食嘢同扮靚應該係唔少女士們嘅喜好，如果兩樣嘢可以同時做就Perfect啦。今個10月有唔少酒店同餐廳都分別同各美妝品牌合作推出主題Tea Set，有啲仲有禮物送添，即刻嚟睇睇先。

韓國皇后養生食材　 香港洲際酒店大堂酒廊

呢間酒店最近同The history of 后合作，推出以韓國皇后為靈感嘅tea set。食物加入咗當歸、人參同枸杞等養生食材，好似鹹點就有人參雞肉卷、當歸慢煮豚肉奶油麵包同枸杞鴨肝脆麵包等。而甜品就有紅莓馬可孛羅紅茶蛋糕、白蘭地果凍蘋果批同皇后馬卡龍等。每位食客仲可以獲得秘貼宮廷抗衰老套裝一份，裏面有精華同面霜。如果係酒店網上購買4位下午茶，仲可以係指定日期免費參加韓風飾物私人工作坊，學整乾花手鏈或者繩結。有嘢食有嘢玩仲有嘢送，約埋姐妹們嚟就最啱。

帝后下午茶
供應日期：即日起至至11月30日
供應時間：星期一至五下午 2 時 30 分至 6 時；星期六、日及公眾假期下午 1 時 30 分至 6時
價錢：星期一至五$608兩位；星期六日及公眾假期$628兩位

玫瑰花香主題　獅子樓

酒店同澳洲有機香薰品牌CANVAS合作，推出以玫瑰為主題嘅下午茶。成個tea set都係粉紅色，粉紅控見到一定尖叫。嘢食有紅菜頭三文魚伴檸檬香檳果凍、玫瑰朱古力杯子蛋糕同紅桑子玫瑰荔枝撻等等。跟餐嘅仲有兩杯特飲，分別係Aroma同Pink Fairy。前者以茉莉花茶mix梳打水同黑加侖子糖漿，紫色漸層好夢幻。後者就係白朱古力奶加草莓果蓉同紅石榴糖漿，飲落好似yogurt咁，口感幾有趣。凡惠顧兩位用套餐就可以免費換領CANVAS玫瑰極緻潤澤修護套裝一份，仲送埋購物禮券，食完去shopping啱哂。

瑰麗奇緣下午茶
供應日期：即日起至至12月31日
供應時間：下午3時至6時
價錢：$508兩位(包兩杯特飲)；$270一位 (包一杯特飲)

蜜糖黑糖甜蜜滋潤　8度餐廳

秋天天氣開始乾燥，食返啲滋潤啲嘅嘢就最啱。呢個tea set就以韓國美容品牌 SKINFOOD為靈感，用蜜糖同黑糖製作唔同嘅食物，好似鹹點嘅蜜糖芥末青瓜蝦沙律開面三文治同脆炸雞翼伴桂花蜜。甜點就有長崎蜜糖蛋糕同黑糖閃電泡芙等。凍飲可以揀蜜糖青檸梳打，熱飲就可以揀黑糖薑茶。每位食客仲可以免費獲贈SKINFOOD護膚禮品同優惠劵添。

雙重甜「蜜」下午茶
供應日期：即日起至至12月10日
供應時間：下午3時至5時
價錢：$168一位

花果草本清新　Assaggio Trattoria Italiana

呢間意大利餐廳就同Jurlique合作，推出以花果同草本植物為主題嘅tea set。好似有鼠尾草鹽味爆谷、薰衣草馬卡龍、香橙雲呢嗱泡芙同杏仁糖玫瑰花等等。另一亮點仲有任食嘅即製鬆餅，配埋奶油同餐廳自家製嘅草莓同橘子醬，口感好rich。嘢飲就有呢排好hit嘅果味水detox water，由薑片、青瓜、檸檬同蜜糖沖製而成，維他命C豐富，仲可以幫助排毒添。每位食客仲可以獲得Jurlique皇牌玫瑰草本身體滋潤乳霜(15ml)一支，等你由內到外都香噴噴。

「花果．草本」清新下午茶
供應日期：即日起至至10月29日逢星期五、六、日及公眾假期
供應時間：下午3時至5時半
價錢：$288兩位

特別推介  泰式滋味　帝景軒

下午茶唔一定要西式嘅，轉下口味試下泰式一樣得。呢個tea set嘅食物全部細細件易入口，造型都幾得意架。好似扮壽司嘅一口海南雞飯，唔蘸豉油蘸海南雞醬，又幾盞鬼。甜品就有養顏滋潤嘅椰汁奶凍芒果燕窩杯，特別選用泰國芒果肉，入口香甜。仲有太陽花形狀嘅龍眼果凍薄荷朱古力撻，薄荷朱古力味濃，配埋晶瑩剔透嘅龍眼肉果凍，一濃一甜又幾夾。仲有椰奶斑蘭蛋糕同椰子慕絲蛋糕配芒果啫喱等甜品，好吸引。

「泰」滋味下午茶套餐
供應日期：即日起至至11月30日 (不適用於星期六、日及公眾假期)
供應時間：下午3時15分至5時15分
價錢：$260兩位

文：Crystal