好多人都鍾意食放題，因為乜都有得食嘛，仲要任食喎。銅鑼灣近呢個月有間放題嘅旗艦店新開張，自助餐區多咗好多新選擇之外，仲連磯燒海鮮都引入埋呀！任飲任食3個鐘，都咪話唔happy！

一般嘅刺身呀、壽司呀就梗係唔少得啦，款式多到有5頁紙揀，池魚、拖羅、甚至松葉蟹腳都有得揀，啲魚生都幾新鮮呀，仲係厚切嘅添。雖然成日話放題食壽司食飯唔抵，但見到勁長嘅原條海鰻壽司又會忍唔住想食。

而熟食方面，韓式炸雞係新登場嘅，外層炸得幾脆幾香口。想要鍋物嘅可揀餛鈍雞鍋或者花甲鮮蟹粥，兩者都熬得好入味，建議人多叫嚟些牙。

首度引入嘅磯燒海鮮，除咗指定set外，客人仲可以隨意追加部分海鮮。鮑魚、原隻大蠔、肉蟹、青口、扇貝等等都有得燒，一枱一個自助磯燒爐，自己食自己燒，唔識燒都唔使驚，有指引教嘅，不外乎都係燒到咁上下就加少量清酒咁，簡簡單單，食返海鮮原鮮味之餘又幾清香。

至於出面嘅自助餐區，有主食都有湯拎， 姬松茸鮑魚燉烏雞湯、或者極品鮑魚花膠湯呀，幾足料呀，但味道就略嫌淡咗些少。

仲邊諗到放題啫，居然會有師傅即叫即切嘅乳豬、片皮鴨之類食？！呢間分店獨有㗎咋。

當然唔少得甜品同生果啦，甜品櫃內嘅芝士蛋糕、木糠布甸都算多款，而重中之重嘅雪糕，仲要係Movenpick添呀媽！好多隻味揀，士多啤梨、咖啡、藍莓芝士等等連埋成行toppings想加幾多都得，大人細路見到都開心。

咁多嘢食，飲品選擇都唔少。汽水、茶、咖啡就走唔甩，另外仲有即沖特飲，例如巨峰特飲、薄荷酒加青檸、蛋酒加菠蘿汁等，其他酒類都係任斟呀！開心死酒鬼！清酒、熱清酒、梅酒都夠你慢慢乾。

詳情
星期一至四（公眾假期前夕及當日除外）:
成人 $288、小童 $168
時段：5:30 – 8:30pm或8:45 - 11:15pm

星期五至日、公眾假期及前夕
成人$308 、小童 $168
時段：5:30 - 8:30pm或8:45 -11:10pm

極尚大喜屋日本料理
地址：銅鑼灣軒尼詩道489號銅鑼灣廣場一期9樓

文、相：Kar