入實驗室仲撳緊急掣？入去飲茶啦！上環新開咗間台日式茶飲，成間lab咁，又test tube又針筒咁去製作一杯杯玩味茶飲，幾過癮。

呢間茶飲店由身兼電視旅遊節目主持嘅袁學謙（Benedict）開設，茶飲行實驗風，一方面利用實驗室嘅用具去製作茶飲，另一方面更有實驗精神，嘗試將啲好似九唔搭八嘅食材撈埋一齊，試下邊種配搭、邊條formula係work嘅。當然更加唔少得將自身旅行時嘅經驗加入menu啦。

好似呢款宇治抹茶拿鐵咁，選用嘅抹茶粉Matchæologist就係Benedict早前去倫敦行過一個巿集時發現嘅，「我望到佢個罐，『嘩，點解你個罐完全唔似日本好傳統嘅抺茶？』原來個owner係一個喺倫敦大嘅日本人嚟，想用新穎啲嘅方法將抹茶賣畀歐洲人。抹茶嘅來源都係宇治，同埋原來呢隻抹茶粉喺IG上好紅，有成14萬followers。」飲落唔澀之餘，仲有淡淡嘅花香，餘韻回甘。

另外兩款實驗果茶分別係甜中帶酸嘅桃戀櫻莓氣泡茶，同清甜解渴嘅焦糖旺鳳梨氣泡茶。前者係白桃加士多啤梨再加鹽漬櫻花嘅新穎組合，士多啤梨味道相當突出。除咗有真‧士多啤梨果肉外，仲有自家製嘅果漿同片片鹽漬櫻花喺面，紅白配打卡一流，製作最尾仲會以針筒加入士多啤梨汁，玩味性重。

至於焦糖旺鳳梨氣泡茶則係清幽嘅四季春茶底，以新鮮運到嘅菠蘿製作，每朝早都會切肉打成菠蘿蓉備用，另外會喺菠蘿面灑上蔗糖再以火槍去燒，令到面層有微微香脆口感。

四季春芝士奶蓋，則選用成本較高而坊間少用嘅大阿蘇牛乳製作，可以選擇要抹茶面定係岩鹽面。岩鹽面會以火槍燒一燒，就算攪勻咗，都會飲到啲微焦脆粒！奶蓋嘅奶香味濃，口感厚滑。

而周街都係嘅珍珠奶茶，話明係實驗風當然要與別不同。呢度嘅係燒韓國沖繩雙黑糖鮮奶珍珠。特別在於使用兩種黑糖，一種係日本嘅黑糖，較幼滑色澤亦較光亮，另一種係韓國嘅，味道相對甘甜啲。二者各取其所長，互相補足，混埋一齊就可以做到甜而不膩兼且有帶脆嘅效果。

 菲律賓芒果鮮乳沙冰，口感厚滑清甜

細細間舖，除咗茶飲以外，仲有甜品輕食提供。宇治抹茶蕨餅同樣使用Matchæologist抹茶粉製作，茶香味濃，抹茶控必愛！另外仲有宇治抹茶千層蛋糕、伯爵茶吉士忌廉檸檬醬夾心蛋糕卷等等。

+-x茶
地址：上環永吉街20號地舖

文：Kar
相、片：Tom Li