日式放題餐廳越開越多，但放題食物質素都幾參差，出名食得奄尖嘅香港人點會滿足於普通放題呢？一向深受放題控歡迎嘅銅鑼灣放題餐廳最近將食材大upgrade，只要加$88就可任叫任食各款貴價食材，包括：鮑魚、海參、花膠、和牛、海膽、牡丹蝦、鵝肝等等，計番條數，每位三百零蚊就可以走人，食到嘅卻係高質素食材，滋味無比！

升級放題可品嚐最少20幾款由高級食材烹煮而成嘅菜式，當中最吸引嘅，就係用鮑參翅肚煲出嘅心機湯水──鮑參翅肚響螺燉雞，除咗有海參、鮑魚、魚翅及花膠外，仲有響螺、老雞、蟲草花、淮山、杞子、豬骨等配料一同熬煮，令湯水夠滋補之餘，味道又夠濃郁，不太油膩，絕對要飲多幾碗。

黑松露和牛刺身，廚師將澳洲和牛輕輕燒香後直接薄切上碟，再加入少許香氣十足嘅黑松露。和牛油花平均，軟腍得嚟又夠juicy，而且咀嚼和牛嘅同時，松露香亦一邊滲滿整個口腔，好正！

以日本磯煮方法烹調南非鮑魚，而煮出呢道磯煮南非鮑魚。磯煮即係用慢火將鮑魚、昆布、醬油一同炆煮，令鮑魚可保持應有嘅煙韌、彈牙，又能將醬汁滲入鮑魚中。

呢道海膽刺身（左），用嘅係日本海膽，再配以青瓜、紫菜。雖然海膽細細塊，但勝在鮮甜。至於另一道牡丹蝦刺身（右），蝦肉鮮甜兼彈牙，而且size大大隻，比起一般甜蝦，食落更有口感。鍾意食嘅話，不妨多入紙落柯打就得啦！

鵝肝雖然係高級食材之一，但未必個個都鍾意鵝肝嘅油香。餐廳特地炮製出冷鵝肝，可減輕鵝肝嘅油膩感，但又品嚐到其軟糯口感。鵝肝上面仲有少少三文魚子配襯，味道層次更豐富。

愛「蒜」之人一定要試和牛薄燒卷，以充滿油香嘅和牛夾咗啲蒜蓉、蔥花。食一啖，蒜香即刻湧現，加埋旁邊同樣香濃嘅炸蒜片，味道勁香濃。

鍾意食鵝肝嘅話，不妨柯打一份法國鵝肝多士配意大利黑醋，鵝肝味濃，入口即融，而且意大利黑醋酸酸哋，清新之餘仲減輕油膩感。

燒河豚乾好似食snack咁，口感煙煙韌韌，仲有點焦脆，而且上面仲鋪滿芝麻，更香更脆，不太有腥味。

呢個墨綠色菜湯其實係法蓮草湯配深海石斑，法蓮草係莧菜的一種，將已攪拌好嘅法蓮草去煮湯，再放上厚肉嘅深海石斑及炸魚乾仔，好有層次感。

除咗一系列升級放題，三文魚、吞拿魚、甜蝦、帶子、象拔蚌等高質刺身依然有供應啦，味道鮮甜，肯定係各位encore之選！

供應時段：5:30pm-8:30pm或8:45pm-11:15pm
價錢表：（星期一至四）成人$238/位、小童$148/位；（星期五至日、公眾假期及其前夕）成人$248/位、小童$148/位
注：另設加一；不可與其他優惠同時使用；不適用於生日優惠

滿屋日本料理
地址: 銅鑼灣駱克道463-483號銅鑼灣廣場二期8樓

文：Joy