3月上榜嘅有唔少都係星馬日台菜式嘅餐廳，可能大家呢排都冇得飛，惟有搵地道嘅餐廳去食住止一止癮先。另外，亦有啲新開冇耐嘅小店，強勢入圍，值得鼓掌啊。
第10位 肉骨皇（*新上榜）
圖：mylittlegourmand、iris2002208
想食馬來西亞同新加坡嘅肉骨茶，可以去大坑會一會。呢間嘅肉骨茶色澤深，藥材味香，濃中帶甜，豬肉仲好腍身添，配埋米粉同油炸鬼就最夾。如果飲晒唔夠喉仲可以免費添湯。
第9位 素年（*新上榜）
圖：素食文化愈嚟愈多元化，呢間餐廳主力提供日式同西式嘅素食，部分蛋奶素菜式仲可以轉做全素或者走五辛，素食人士嘅選擇都可以好豐富！大力推介素漢堡，塊肉係以Impossible™ Meat植物牛肉製作，口感同真牛肉幾似，一樣juicy。
第8位 茶聊 
圖：鬆軟到會彈彈下嘅梳乎厘就梗係治癒，但更多人應該會係為咗塊百潔布嚟！講緊嘅係呢份造型似到十足嘅百潔布蛋糕，原來係檸檬芝士蛋糕，酸酸地幾清新，口感軟滑，有外表又有內涵，唔怪得咁受歡迎。
訂座優惠：獲送梳乎厘乙個(價值$88) (只限消費滿$300)
第7位 Bellevue Bar and Grill（*新上榜）
圖：牛魔王要搵肉食，呢間設有熟成肉櫃嘅餐廳當然係名單之內，由前星級酒店行政總廚主理，質素有保證。無論係美國特級安格斯肉眼扒定係碳燒西冷牛扒，叫五成熟就啱啱好，啖啖肉香仲有肉汁。甜品推介伯爵茶朱古力撻，甜中帶茶香。
第6位 馬祖台灣養生湯麵館（*新上榜）
圖：新開冇耐就可以上榜嘅呢間火鍋店，一人一鍋，晚巿仲做埋90分鐘火鍋放題，完全解決晒一班火鍋控想打邊爐但又怕同人同煲嘅煩惱。9款湯底選擇包括有麻辣、蕃茄、椰子等等，特別推介係藥膳蟲草花桃膠雞湯，滋潤養生呀，牛肉仲要有高級嘅Prime Grade揀！
第5位 Check-In Taipei
圖：呢間台式餐廳幾時都咁受歡迎，蛋餡餡料多多，又有新意，最受歡迎嗰款肯定係髒髒紫薯麻糬蛋餅，個樣又靚，食落又啖啖紫薯蓉香，仲有煙韌麻糬，口感豐富。正餐叫多款溏心蛋滷肉飯，滿滿油香，隻蛋更加係bonus。
第4位 Homeland（*新上榜）
圖：最近先新開嘅餐廳，仲可以短時間內衝上十強榜，靠嘅係店主嘅心機同誠意。小店主打每日新鮮製造嘅手打意粉、手工薄餅等，特別推介墨汁烏冬，鮮爽彈牙，樣樣都係手工嘢，深得大埔街坊支持呀。
第3位 十和田總本店
圖：冇得飛日本係會特別想食日本嘢，呢度由資深日籍壽司師傅主理，食材每日由日本空運到港，壽司選用赤醋飯，味道微酸亦更香醇。壽司以外最受歡迎嘅應該係三色丼，細細碗但三碗都勁吸引，海膽啦、蟹膏蟹肉啦，仲有吞拿魚蓉。
第2位 花斑茶社（*新上榜） 
圖：呢間茶飲店嘅茶底，採用嚟自台灣南投嘅茶葉，茶味更香濃突出，主力賣黑糖珍珠、鮮奶茶同果茶等。珍奶控揀黑糖珍珠厚鮮奶就實冇錯，勁多珍珠呢，有成三分一杯咁多，甜甜地好有咬口。白桃烏龍亦係推介，仲有絲絲桃肉食到！
第1位 Wagyu Ya （*新上榜）
圖：榜首位置由今年年頭先開嘅燒肉店奪得，主打JA鹿兒島直送和牛，牛肉拼盤有齊牛舌、牛小排、牛三角、西冷等唔同國家同部位嘅肉，牛舌厚切薄切都有，咩口感都食到！牛魔王不能不試。呢度仲有大熱吉列和牛三文治啊，外脆內嫩，加埋海膽嘅話真係滿分。
文：Kar
