香港人真係好有口福，以前成日要出國旅行先食到嘅嘢，隨住一間又一間嘅過江龍登陸開舖，而家冇假飛都可以食到好多好西！嚟緊又有喇，講咗好耐嘅紐約街頭人氣漢堡包店Shake Shack，今個月尾就會嚟香港開舖喇！佢哋今日搞咗個一日快閃店，率先有幾樣菜式畀大家試！

Shake Shack一向以100%全天然嘅安格斯牛肉、雞肉漢堡，同flat-top Vienna beef dogs熱狗（即係冇添加激素同冇抗生素）而聞名。嚟到香港，當然都會繼續秉承呢個理念，引入紐約嘅菜式啦。招牌菜ShackBurger嘅牛肉係直接由原塊牛排切出嚟，煮至半熟，肉味香濃，夾埋美國芝士、新鮮生菜、甘甜羅馬番茄，再配埋特製嘅ShackSauce幾惹味。吖，個包仲好鬆軟添。

更推介嘅係Shroom Burger，即係脆炸意式大啡菇！堅係脆口，菇汁又夠甜，重點係，咬開仲有流心嘅明斯特同車打芝士，趁熱食嗰陣可以做到超長拉絲架！

另外仲有經典扭紋薯條、手工啤酒同葡萄酒。手工啤酒係同紐約Brooklyn Brewery合作研製嘅，ShackMeister Ale。味道清香，唔太苦之餘仲有陣陣檸檬味，同啲burger好襯~

講開又講，今日個一日限定快閃店好多人，11點先開但8點已經有人開始去排隊，睇怕嚟緊4月尾正式開店嘅時候，都應該會出現人龍喇！

Shake Shack(香港店)
地址：IFC 4樓
預計開店日期：4月尾

文、相：Kar