掛住台灣街頭美食？除咗週末飛一轉之外，而家仲可以嚟到呢間主打古早味台式小食嘅餐廳呀。佢地最近換咗新菜單，將今年大熱嘅地瓜球、台北人氣芋泥蛋餅、嘉義著名嘅四神湯等等全部帶到嚟香港！幫大家一解寶島美食嘅相思之苦。
 

地瓜球（$30）

阿元來了最近更換餐牌，一口氣推出八款新菜式，當中包括呢份可能係今年最熱門嘅台灣街頭小食：地瓜球！每日朝早人手搓成地瓜同紫薯麵團，即叫即炸後再裹上梅子粉。特別在佢地嘅地瓜球唔係空心，而係地瓜包芋泥、紫薯包紅豆兩款配搭。
 

原來係阿元想將呢款街頭小食變得再豐富啲，的確食落外面香脆帶少少煙韌，裡面柔滑香甜，口感同味道都配搭得唔錯。外面嘅梅子粉帶鹹香，夾得嚟又令味道層次更豐富。
 

芋頭起司蛋餅（$30）

唔少台北早餐店近年都推出芋泥餡，所以阿元自己研發後亦將芋泥蛋餅加入菜單！蛋餅皮由台灣直送，口感軟Q。裡面包住嘅芋泥用台灣最有名嘅大甲芋頭打成，特別香、甜、鬆、棉。同半融芝士嘅奶香加埋好有滿足感。
 

芋頭肉鬆蛋餅（$35）

另一配搭係肉鬆，肉鬆係阿元請人喺台灣用豬嘅後腿肉炒製而成，蓬鬆富肉香。用蛋餅包住一半香滑芋泥同一半肉鬆，一甜一鹹原來都夾到！而且濕潤嘅芋泥同偏乾嘅肉鬆啱啱好互相補足，香口而唔膩。
 

彰化肉圓（$39）

新菜單亦有古早味小食，好似呢份就係唔少在港台灣人最掛住嘅肉圓。由台灣直送到港，無添加防腐劑。半透明外皮用在來米粉做成，裡面包住香菇、竹筍、豬後腿肉再蒸熟。而搭配嘅係蒜蓉醬同甜辣醬，屬於南部偏甜嘅口味。肉圓皮軟彈，加上裡面嘅菇香同肉香，係一份香噴噴又飽肚嘅小食。
 

 

四神湯（$30）

冬天最啱飲返碗熱湯，呢碗四神湯係台灣傳統藥膳之一。呢度嘅版本就用薏仁、百合、蓮子、芡實、豬大腸等熬成，上枱前仲會加入餐廳自己泡嘅藥酒增加香味。趁熱飲藥材香突出，飲落亦帶甘味。鍾意嘅話仲可以加湯，好窩心！
 

阿元魯肉飯（$39）

店家最出名嘅魯肉飯亦嚟個「升呢版」，更大碗之餘亦加咗青菜同鹵蛋，亦即係由小食變成便當分量！一粒粒半肥瘦魯肉依然非常香口入味，連埋醬汁撈飯食滿口油香同肉香，唔覺唔覺就會食哂成碗。
 

萬巒豬腳（$45）

無骨鳳爪（$30）

兩款都由台灣直送，萬巒係南部屏東一個地方，當地豬腳相當有名，甚至仲有一條萬巒豬腳街！呢度嘅豬腳就係從當地直送，鹵至入味嚟到香港再加上帶甜味嘅蒜蓉醬，食落豬皮相當爽彈，豬肉亦夠入味，略嫌肉質有啲乾。而鳳爪更加鹵製三日，確保充滿膠質嘅雞皮吸收哂所有鹵汁，食落彈牙入味。
 

阿元來了
西環店：西環堅尼地城北街31號地舖
觀塘店：觀塘鴻圖道28號地下後座

文、相、片：Cathy