時間過得太快，話咁快2019年又過咗一半。睇返呢半年嘅十強榜，每個月都有唔少新餐廳上榜，素食餐廳仲愈嚟愈受歡迎添。睇下6月嘅走勢又係點先。
第10位 牛魔 
圖：上個月排外第2嘅牛魔，喺多間石燒牛扒店嘅夾擊底下，今個月仍然上榜。呢間燒肉店主要提供美、日、澳嘅和牛，部位選擇多，仲可以畀客人自己燒製牛肉，全面滿足各位牛魔牛！拼盤當然推介啦，一次過試到幾款部位，另外A4牛魔野原燒都係大推，薄薄der和牛燒完沾埋蛋漿食，好香口。
第9位 牛惣居酎屋（*新上榜）
圖：新開冇耐嘅日式居酒屋，睇個名都知主打和牛串燒同埋燒酎。有成26款牛內臟串燒，當中有唔少仲係坊間少見，好似牛心管、牛沙瓜、牛腸咁樣，牛心管即係牛嘅大動脈，口感爽脆；牛沙瓜就係第4個胃袋，外脆內韌；至於牛腸，油脂豐滿好鬼香。
第8位 放下素（*新上榜）
圖：素食朋友就最開心，終於有素食自助餐啦，仲有成80幾款素菜選擇，有中式有西式，要特別介紹下呢度嘅素食漢堡，係自由配搭㗎，紅腰豆、鷹嘴豆會係基底，on top嘅配料同醬料大家可以隨便揀，例如有香菇、羅勒、紅蘿蔔、菠蘿等。
第7位 Mamaday （*新上榜）
圖：foodiesspig、eatingchingching
呢間餐廳由台灣開過嚟香港，但原來老闆係兩位香港人嚟。揭下menu就會見到好多都充滿特色嘅食物，最吸引嘅就係天然紫薯蛋糕，啖啖紫薯香，下層以cream cheese製嘅芝士蛋糕，口感軟滑。
第6位 為食龍（*新上榜）
圖：以恐龍做主題嘅日式外賣店，係就係主打壽司，不過淨係腐皮壽司都有排佢哋玩，有8款口味咁多，好似牛油果三文魚腐皮壽司、蕃茄玉米鵪鶉蛋腐皮壽司咁，啲配搭又幾新鮮。另外餐廳都有飯糰同便當賣，怪不得一新開已經咁受銅鑼灣嘅朋友仔歡迎。
第5位 船皇
圖：穩守第5位嘅船皇，最平$12碗船麵真係唔講得笑，咁抵食抵佢哋繼續留榜嘅。湯底藥材味濃郁，鮮甜微辣。湯麵以外仲有撈麵，加入泰國製嘅辣醬，較湯麵嘅味道鹹身同更濃烈，重口味啱晒。
第4位 三一餃子（*新上榜）
圖：開喺喺中環區嘅一間餃子店，因為創意同價錢相宜，令佢哋成功上榜。首推大阪餃子燒，真係好似大阪燒咁㗎，面頭舖滿木絲同紫菜，淋上沙律醬，而個底，就係煎到香脆嘅冰花餃子，又幾有新意。另一款食餃都要打卡嘅係炸玫瑰花餃子，堅係成棵花形㗎。
第3位 王牌冰室（*新上榜）
圖：南豐紗廠個個Weekend都好多人去打卡呃like，連帶呢間冰室嘅人氣都相當旺盛，仲打入三甲。瑞士汁撈公仔麵呀、滑蛋叉燒蝦仁飯等都係比較受歡迎嘅菜式，十枱可能有八枱都叫緊，前者香口後者滑口，但呢期去嘅話，記得試黃金奶蓋東方美人啊！用咗近年大熱嘅食材——鹹蛋加入奶蓋，仲食到粒粒蛋黃添啊。
第2位 登堂
圖：開喺觀塘工廈嘅呢間西餐廳，好啱一大班frd一齊去，事關選擇太多，想試多幾款真係要有人開心些牙至得，好似炭烤澳洲M5和牛斧頭扒咁就已經1.7kg，仲有個串燒拼盤就有成11串肉類同海鮮，鮮甜虎蝦、北海道帶子等，都好吸引。
第1位 % Arabica（*新上榜）
圖：呢間咖啡店，過往都有唔少分店上過榜，而今次榜首嘅呢間，就係新開喺PMQ嗰間，成間舖都係打卡位呢~ 做返半日文青，悠閒咁坐下嘆杯漸層嘅Iced Caffe Latte休息下，唔飲咖啡嘅，去到可以叫matcha latte或者lemonade呀，前者抹茶味香濃，後者微酸解渴。
文：Kar
