【3月自助餐推介】（三）「蠔」食海鮮餐

食自助餐最開心就係見到有乜嘢想食，都可以隨便食，食幾多都得，個肚裝得落就得。想知一個人全盛時期可以裝得落幾多海鮮？去食餐海鮮自助餐咪知囉，銅鑼灣有酒店有得食呀。

話明海鮮自助餐，梗係有成個冰鎮海鮮吧啦。巡個圈，有兩款即叫即開生蠔，分別係法國 Fine de Claire 蠔同美國 Minterbrook 蠔。前者外形修長啲，食落微甜得嚟帶有少少開水味，而肉質亦好滑，至於後者，睇落就大隻啲，食落都比較creamy啲。鍾意食蠔嘅朋友對於可以無限任食表示興奮！海鮮吧另外仲有好多膏嘅波士頓龍蝦、蟹腳、法國麵包蟹、青口同太平洋螺等等。

再行前少少就有個「即煮海鮮湯專區」。呢個區就好似平時啲自助餐執料請廚師淥麵一樣，喺枱面拎返自己枱號嘅牌仔出去就有得點。不過今次執嘅料全部都係海鮮：龍蝦、象拔蚌、蟹、蜆、蟶子、蝦……而煮嘅就唔係麵而係海鮮湯！仲可以揀飲經典法式海鮮湯吖，定係冬蔭功、清雞湯、喇沙或者白粥，大廚會另外再加埋鮮魚呀蕃茄呀之類嘅食材嚟熬個湯底。鍾意揀幾多款，每款揀幾多件都得，唔識預啲份量都唔緊要，開飯仔有少少貼士畀你，咩都執啲，蜆呢類嘅殼類海鮮執多幾隻，就成個湯都會好鮮甜㗎喇。

每位成人食客一入座仲會送半隻新鮮游水青龍蝦，或者一隻南非新鮮鮑魚㗎！點樣煮法一樣由你話事，龍蝦可以揀芝士焗、蒜蓉蒸、鐡板燒；鮑魚就可以揀鐡板燒、果皮或者蒜蓉蒸。每種煮法各有特色，鍾意濃味少少嘅可以揀芝士，而想食到海鮮原味多啲嘅，就可以揀清清地嘅果皮蒸。

咩主題嘅自助餐都好，都唔少得甜品區啦！呢度嘅甜品都有成十幾款咁多㗎，其中有款「三味芝士餅」係混合咗三種芝士嚟製，分別係金文拔、意大利軟芝士同忌廉芝士，細細件好幼滑又唔會太膩，芝士味仲好濃！另外除咗有個Häagen-Dazs雪糕櫃之外，每晚有兩款自助Gelato意大利雪糕可以揀返，有香蕉、菠蘿、藍莓、哈蜜瓜、士多啤梨等等味，睇下你去嗰晚係邊兩款啦。

呢間酒店唔淨止得夜晚嘅海鮮自助餐，逢星期六、日同假期仲有海鮮下午茶自助餐添呀，雖然款式就冇夜晚咁多，但都有加拿大雪花蟹腳、凍蝦、青口同太平洋螺食，仲有懷舊嘅車仔麵檔，afternoon tea嚟講都幾開心，一家大細嚟都一定可以各取各需呀。

詳情
餐廳：Kudos
電話：3980 3000

文：Kar

隨時接收最新資訊
讚好OpenRice專頁！