2月份又農曆新年又情人節，有冇影響到今個月嘅好評十強呢？今個月的確係多咗甜品店同火鍋上榜，講個小秘密俾大家知，情人節前後火鍋店係特別多人幫襯架，貼地都可以好浪漫！即刻同大家睇睇2月又有咩餐廳打入十大先！
第10位 宇治園 (*新上榜)
抹茶不死似乎係不爭嘅事實，雖然專門店越開越多，但仍然無損港人對抹茶嘅熱愛！呢間同樣來自京都宇治，而且都係百年老店，主打深蒸煎茶同淺火焙茶。必吃香港分店限定嘅抹茶及焙茶芭菲，亦有啫喱、Tiramisu、甜湯、生茶麵食等，飲品亦有多款選擇。
圖：第9位 桃園眷村
上月嘅第1位跌到第9，不過仍然不乏捧場客。今次介紹吓其他特色食品，好似用糙米同花生煮成嘅米漿，杰身如花生糊，味道帶果仁香。鹹豆花有菜甫、蝦米、脆油條等配料，加埋嫩滑豆腐一齊食，微微辣都幾鹹香。舖頭小小但有唔少選擇，食多幾次都唔厭呀。
圖：第8位 炊豕店
豬扒小店繼續留守十強，期間限定嘅避風塘豬扒果然好受歡迎，不過賣到10/3咋！俾少少貼士大家，最好加隻煎蛋，蛋漿撈埋豬扒更加香滑，冇得輸，想有唔同食法，加多幾蚊可以配咖喱汁或者肉燥汁，用嚟撈飯係一絕嘅。
圖：第7位 餃子縣餃子專門店 (*新上榜)
其實呢間餃子專門店並非首次入榜，今次係新開嘅西灣河分店。餃子款式多而且難得地每一款味道都唔錯，芝士餃系列有番茄、黑松露、辛辣同三重芝士，而且仲可以每款一隻試唔同味。食得辣嘅記得要落麻辣菜甫或者配酸辣湯底，更加惹味！
圖：第6位 愛甜心甜品 (*新上榜)
新開甜品唔係西式就係抹茶，終於都有港式甜品入圍喇！呢間小店憑住一道自家製西米圓打響名堂，以西米皮包住綠豆蓉或芋頭蓉，凍食包住麥提莎朱古力，好有創意！西米皮煙韌軟糯，加埋椰汁好香甜。芒果甜品、布甸類及中式糖水都有質素，值得支持呀。
圖：第5位 駿景軒
連續3年奪米芝蓮嘅川粵菜館，今年第二次入榜微跌兩級，果然有實力！每枱必點杏汁燉白肺湯，奶白色嘅湯杏仁香氣突出，但唔過搶，豬肺腍滑。川菜以外，小菜如照燒黑松露野菌安格斯牛柳粒、菠蘿咕嚕肉及黑醋珠蟹肉帶子炒鮮奶等都係招牌作。
圖：第4位 同仁四季音樂主題餐廳 (*新上榜)
上個月天氣飄忽，凍起上嚟最好就係打邊爐！呢間火鍋店主打椰子雞煲，用上4個椰青同1個椰皇做湯底，完全無添加，淥完雞件好清甜，雞肉亦嫩滑。海鮮夠新鮮、自家製配料足料，必吃蟹黃甘香嘅生拆蟹皇丸，每日都有獨立音樂人現場獻唱，都幾有feel。
圖：第3位 重慶劉一手火鍋店 (*新上榜)
早排好多麻辣火鍋開業，呢一間有蔡瀾加持，更係重慶火鍋十大品牌，全球有過千間分店，非常架勢！九宮格湯底濃郁夠麻香，一層鮮紅色滾油浮面，辣度十足。唔食辣仲有香港獨有嘅龍蝦湯底、番茄湯底等，內臟如鵝腸、毛肚、鴨血都係必吃，少見嘅腸灌豬紅係個人推介。
圖：第2位 i CREMERiA Café (*新上榜)
第2位又係甜品店！今次輪到以軟雪糕起家嘅i CREMERiA，雖然開業咗一段時間，不過不時推出新出品，賣相搶眼又呃like！旺角分店餐牌選擇更加豐富，tea set有六款甜品，有招牌雪糕、白玉、三文治、蛋糕及生果，味道剛好唔過甜。
圖：第1位 日悅極尚日式放題 (*新上榜)
放題一向都好受歡迎，不過質素參差，難得呢間新開嘅放題，食物款式多，自助區似足buffet咁大堆頭，有原隻乳豬、海鮮、沙律等任拎。魚生新鮮、燒物及炸物都出色，仲有Movenpick雪糕任食清酒任飲，價錢由$258起食足兩個半鐘，都算抵食！
圖：文：Perrins
