平時食開素同唔係食素嘅朋友想一齊食飯都要左揀右揀？大埔呢間新開嘅Cafe就供應多款日式同西式純素菜式，希望等大眾知道原來素食都可以好多元化亦好好食！好似日式媽媽定食，新豬肉肉餅加埋素芝士夠惹味；甜品檸檬撻同樣係純素，撻底嘅鬆脆度拍得住一般版呀。
 

V.W Vegan Cafe由兩姐妹同姐姐嘅先生三個人主理，供應嘅全部都係純素食品，食物會用素芝士，飲品就以豆奶或者燕麥奶嚟代替牛奶，糖亦會採用GI較低嘅龍舌蘭蜜或者較天然嘅楓糖漿，煮食時亦盡量少鹽、少油同唔添加味精。
 

日式媽媽（$88）

個名非常有趣嘅定食，六個項目除咗飯同湯，其他都會不定期更換。新開張呢期就有日本漬物、新豬肉芝士肉餅、涼拌秋葵豆卜枝竹，同甜品蜜桃寒天。食材都盡量選用有機或者本地出品嘅，好似馳名樹記鮮枝竹、豆卜，有機豆腐，有機麵豉。飯亦係用珍珠米，粒粒飽滿煙韌。
 

日本漬物口感爽脆，酸味醒胃。新豬肉芝士肉餅嘅新豬肉用日本醬油腌過，無論係味道同口感都真係幾似豬肉，中間仲有純素芝士，有牽絲效果！涼拌秋葵豆卜枝竹嘅鮮枝竹非常富黃豆香。蜜桃寒天軟滑Q彈，可惜略為過甜。
 

魔魔餃子（$58/6件，下午茶套餐$68/4件配$45或以下飲品一杯）

自家製作嘅手工餃子，有新豬肉芝士、新豬肉椰菜同新豬肉韭菜三款口味，前兩者可走五辛。煎成冰花餃子，夠香脆之餘，值得一讃嘅係水餃皮薄同時又煙韌。
 

餡料亦夠多，開飯仔揀嘅新豬肉韭菜餃子有好香嘅韭菜味。另一亮點係秘製辣醬！用逐粒揀過嘅辣椒加香茅等香料調配而成，辣得嚟又夠香，如果係食得辣嘅朋友應該會食上癮。
 

天然酸種包（下午茶套餐$68配$45或以下飲品一杯）

Sourdough係嚟自大尾篤一間手工製作純素天然酸種麵包嘅麵包店，邊位香脆而裡面煙韌而有少少酸味。配牛油果醬、自家製果醬、純素忌廉芝士等其中一款醬料。開飯仔就揀咗牛油果醬，軟滑得嚟仲保留少少果肉本身嘅咬口，口感豐富。
 

 

檸檬撻（$48，下午茶套餐$68配$45或以下飲品一杯）

最受歡迎嘅食物，開飯仔採訪當日下晝四點未到就賣晒喇。由本地一位純素媽媽製作，難得嘅係無落到雞蛋，但撻底食落口感相當鬆脆！檸檬餡味道清新，酸味突出而唔會嗆喉，加上點綴嘅薄荷葉更Refreshing。唯一缺點係撻底略厚，令整體口感有啲乾。
 

Latte（$45/熱，$48/凍）

特別搵嚟本地烘焙咖啡品牌Bulu Coffee，幫餐廳配搭一款夾到植物奶嘅House Blend咖啡，而且用嘅咖啡豆都係公平貿易或者直接貿易。Latte帶明亮嘅果酸，口感順滑。
 

Super Green（$58）

用羽衣甘藍、香蕉、奇異果、香茅等打成沙冰狀，飲落酸酸甜甜咁，蓋過羽衣甘藍嘅草青味，清新得嚟非常易入口。
 

裝修走田園風格，有唔少手工乾花裝飾，一角亦有售賣天然手工製品。皆因店主唔單止希望更多人嘗試純素，亦有關注動物權益同環保議題，餐廳用嘅外賣用品都係可生物分解，飲筒更加係可食用嘅大米吸管。餐廳亦同本地農夫合作以物易物，好似最近就用餐廳嘅咖啡渣換取農園嘅指天椒。
 

V.W Vegan Cafe
地址：大埔寶湖道3號寶湖花園商場2樓227F-06號舖

文、相：Cathy