悠閒時光 9月份下午茶推介
2020-09-02

休息咗一輪,相信好多下午茶達人嘅戰意都出返嚟。咁就啱喇,最近有唔少餐廳都推出咗全新嘅主題下午茶,有啲以時令生果做主題,有間甚至連露營帳篷都出動埋!不過大家出動還出動,都記住要保持社交距離,小心防疫啊。

靜岡蜜瓜日式下午茶  櫻田日本餐廳 

夏天係蜜瓜嘅當造期,沙田呢間酒店仲要用日本靜岡蜜瓜創作出一系列嘅甜品,令到呢個日式下午茶甜上加甜。幾款甜品包括有蜜瓜銅鑼燒、蜜瓜果撻、蜜瓜奶凍等,前者加入蜜瓜果汁同蜂蜜製作銅鑼燒,夾埋紅豆,係唔同層次嘅甜啊;後兩者都可以啖啖食到果肉,夠滿足呢,當然唔少得原汁原味咁食啦,超多汁!

鹹點方面則主要係幾款特色壽司同卷物,包括金箔軟殼蟹卷、火炙帆立貝漢堡壽司、火炙和牛海膽壽司同黑松露玉子卷。另外會附送兩杯手調製作嘅蒸餾咖啡或柚子茶。

供應日期及時間: 即日起至11月30日 ,逢星期六、日及公眾假期  15:00 - 16:00
推廣價:$448 (兩位用),加優惠價$198享用汽酒一枝

港式點心下午茶  Holt’s Café

邊個話下午茶就淨係得西式同日式?尖沙咀呢間酒店就話你聽,港式點心都得!全新推出嘅下午茶包有7款點心,鹹甜都有,另有4款中國名茶選擇。就算係傳統點心都有花過心思,好似魚子醬蝦餃咁,加入魚子醬令鮮味更清爽突出;蛋撻亦加入燕窩,增加口感。另外仲有紅燒鮑魚燒賣、黑毛豬叉燒酥同驢打滾等。

茶種方面,同樣充滿特色,白牡丹茶本嚟都帶有陣陣花香,師傅仲要混入椰子冧酒同伏特加製作,口感甜得嚟仲好順滑。鳳凰蜜蘭熟香係帶有蜂蜜甜香、回甘強嘅潮州烏龍,需要加錢嘅1996年江城春尖更係極為珍貴嘅生普洱,茶葉愛好者實需一試。

供應日期及時間:即日起,每日14:30-17:30
價錢:$580(兩位)

香「龍」醉意下午茶   Le 188° 餐廳及酒廊   

 圖:餐廳Facebook

喺度嘆下午茶,仲可以嘆埋188度無敵海景!今次呢set下午茶,選用咗好多款色彩繽紛嘅食用花,賞心又悅目。部份鹹甜點仲加咗酒落去製作添,好似鴨肝慕絲配牛油多士及意大利氣酒啫喱同甜酒草莓芝士蛋糕咁,啖啖酒香。另外可以自選特級TWG茗茶作結,夠晒chill。

供應時間:每日15:00-17:30
價錢:$488 兩位(星期一至五)、$518兩位(星期六、日及公假)

城市露營     Uptop Bistro and Bar   

喺鬧巿都可以露營?尖沙咀有間酒店餐廳推出城巿露營主題下午茶,提供野餐盤、迷你燒烤爐同露營杯都不特止,仲特意喺天際花園搭建咗個營出嚟,就咁打張卡都型晒,打完卡仲要有得免費升級特飲呀。最正梗係有個士多啤梨朱古力火鍋啦,士多啤梨泡芙、雪糕雪米糍、新鮮水果等全部都同個鍋底好夾。鹹點方面則有意式火腿麵包棒、意大利青瓜大蝦串燒、忌廉芝士蘑菇釀雞翼等。

供應時間:每日15:00-17:00
價錢:$368兩位(星期一至五)、$408兩位(星期六、日及公假)

訂座優惠:下午茶時段85折或4人同行一人免費

 
五行五色排毒養顏下午茶  WOOBAR

下午茶唔單止靚,仲可以幫大家養生!九龍站附近呢間酒店就推出以「五行五色」為主題嘅排毒養顏下午茶,利用對應五臟「肝、心、脾、肺、腎」嘅「青、紅、黃、白、黑」五色食材,色彩繽紛又健康。好似薑黃鷹嘴豆泥配芝麻烤栗米伴麵包棒、牛油果大蝦栗米餅配紫蘇葉柑橘醬等。連甜品都運用唔同顏色嘅水果糅合Superfood,例如椰子配新鮮芒果及奇亞籽布甸,同招牌牛油果杞子朱古力布朗尼。

供應日期及時間: 即日起至10月31日 ,12:00-14:00(只限星期六、日及公眾假期)、14:00-16:00、16:00-18:00
價錢:$488兩位(星期一至五)、$638兩位(星期六、日及公眾假期)

 
FRUIT TEA SET  Afternoon Tea TEAROOM

 圖:餐廳Facebook

同樣位於尖沙咀,呢間嚟自日本嘅茶室為咗慶祝開業一週年,推出9月限定嘅「1st Anniversary FRUIT TEA SET」,一份包括用水果同日本鮮忌廉製作嘅鮮果三文治,一杯新鮮水果,同一壺加入果汁嘅Earl Grey茶。食完下午茶仲有「Sweet Ticket 」送,之後可以憑票換甜點!

供應日期:即日起至2020年9月30日
價錢:$148(每份)


文:Kar


關鍵字
下午茶
tea
尖沙咀
沙田
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
5天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11