天氣絕對會影響食慾，今個月好似特別熱呀，梗係要食返啲好嘢刺激吓胃口！今個夏天推出咗咁多特色雪糕，所以7月份排行榜，都見到有唔少消暑食品喎，除咗透心涼嘅雪糕，當然亦唔少得今個月突然爆紅嘅海膽啦。你今日食咗未呀？

第10位 阿利水韓國料理 (*新上榜)

雖然唔係新餐廳，但由韓國人親自主理，食物唔走新派路線，都係傳統嘅燒肉同小菜，少有拉芝、炸雞等花巧菜式小碟更加係唔食客大讚正宗。難得質素穩定，價錢亦唔算貴，所以得到米芝蓮推介。

圖：Lemon See See、eat_eat_everyday

第9位 Smokey Ice (*新上榜)

咁多款新雪糕，呢間甜品店嘅出品一定係相機食先嘅代表！新開冇耐已經有好多人專登去試（或者影），有牛扒、炸豬扒、腸粉雪糕，造型超神似！而且唔係得個樣，雪糕味道自然，配料亦豐富，咁有心思抵你上榜嘅。

圖：hiuytsang8、foodsharingnana

第8位 百味堂 (*新上榜)

來自韓國嘅軟雪糕，係老字號南陽乳業嘅出品，開張第一日有過千人排隊！雪糕用韓國農場直送嘅有機牛奶製作，奶香濃厚質感香滑，亦有唔同口味、配咖啡嘅affogato等不同款式，只做pop-up都打到入十大，勁呀！

圖：lokyanyan、siumaigor

第7位 十下 (*新上榜)

打邊爐係冇分季節嘅！呢間火鍋店裝修有80年代feel，有大量影相位同埋懷舊道具，座位闊落加高樓底，打得舒服。配料有港式風味，好似 臘腸鯪魚滑、鮮打鹹蛋黃蝦滑、果皮魚蛋、老少平安同豬腸粉，好有創意。

圖：joycexlicious、=架架麵=

第6位 芝樂坊餐廳

開業咗一排，雖然人氣回落咗少少，但都仍然有支持者嘅，入座都要等兩個鐘以上。如果已經食過招牌芝士蛋糕，不妨試試其他生果系列，好似芒果青檸、檸檬馬令芝士蛋糕、香蕉忌廉芝士蛋糕等，酸酸甜甜更加適合夏天食呀。

第5位 炊豕店 (*新上榜)

天氣熱，特別想食香口濃味嘢！呢間以豬扒馳名嘅小店，煎豬排飯大大件又夠厚身，煎得香脆juicy，仲有炸芝麻雞翼、酥炸鳳尾蝦等小食都係必吃。雖然位於銅鑼灣邊緣，不過好多人幫襯，座位唔多想食就要等吓位喇。

圖：elaine20326、JeffTCN

第4位 咖啡灣 (*新上榜)

呢間café總店喺大埔，最出名係畫上唔同卡通人物同拉花嘅咖啡。荃灣分店裝修係公主主題，啱晒少女們打卡。食物有特色，好似有原隻軟殼蟹嘅黑松露忌廉意大利粉、黑松露雜菌蘑菇屋、鵝肝和牛巨人漢堡，價錢亦抵食，難怪成日排長龍啦。

圖：bonbon妮、plutoinn

第3位 Meat King

上星期首位回落兩級，呢間日式漢堡扒專門店繼續受一眾食肉獸垂青。除咗一系列漢堡扒同牛扒，任食嘅沙律吧都好受人歡迎，每人只係加$58，就可以任拎蔬菜、沙律、湯、甜品同飲品，大胃王就最啱喇！

圖：子言張、waterqq

第2位 風雲丸

拉麵不時都會上榜，但氣勢可以保持到咁強勁，又真係冇乜邊幾間，呢度人潮似乎一直都冇減少嘅意思，即使天氣咁熱都仍然有捧場客！除咗招牌作石燒豚骨魚介味玉沾麵，亦可以試試石燒咖哩豚骨魚介味同石燒辛辣豚骨魚介味。

圖：vinccic、Helenbobo39

第1位 手卷野村 (*新上榜)

今個月嘅主角，一定係海膽莫屬。呢間手卷店嘅海膽杯同手卷，賣相超澎湃，食豪啲梗係要揀海膽兩板手卷，份量成座山咁高，每啖都係甘香鮮甜味。想多啲配料可以揀有三文魚子、拖羅蓉同蟹腳嘅激滿海膽杯，夠晒滿足！

圖：Voracious、fefefefep

文：Perrins