想搵間靚景餐廳飲杯嘢？銅鑼灣最近新開一間空中酒吧餐廳，可以飽覽270度維港海景，VIP房同時設有落地大玻璃，咁就可以自私嘆靚景啦～餐廳取名為ZENG，廣東話有「正」之意，希望無論係酒類、食物定環境，都會令客人覺得正啊！
風林火山($388)
講到明係酒吧餐廳，酒當然係重點啦～餐廳供應過百款酒，包括特級烈酒及雞尾酒。講到最特色唔少得呢個創意 shooter風林火山，以 《孫子兵法》為靈感，調酒師製作了一套四款以風、林、火、山等元素嘅調酒，仲玩埋煙、火同炮彈，好有玩味氣氛！
Chinese Old Fashioned($148)
提起經典雞尾酒，Old Fashion 絕對係其一。不過呢度嘅Old Fashion寧舍唔同，調酒師加入中式元素，將原本嘅威士忌改成中國酒，並於酒中加入陳皮等一系列東方香料。 先將酒調好，再放入中式燒酒壺，並注入以荔枝木燒成嘅輕煙，增添酒嘅香氣。
和牛他他($188)
食物方面，餐廳主要供應東西方fusion菜，和牛他他選用澳洲牛肉，相對坊間切得較粗粒，食落口感更好。生牛肉簡單以橄欖油調味，主要食返牛肉鮮味，並加入一個新鮮日本生蛋黃，大廚於蛋黃內注入松露及馬斯卡邦芝士，味道更特別之餘又唔會蓋過牛肉味道。
肉眼牛扒配秘制醋和新鮮山葵($268)
選用紐西蘭肉眼，煎至約四成熟，肉味特別香濃。，除咗以鹽、蒜等調味外，大廚特別加入黑胡椒、粉紅椒及菊花於黑醋內，上枱後更會即磨新鮮辣根粉，味道層次更豐富。
意式新鮮生龍蝦刺身($238)
加拿大龍蝦肉質特別彈牙爽甜，配上同樣爽脆嘅西芹頭沙律、紫薑同青檸橄欖油，龍蝦鮮味更突出。
西洋焗蠔($68/隻)
選用日本廣島蠔，造法同中式焗蠔做法相似，但醬汁就偏向越式，如加入越南嘅是拉差醬汁，味道濃郁但食得返蠔嘅鮮味。
蟹膏蟹肉丼($118)
呢道菜加入新鮮松葉蟹膏、蟹肉及蟹籽，啖啖都係蟹嘅鮮味～連旁邊嘅玉子碎都係先煎香再親自切碎，心機之作～
松露乾炒牛河($208)
乾炒牛河唔係茶記同大排檔專利！呢度將松露加入港式乾炒牛河，有鑊氣外帶有松露香，而且牛肉同樣選用澳洲牛肉，塊塊都咁厚身。
地址: 銅鑼灣登龍街18號V Point 30樓
文：Yanica
相、片：Tom Li
