今時今日,唔通想食榴槤都要等夏天咩?各位榴槤控唔使再sad啦,等開飯仔走遍香港,帶大家搵下近期新開嘅榴槤餐廳,保證365日都可以畀榴槤香包圍住呀~
西式榴槤甜品 榴槤芭
又鍾意食甜品,又鍾意食榴槤嘅話,呢間餐廳就可以滿足你兩個願望啦~佢哋主打各種榴槤甜品﹕榴槤批、榴槤布丁、榴槤拿破侖等!真係隔著個mon都聞到陣陣榴槤飄香呀!特別推介貓山王梳乎厘,淡淡嘅蛋香,同濃厚嘅榴槤味出奇咁夾!
超邪惡組合 老徐記芝士榴槤餅
行到呢間外賣舖門口就馬上聞到超香嘅榴槤味啦~成塊臉咁大嘅榴槤餅,用100%新鮮榴槤做,再夾著濃濃嘅芝士,超級勁邪惡呀!餅面勁脆,咬落去軟綿綿~佢哋嘅至尊招牌芝士榴槤餅,仲要比普通嘅多一半榴槤肉呀~
流心榴槤撻 琛榴槤(老樹)
圖﹕霖迪
榴槤,再加芝士真係perfect match呀,除咗有榴槤芝士餅,仲有貓山王芝士撻呀~呢間喺商場嘅小店主打嘅榴槤芝士撻,使用馬來西亞嘅A級貓山王,再配上北海道嘅芝士~千祈唔好掛住相機食住,要趁熱食先有流心效果呀!
文:Kiko