鍾意食日本菜嘅朋友又有新店可以去試啦！尖沙咀呢間新派日本菜餐廳主打壽司、蕎麥麵同日本酒，唔少食材都從日本直送，海鮮更係每日都有唔同種類空運到港。而且菜式加入創意元素，例如有日本菜少見嘅席前煙燻和牛，最啱相機食先。
 

SuSoShu全名係「寿司を食って、蕎麦で〆る。日本酒もある、長い名前のレストラン。」，意思係「食完壽司後以蕎麥麵作結。還有日本酒提供，店名很長的餐廳。」其實代表餐廳糅合咗壽司（Sushi） 、蕎麥麵（Soba），同日本酒（Nihonshu）呢三大主打，選擇多元化之餘又有齊傳統同新派口味。
 

特選壽司盛盒（八件） （$380）

特選壽司由廚師嚴選日本各地唔同嘅時令食材，例如拍攝當日就有真鯛、三文魚子、牡丹蝦、小肌（小鰭）、甜蝦、秋刀魚、帆立貝、大拖羅。大拖羅更係嚟自最有名嘅青森縣大間町！
 

吞拿魚三味刺身盛合（$318）

唔少香港人都特別鍾意食拖羅，呢份吞拿魚三味刺身盛合就啱晒。一份有齊魚子醬及赤身、吞拿魚蓉配三文魚子，同大吞拿魚腩，建議按呢個順序，由顏色最深、脂肪最少嘅赤身開始食，之後用紫菜捲起吞拿魚蓉享用，最後品嘗最為肥美、入口即溶嘅大吞拿魚腩。
 

虎蝦天婦羅蕎麥麵（$198）

選用日本蕎麥面，而且有冷、熱唔同口味，當中最受歡迎嘅有呢份虎蝦天婦羅蕎麥麵，外酥脆內彈牙嘅虎蝦天婦羅，同口感柔軟嘅蕎麥麵好夾。而且虎蝦天婦羅仲有唔同顏色揀？原來除咗原味之外，每日仲會有一款特色虎蝦天婦羅，用天然食材上色，例如紅菜頭、碟豆花、竹炭等，打卡夠搶鏡！
 

 

煙燻熊本 A4 和牛西冷（$498）

糅合西餐常見嘅煙燻方法，以木盒奉上烤焗過嘅熊本A4和牛西冷，再以蘋果木煙燻。打開蓋就見到白煙飄出，唔單止有視覺效果，聞起嚟同食落都帶有獨特嘅煙燻香氣。同時唔會蓋過牛肉本身嘅牛香，肉質嫩滑多汁。
 

餐廳供應超過50款日本酒，由常見嘅獺祭到相對小眾嘅選擇都應有盡有，等大家去唔到日本都可以品嘗到各地特色酒。如果平時比較少飲日本酒，可以點一份三盒試飲（優惠價$68），一次過試到三款清酒。
 

（左）東洋美人 純米吟醸，（右）熊本和王 A4 和牛壽喜燒 

新張期間仲有特別優惠：惠顧任何一款清酒乙瓶，可以用優惠價享$50享用熊本和王A4和牛壽喜燒一客！A4和牛油脂分佈平均，牛味濃郁，以壽喜燒醬汁煮過再點上日本雞蛋，滑溜香甜！
 

SuSoShu 
地址：尖沙咀亞士厘道17-19號1樓

文、相：Cathy