日式卷物淨係得加州卷炸蝦卷？梗係唔止啦！中環呢一間新開嘅壽司卷物專門店Chotto Maki，有成十幾款配料任你揀，蟹柳配牛油果配青瓜配蘋果啫喱乜都得！任你發揮創意，有選擇困難症？亦可以揀預設款式，仲有好豪華嘅原片黑松露，好睇又好食！
三位加拿大回流香港嘅店主，因為見到美加都相當流行maki (卷物)，不過香港比較少專門店，於是開設呢間店。其中一位老闆Benson解釋：「其實加州卷係源自加拿大，不過因為有好多加州人食所以先叫做加州卷，當地用材料同香港有啲唔同，主要有蟹柳絲、牛油果，唔會有青瓜。」
卷物每一份有4大件，用上5至6款食材配搭。每份用上大約120克壽司飯，日本珍珠米已經加咗壽司醋、鹽及糖，放入木桶備用，有柯打先即叫即製，用日本紫菜夾中間包實食材。食材大約有30款，全部都係新鮮貨，蟹柳已拆絲撈沙律醬，魚生都係即切。
自選配料卷物可以喺八款主食之中揀一款，有三文魚、照燒牛肉或雞肉、天婦羅蝦等，配兩份蔬菜及其他配料，一份脆脆，包括有飛魚子、炸蒜片、天婦羅脆脆、櫻花蝦等7款，兩款醬汁，可以有成幾千款配搭！7款醬汁都係師傅每日親自調校，有黑芝麻醬、黑松露醬、芥末蛋黃醬等，仲有自家製蘋果啫喱。基本上點配搭都好味，唔會唔夾。
自選卷物 ＄78
如果唔想諗，可以揀7款預設款式。最受歡迎嘅604 Crunch有三文魚、沙律菜、露筍、甜蛋、天婦羅脆脆、櫻花蝦、芥末蛋黃醬同辣蛋黃醬，Beef-iyaki就係牛肉為主，Sea Monster仲有即炸天婦羅蝦。最特別嘅就係黑松露，有黑松露帶子碎、蟹柳、甜蛋、青瓜絲，飯外層會有紫薯粉，最後會用原粒新鮮黑松露磨成片放喺卷上，好霸氣！
604 Crunch $68
Truffle Roll $128
Sea Monster $68
卷物超爆餡，一啖實食唔晒，食得出食材新鮮，加埋醬汁、脆脆亦有唔同口感層次，份量十足，基本上女仔都會夠飽。男士就可以加份壽司、小食，就係又健康又豐富嘅一餐喇。餐廳唔算大，可以外賣買返office食。
地址：中環利源西街3號地下
文、相、片：Perrins