唔少朋友都開始轉為上網買餸同訂海鮮，方便快捷仲可以有專人送埋上門，慳水慳力。最近都開咗好多新嘅網店，海鮮、牛扒、蔬菜、意大利食材等都有得一click就買，連即日出海捕獲嘅新鮮海野都有呢！
網上街巿 賣菜仔
早喺4月正式開張嘅賣菜仔，算係比較早期開始嘅買餸網店。兩位老闆阿Bell同Wilson都係演藝圈嘅幕後人員，因為見到當時疫情嚴峻，導致好多家庭出街買餸都有困難，於是就開設咗呢個網店，希望可以將多款新鮮蔬菜、生果、凍肉等，直接送到去佢哋屋企。
由初開業時只有廿款菜，到而家貨架上已經超過200款選擇，淨係蔬菜類都細分埋外國蔬菜同有機蔬菜類，另外仲有生果、湯包、冰鮮肉、本地新鮮肉、海鮮、豆製品、新鮮蛋、即食食品同麵粉小食等逾10類嘅貨品，絕對可以話係將個街巿搬咗上網。由於阿Bell嘅爺爺嗰代開始已經做緊蔬菜批發，所以佢哋嘅蔬菜款式都特別多，而且仲係每日新鮮到港，價錢貼近街巿巿價，仲包送貨，CP值高。
呢期特別推介當造嘅清甜多汁嘅韓國蜜瓜同爽甜嘅西班牙杮子。仲有新引入嘅日本蘭王雞蛋，係日本蛋中含菌量最低嘅蛋，蛋香味重，生食都得，雞蛋控實鍾意。另外有多款使用冷凍技術保鮮嘅即食食品，好似卡邦尼意粉、清湯蘿蔔炆牛腩等，只需要浸喺滾水度幾個字，就食得啦，非常方便而且味道調得唔錯，間中想偷懶一晚唔花咁多力水煮飯嘅就啱晒。
嚟緊10月10號開始，仲會有大閘蟹開賣添喇！開飯仔率先試食過，隻隻爆膏，相當鮮甜。
網站詳情（按此）
新鮮海野 Hungry Monkeys
受疫情影響，香港職業足球員歐陽耀冲未有波踢，又見到朋友仔搞網上賣菜嘅生意都好成功，於是就開咗呢間主力賣本地新鮮海鮮嘅網店喇。由搵供應商、搞網站、揀貨、處理海鮮等，歐冲都自己一腳踢搞掂晒。佢坦言好多嘢都係從未接觸過，邊做邊學。
本地新鮮海鮮都係由船家每日出海捕獲，再即日送到，所以價格同份量都比較浮動，但亦因為咁，先至夠新鮮！送貨去到客人手上時，啲海鮮都仲係好生猛。每隻蝦同波士頓龍蝦都係爆晒膏、鮑魚大大隻又彈牙，招牌蟶子王亦好鮮甜。另外都會有進口嘅阿拉斯加長腳蟹、日本海膽、A5和牛等供應。全部海鮮都會洗乾淨、處理好晒啲內臟先至送出，方便客人只需再進行簡單清洗即可打邊爐或燒烤等。
一般打邊爐都貪方便用湯包，但呢個網站仲可以訂埋湯底，好似白蘿蔔湯底咁，簡單得嚟就已經好清甜，淥完海鮮當埋湯飲都得！
網站詳情（按此）
新鮮牛扒 Steak With Us
牛魔王就要mark實喇，店主親自搜羅世界各地優質嘅牛肉，包括美國、澳洲、西班牙等地，再親自送貨，務求令大家安坐家中都可以嘆到靚牛！
部位選擇有好多，包括肉質平滑柔軟、肉味較濃嘅Flat iron；紋理豐富、油脂香嘅Short rib；油花少肉味濃，每隻牛只得一條，極為罕有嘅封門柳等。單點又得，揀個拼盤又得。建議燒烤嘅話可揀short rib，燒嘅過啲啲油脂會滲出嚟，好香口，而打邊爐嘅話，封門柳就最啱，牛味最濃呢。
想再豐富啲都仲得，買套餐加錢可以換到匈牙利鵝肝，輕輕煎一煎，配黑醋同多士就食得。
網站詳情（按此）
意大利食材 Bella Ciao
呢個網站成個團隊都係意大利人，由佢哋嚟為大家搜羅意大利嘅食材，特別係手工製嘅美食就最啱數啦。多款選擇包括意大利芝士、意大利粉、salami肉腸、酒類等，以下係其中幾款推介：
芝士控又唔怕羊羶嘅，必揀羊奶松露芝士，奶香十足，鹹鹹香香，配蜜糖或者佐酒都好襯。Strolghino di Culatello肉腸熟成時間短，味道細膩，好啱夾埋麵包一齊食。
想喺屋企整餐西餐都冇難度，Ravioli就幫到手，加啲醬汁煮又得，簡配芝士碎同橄欖油都得，啖啖都有牛肉碎香味，嚟多支Prosecco就perfect池啦。
網站詳情（按此）
文：Kar
相、片：Tom Li