雖然韓風吹得好勁，但燒肉嚟講依然有唔少人對日式燒肉情有獨鐘。比起加上唔同香濃醬汁，日式燒肉調味較輕，主打食材嘅原汁原味。所以以下介紹嘅日式燒肉店消費都唔算平，但一分錢一分貨，而且唔少仲有專人教你點燒甚至幫你燒埋，係燒肉放題畀唔到嘅體驗。
少見近江和牛 牛禪燒肉日本料理
圖：apuruw
銅鑼灣呢間燒肉店主打高質近江牛，係日本三大和牛之一，肉質軟滑而脂肪豐滿，可惜產量有限，所以香港咁多日本餐廳，都唔係咁多有提供近江牛。選擇恐懼症可以揀燒肉拼盤，有齊牛舌、牛肩或者肉眼等唔同部位。覺得燒肉都唔夠喉嘅話，仲可以嗌個近江和牛雪山，中間加咗乾冰非常有仙氣Feel，近江牛刺身入口嫩滑。
100%日產牛專門店 和牛燒肉‧純
有名你叫「純」，就知道呢間銅鑼灣同尖沙咀都有分店嘅燒肉絕對唔簡單：佢地係JA 全農(日本全國農業協同組合聯合會)旗下嘅直營店，所以可以保證佢地用嘅牛肉百分之百係日產和牛！而且仲會定期有唔同和牛主題，例如之前嘅飛驒牛，同最近載譽回歸嘅佐賀和牛。而且有齊唔同部位畀食客任揀，無論係和牛Fans定牛魔王都啱哂。
專人代燒特色燒肉 Futago HK大阪燒肉
無獨有偶呢間燒肉店同樣喺銅鑼灣同尖沙咀開分店，不過佢地主打傳統日式燒肉，唔單止肉類選擇多，仲有內臟選擇。而對於唔係成日食燒肉嘅為食友嚟講，最好嘅地方就在於佢地有專人代燒，完全唔洗驚火候時間唔啱。當中最搶眼嘅係大得驚人牛小排，Size的確大到放上去就幾乎見唔到個爐，而且絕對唔係大而無當，入口相當Juicy又軟腍。
心機正宗燒肉 298 Nikuya Kitchen
圖：au9
如果你係忠實日式燒肉迷，咁好可能已經去過佢地以前上環店，而家就分開中環同尖沙咀兩間分店。雖然裝修新派，但賣嘅係正宗日式燒肉。唔單止有A5和牛，雞肉同豚肉嘅選擇亦唔少。最特別嘅地方係佢地喺調味同醬汁上面落咗唔少功夫，例如A5和牛西冷燒Shabu配嘅係蛋黃汁，入口更滑溜香濃。柚子胡椒雞腿惹味清新。
隱世小店燒靚扒 和匠日式燒肉店
圖：au9
雖然大部分日式燒肉店都選擇開喺尖沙咀或者銅鑼灣，但其實佐敦呢度亦有間旺中帶靜嘅優質燒肉店，剩係牛肉就已經有飛驒牛、日產和牛同美國Prime牛三個選擇，唔少人都會嚟食美國Prime牛小扒，貪佢油脂分佈平均，燒完滿嘴脂香但唔會有油膩感，肉汁豐富又有牛肉香。當然如果Budget夠高，直接揀飛驒牛會更爽歪歪！
日式韓牛真味 七輪燒肉
圖：IE食神俠侶
通常去日式燒肉店都係食油脂細密平均嘅和牛，或者肉味濃郁嘅美國牛，但其實仲有介乎兩者中間嘅韓牛！韓牛喺韓國已經供不應求，所以香港可以食到真正韓牛嘅餐廳其實亦唔多，西環呢間係其中之一。韓牛比和牛更有嚼勁，既有脂油甘香又唔會太油膩。當然如果鐘情和牛嘅，亦可以揀返A5霜降和牛肉眼扒等等。
開飯編輯推介：
1. 【專訪】西營盤平價點心飯店 67歲老闆堅持日做12小時
2. 9月份好評餐廳十強
熱門文章推介：
隨時接收最新資訊
讚好OpenRice專頁！
