香港有唔少夜鬼，都有個共通嘅問題，就係：為何深宵總是餓？然後就引申另一個問題，夜麻麻去邊度搵食？唔通次次都淥個杯麵咩？唔使煩，各區都有唔少深夜食堂，開飯仔同你哋逐區去食宵夜！元朗一向都係美食集中地，宵夜當然都唔例外，咩款式都有，最嘴挑都可以滿足到呀！
家庭式打冷小店 六記潮州打冷
圖﹕「打冷」一向都係食宵嘅好選擇，而呢間潮州打冷就勝在地道、抵食。餐牌按季節而定，冬天有羊腩煲、醉雞煲，夏天就有凍烏頭魚。打冷必食嘅蠔仔粥就一年365日都有，蠔仔足料大大隻，粥底帶甜，食完睡前都暖笠笠啦！
收舖時間：02:00
綿滑足料雞粥 新記煲仔雞粥
圖﹕雞粥選用嫩滑嘅貴妃雞，加上20幾款藥材熬製，粥底有雞嘅鹹香之餘，亦帶淡淡嘅藥材香，粥底綿滑，一個人都食得晒一煲呀！幾個人唔夠食嘅話，仲可以嗌埋腸粉、炒麵添！
收舖時間：03:00
日式豐富宵夜 野川拉麵の深燒食堂
圖﹕宵夜想食麵，除咗杯麵，仲可以食拉麵嘅！呢間日式餐廳款式多多﹕串燒、刺身、拉麵、烏冬都有，單係拉麵都有十幾款口味。特別多人推介「自家製叉燒拉麵」，豬骨湯底味道濃郁，叉燒入味，加埋半隻溏心蛋夠滿足！
收舖時間：01:30
會上癮嘅串燒 川
圖﹕講到食宵點可以冇串燒呀！呢間日式串燒店提供嘅選擇唔算多，但勝在即叫即燒，特別有炭香。鰻魚串、多春魚燒、火雞腎等特色串燒都吸引，必食佢哋嘅「白板串」，即五花腩，望落相當juicy，食落又帶啲脆口，怪唔之得個個都話會食上癮啦！
收舖時間：02:00
海南雞飯外賣 水門泰式海南雞飯專門店
圖﹕doyouwannaeatt、水門泰式海南雞飯專門店Facebook專頁
如果唔想喺街食宵，買外賣就fit晒啦！呢間外賣店專「食雞」——泰式海南雞。口感嫩滑，咬落去有少少雞汁，而且仲去埋骨添，好方便~仲有元朗限定嘅冬蔭公牛腩飯，用安格斯牛腩，口感超腍，帶冬蔭公嘅淡淡清香，不過淨係星期一先有得食！
收舖時間：02:00
文﹕Kiko