下個月嘅香港國際七人欖球賽大賽，你準備好未？唔單止要準備好睇波嘅心情，仲要準備好你個大食胃，皆因有3間餐廳不約而同舉辦大胃王挑戰，限時之內食得哂指定套餐就免費！活動期有限，想挑戰嘅大胃王記得先預約呀。
 

Triple Happiness套餐　　The Butchers Club Burger

呢間餐廳嘅灣仔分店已經連續兩年得到米芝蓮街頭小食推介，今次連同另外三間分店一齊舉辦「Can You Kick It?」競食挑戰。餐廳將招牌Double Happiness漢堡再加多一層澳洲安格斯牛肉漢堡扒，總共三層漢堡扒、半融芝士加煙肉！如果你可以喺7分鐘之內食得完呢個Triple Happiness漢堡，再加鴨油厚切薯條同冰凍啤酒，原價$240嘅套餐就立刻免費！
 

9吋巨型欖球漢堡套餐　　Azure Restaurant Slash Bar

中環呢間酒店餐廳位於29-30樓，不過今次各位未必有時間睇靚景喇，皆因呢份欖球狂熱漢堡套餐嘅主角係一份長達9吋嘅巨型欖球漢堡，裡面有20安士安格斯牛肉、車打芝士、煙肉、生菜等材料，套餐仲包埋一份啤酒味紐紋薯條同兩杯啤酒。本身呢個價值$498嘅套餐就係二人份嘅，不過如果你一個人可以喺11分鐘裡面食得哂嘅，咁咪免費畀你囉！
 

巨型狂牛漢堡套餐　　Mirage Bar & Restaurant

灣仔呢間酒店餐廳新出一系列漢堡，當中呢款用咗800克牛肉製成嘅巨型狂牛漢堡亦有挑戰賽。一個人要喺40分鐘之內食完一個巨型狂牛漢堡連薯條，想搵多位幫手？得！二人挑戰就要30分鐘之內完成一個巨型狂牛漢堡加飲哂七支啤酒！喺限時完成嘅話，分別原價$666嘅一人套餐同$888嘅二人套餐立刻免費之餘，仲有張漢堡大胃王證書送返畀你。

文：Cathy