咖啡窩夫，有招牌威士忌、Cappuccino及Mocha味，亦可以加奶蓋，咖啡味香濃而且少甜。

Loupe Teahouse有自家製金箔芝士蛋糕、黃梅白朱古力蛋糕及乳酪士多啤梨蛋糕，配埋自家冷泡茶，唔飲咖啡可以試試。

同場仲有大量咖啡用品、咖啡豆，亦有工作坊、咖啡課程等。只做今個週末21-23/9三日，咖啡迷唔可以錯過！

The Coffee Agenda咖啡生活市集

地址：中環PMQ元創坊

日期及時間：9月21日至23日 12nn-8pm

文、相、片：Perrins