雞蛋，好可能係最受歡迎嘅食材之一。做法萬變，煎烚蒸炒乜都得，做出滑蛋溏心水波等等效果，百搭又多人鍾意食！將軍澳呢間新開嘅玉子造屋，就係以蛋為主題，即刻睇睇有咩蛋食先！留意返餐廳仍未正式開業，開業日期請密切留意報導！

呢間玉子專門店，用嘅當然唔係普通蛋，而係日本無菌蛋！雖然老闆唔係透露產地，不過佢哋亦試咗多款雞蛋，唔同品種大小，呢一款中碼無菌蛋，蛋味特濃，蛋黃較黃，質感杰稠帶黏性，做出來嘅半熟效果最好，本地雞蛋係做唔到架，而且無菌食得放心。

主打菜式「玉子之盛典」，可以自選三款煮法嘅雞蛋，包括早排好流行、旋風形狀嘅半熟玉子，用成3隻雞蛋同牛油製作，蛋皮夠薄身又香滑，過火會太老，唔夠時間又定唔到型，好巧師傅手勢架。另外兩款做法仲有以醬油浸足12 個鐘嘅溏心蛋同加入葱花嘅煎太陽蛋。

咖喱吉列豬扒飯 $78

另外就配上六款自製醬汁及配菜，包括有自家調製嘅咖喱、帶微酸嘅蕃茄咖喱、香甜味噌南瓜汁、滑溜嘅菠菜奶油、紅酒牛肉同洋葱蘑菇汁，配上9款唔同配料，必吃係8安士厚切炸豬扒，用英國肉眼製作，足足成吋厚，肉味濃郁。食材有6至7成來自日本，珍珠米已經加入咗飯索，食落鹹香。

菠菜奶油三文魚飯 $85

味噌南瓜汁炸蝦飯 $75

其他菜式有日式叉燒蛋飯，用日本豬脢頭肉自家製作，炆足8個鐘，配上半熟煎蛋，秘製甜豉油撈埋蛋線真係夠晒黯然銷魂呀！

日式叉燒蛋飯 $65

玉子漢堡當然唔係快餐店貨色，漢堡扒以牛肩chuck eye roll製作，肉味濃又唔肥，配上洋葱及日式調味料手打，最緊要當然都係個隻令欲罷不能嘅太陽蛋，放入口有爆漿效果架。

玉子漢堡 $75

鰻魚飯雖然冇蛋，但食法跟足名古屋名物Hitsumabushi，鰻魚厚身，先食原味，再加 wasabi、葱花等配料，最後再加木魚清湯，當茶漬飯咁食。

特盛鰻魚丼三食 $95

其他蛋類菜式仲有溫泉玉子卡邦尼意粉，甜品有梳乎里斑戟等等。菜式價錢親民，附近街坊或者學生要來試吓喇。

綠茶忌廉紅豆醬班戟 $70

玉子造屋

地址：將軍澳唐德街9號將軍澳中心地下B03C號舖

**餐廳仍未正式開業，開業日期待定。

文、相、片：Perrins