尖東呢間商場有唔少新餐廳進駐，最近仲有呢間主打健康飲食嘅輕食飲品店，包括無牛奶成分嘅純素軟雪糕，低糖配方嘅心太軟、即點即做嘅亞洲風素菜捲等等。亦有唔少造型最啱打卡嘅精緻甜品，無論早午晚都總會搵到啱心水嘅選擇。
 

紅肉火龍果軟雪糕（$42）

DAMA最受歡迎嘅莫過於呢款純素軟雪糕，每日有兩款口味同扭紋選擇，無論係軟雪糕定雪糕筒都無牛奶同雞蛋成分，就算有食物敏感嘅朋友都可以大啖食。紅肉火龍果口味近80%都係果肉，紅色鮮艷得嚟仲食得出水果天然甜味！口感比較實唔易融，食落無一般素食雪芭嘅冰感，反而有啲似食緊軟雪糕版本個火龍果Smoothie，清新消暑。
 

越式檬粉素菜捲（$58）

輕食方面主打沙律同Wrap，Wrap更加係即叫即製，因為提早製作裡面嘅食材會出水，包好會壓至微熱，最啱怕沙律太「生冷」嘅朋友。而且配搭特別調配嘅醬汁，好似呢款越式檬粉素菜捲就用全素檸檬香茅醋汁，配搭羅勒葉嘅香氣的確甚有越南風味，彈牙檬粉同新鮮蔬菜亦帶嚟多款口感層次。
 

（左至右）抹茶戚風蛋糕、柚子戚風蛋糕、可可豆咖啡戚風蛋糕（各$72）

甜品亦相當花心思，三款戚風蛋糕唔單止造型精緻可愛，忌廉唧花下面嘅蛋糕亦相當鬆軟濕潤。抹茶帶淡淡回甘，柚子較為清爽，可可豆咖啡就係甜中帶少少苦味，三款都各有特色。
 

（左至右）茉莉花朱古力慕斯、藍莓啤梨熱情果蛋糕、香橙朱古力蛋糕、DAMA烈艷紅唇蛋糕（各$42）

慕斯蛋糕更加係有唔同形狀，特別推介DAMA烈艷紅唇蛋糕，其實亦係餐廳Logo，可以紅唇亦可以睇成兩個愛心！原來係代表品牌體貼入微，愛人類身心靈亦支持保護地球嘅心。烈艷紅唇係士多啤梨同蜜桃口味，切開裡面有蛋糕夾心，「自私食」完一件都唔會覺得膩。
 

DAMA心太軟（班蘭）（$38）

一個人食嘅甜品推介仲有心太軟，有鹹蛋同班蘭兩款口味，都係少甜配方，而且會即場翻熱確保流心效果。果然一切開班蘭漿就立刻流出，班蘭香氣自然清新。
 

 

士多啤梨洛神花茶（$38）

品牌之前喺中環歌賦街嘅店主打冷壓果汁，嚟到呢度新增埋果茶系列。好似呢杯士多啤梨洛神花茶同新鮮士多啤梨配搭清香洛神花茶，味道同樣帶酸所以好夾。
 

餐廳仲供應一系列沙律、湯、全素曲奇、希臘乳酪杯，咖啡亦可以配搭植物奶，係「跑素」或者想快速Grab & Go健康輕食朋友嘅好選擇。
 

選用100%用膠樽循環再造餐具，為環保出一份力。
 

DAMA
地址：尖沙咀梳士巴利道18號Victoria Dockside K11 Musea 4樓411號舖

文、相、片：Cathy