呢間新派粵式點心專門店最近喺尖沙嘴圓方開新分店，除咗有新店獨家菜式，今次仲帶咗四款新口味嘅小籠包畀大家，包括肉骨茶湯包、酸辣湯包、昆布柴魚湯包及清湯腩湯包，款款都皮薄餡靚多汁，味道都好有驚喜。
當中令開飯仔最有驚喜係呢個肉骨茶湯包，創辦人David Yeo來自新加坡，湯包以當地傳統藥膳肉骨茶為主題，並按照David家傳秘方炮製。加入丁香、八角同肉桂熬製肉骨茶，然後融入豬肉餡中，並裹上黃糖，以甜味中和胡椒微微嘅辛香，真係好似食緊肉骨茶咁！
清湯腩湯包以港式清湯腩為靈感，湯頭清澈，由牛尾、牛腩、肉桂香料、白胡椒同月桂葉熬製而成，牛腩香味濃郁。餐廳先將清湯反覆熬製超過八小時，再加入以牛腿肉碎同免治豬肉製成嘅肉餡之中。
重口味人士就可以試吓酸辣湯包，以餐廳自家製四川醬、新鮮辣椒、陳年香醋同免治豬肉製成餡料。湯汁微辣又幾開胃。
至於昆布柴魚湯包就啱口味較清淡嘅人，高湯以日本海藻昆布同燻柴魚乾熬成，再加入日式醬油同日本清酒，好有日式風味。
除咗小籠包圓方分店仲新出幾款新店獨家菜式，包括香煎麻辣鱈魚包、黑松露蝦餃、茄蛋米網卷、脆炸海皇卷及啫啫羽衣甘藍等，想食創新中菜嘅朋友要Bookmark啦～
不過留意返，四款新口味小籠包都係限定供應，想食要留意返以下供應日子：
昆布柴魚湯包：6月29日 – 7月5日、7月27日 – 8月2日及8月24日 – 30日
清湯腩湯包：7月6日 – 12日、8月3日 – 9日及8月31日 – 9月6日
肉骨茶湯包：7月13日 –19日 、8月10日 –16日及9月7日 – 13日
酸辣湯包：7月20日 – 26日 、8月17日 – 23日及9月14 – 20日
地址: 尖沙咀柯士甸道西1號圓方(Elements)1樓1028B號舖
文、相: Yanica、餐廳供應