2月份好評餐廳十強
2020-03-05

整個2月份,大家都少咗出街食飯。不過呢10間餐廳仍然人氣高企,力抗「疫」巿!當中有唔少都係新開業冇耐嘅過江龍,又或者係默默努力嘅小店!

第10位  當文歷餅店(*新上榜)

 圖:guinevereeeKatrina_HK Foodie

大家期待咗好耐嘅紐約人氣甜品店,今年1月抵港,短短1個月已經火速打入十強榜,足證大家對佢嘅愛戴程度。佢哋嘅甜品內外兼備,創意十足,嚟到香港仲有幾款特定為香港設計嘅特色甜品,好似菠蘿油、檸茶蛋糕等等。當然唔少得佢哋招牌DKA,外脆內酥,必試。

第9位  ChaTraMue

 圖:yuk_tamhyEmilyLam100

連續兩個月打入十大嘅70年歷史泰國茶葉品牌,上個月凍凍地,去到最啱就係飲返杯熱辣辣嘅正宗泰國熱薑奶茶,薑味特重,奶茶甜身,飲完當堂暖晒。平時飲開珍珠奶茶嘅朋友,可試泰國班蘭珍珠抹茶鮮奶,啲珍珠由泰國入口,以新鮮班蘭葉製,仲有陣陣清香添。

第8位   天 · 悠蔬食 

 圖:sleepbeauty大食有為

近排大家出街食嘢都健康咗,荃灣呢間童話風素食餐廳更連續兩個月留守十強位置,除咗鰻魚好吸引之外,大啡菇鮮豆包栗子紫薯焗千層闊麵亦唔輸蝕,鹹鹹地甜甜地,蕃薯軟腍。而家幫襯,仲會送抗疫潤肺蘋果雪梨海底椰南北杏燉雪耳糖水添!

第7位  Lex Coffee  

 圖:fatty piggyEmemmmmm

結合藝術同美食嘅餐廳,特別受愛打卡嘅朋友歡迎。咖啡又好朱古力又好,都可以做到藝術打印,想要咩圖案都印到落去,好鬼靚,層cream仲好rich添。上個月個tea set又係靚到一個點,用滑板放上多款甜品,完全滿足晒視覺。

第6位  大渣哥茶記(*新上榜)

 圖:渣哥 一九九六lsyuk

最近好多餐廳嘅生意都大受影響,但偏偏呢間由篤魚蛋起家,喺九龍灣新開業茶記,就日日都大排長龍。餐牌上嘅菜名都花過心思,好似有歡樂今宵早餐、襟撈任砌等等。幾乎枱枱都會叫嘅黑牛黑麵,即係沙嗲牛肉麵,沙嗲幾香。不過亦有唔少食客認為價錢略貴。

第5位 Wingman(*新上榜) 

 圖:heisfoodiaryKathyPun

呢間雞翼專門店擺明為雞翼控而設,黑芝麻蜂蜜海鮮、泰式甜辣醬、咖啡香味、新加坡辣蟹味等多款口味嘅雞翼,全部都皮脆多汁,最勁嗰隻應該係死神醬味,辣到呢,自問食得辣嗰啲自己去挑個機。餐廳仲首創咗雞翼雞煲,又幾有諗頭喎。

第4位  Micasadeco & Cafe Hong Kong(*新上榜)

 圖:KathyPunherbert

香港人對班戟嘅熱愛一直冇減退過,呢間嚟自日本嘅班戟店,上年年底先開業,話咁快就上到第4位。主打嘅係招牌香軟ricotta芝士梳乎厘班戟,記住要三層一齊咁食,口感好鬆軟,蛋香十足,粒粒ricotta芝士亦正常發揮,微微鹹香。

第3位  Mamaday

 圖:118兔Amber1117

又一間疫巿突圍而出嘅餐廳,晚晚都依然係爆滿。餐廳裝修同餐牌設計都充滿玩味,碟碟菜式嘅名都好長,推介有蟹膏又有蟹肉的蟹蟹蟹意大利扁麵,淨係見到個名咁多個蟹字就知豐富,蟹味十足。Pizza嚟講,亦係坊間少見嘅配搭,例如鹹蛋牛油果蟹肉同蒜蓉虎蝦等款式都相當受歡迎。

第2位 Amitie Kitchen(*新上榜)  

 圖:issactrevordkylmth

呢間位於尖沙咀嘅意大利餐廳,款款菜式都好吸引,好似火炙海膽芝士焗松蟹膏大啡菇咁,普普通通一件大啡菇畀佢加咗咁多靚料上去,仲要夾喎,係出色嘅。鮮甜海膽經火槍微燒過,連埋半溶芝士、香濃蟹膏、多汁大啡菇一啖咁食,係享受呀。btw,上個月餐廳仲好落力咁幫大家網購消毒搓手液,難怪咁多人捧場呀!

優惠券:正價7折: 主菜餐牌
優惠券:正價8折: 主菜餐牌
優惠券:正價8折: 主菜餐牌

第1位  頑固壽司(*新上榜)

 圖:Voraciousmandychoi23

首次上榜就榮登榜首嘅係嚟自日本嘅親民迴轉壽司,但價錢親民唔代表質素就要退讓喎,佢哋嘅刺身每日新鮮由九州運返嚟,件件壽司都係師傅即場手握,送到上枱時仲可以感受到飯嘅微溫。鍾意嘅叫返個12件壽司拼盤,有鰤魚、三文魚子,帆立貝、甜蝦海膽,大拖羅等等,件件誠意!


文:Kar


關鍵字
十強
十強名單
報榜
好評餐廳
荃灣
尖沙咀
旺角
九龍灣
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
2020-07-31
全城抗炎!屋企都嘆到三層架下午茶 Tea Set外送/外賣自取推介
1天前
全城抗炎!北角酒店最新應變 自助餐都有得外賣?
2020-07-17
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30