【2020中秋】健康抗炎 素食/低糖月餅之選
2020-09-14

今年中秋,除咗要團圓之外,健康都一樣咁重要呀!今年唔少品牌都推出咗低糖月餅,有別於油膩嘅傳統月餅,有啲仲要係純素添!好似南棗合桃月餅、檸檬柚子月餅等更加入咗抗炎嘅食材,希望各位喺嚟緊嘅中秋節,都可以健健康康食住月餅過節啦!

IEatKeto.HK  健康手工生酮月餅   

近年愈嚟愈多人嘗試生酮飲食法,即係高脂高蛋白質,但低碳水化合物飲食法。估唔到連月餅都有生酮版!呢個品牌新推出嘅生酮月餅,每個大約只係得260卡路里左右,兩款口味分別係鹹蛋奶皇同黑芝麻,口感軟滑,較傳統月餅細緻。

訂購網址:(按此)

龍景軒 南棗合桃迷你月餅

四季酒店今年新出嘅月餅,就啱晒送畀屋企嘅長輩們啦!皆因新口味「南棗合桃迷你月餅」,加入咗補中益氣嘅南棗。營養豐富就一定啦,最重要仲有抗炎、養血功效!絕對係疫情下嘅恩物!而甜中帶酸嘅南棗,再配上微澀嘅合桃,味道相當豐富呀~

The Cakery 四色純素月餅

唔好以為得冰皮月餅係七彩顏色!呢間純素甜品店推出嘅純素月餅,一樣咁colourful,夠晒吸睛呀!一共推出咗4款新口味,好似紫紅色嘅「紅棗果仁月餅」,就加入咗紅棗、杏脯乾同紅肉火龍果粉等製成;而黃色嘅「檸檬柚子月餅」,就加入咗檸檬、柚子同有抗炎功效嘅薑黃粉,絕對係睇得又食得呀!

Green Common 開心無花果燕麥月餅

呢間素食品牌一向主張健康、天然,月餅都唔例外!月餅禮盒包括兩款口味:「開心無花果燕麥月餅」同「團圓果仁紫薯月餅(藍莓味)」。前者加入咗無花果乾、開心果、燕麥,低脂低糖,仲相當有口感!後者外皮加入紫薯,內餡以鮮藍莓為主,混合6款果仁、果籽,糖份含量比傳統五仁月餅低34%,但口感、味道一啲都唔遜色呀!

香積廚素食館 純素抹茶、芒果月餅


呢間餐廳就推出咗3款全新嘅純素月餅,分別係「抹茶柑桔月餅」、「香芒豆蓉月餅」、「黑芝麻月餅」,睇個顏色就已經相當吸引啦。特別介紹「抹茶柑桔月餅」同「香芒豆蓉月餅」,前者選用日本抹茶,配以粒粒柑桔,夠晒fresh呀!而後者就用印度阿芳素芒果,將芒果蓉搓入白豆蓉,再加入呂宋芒果乾而製,夠晒足料,芒果控實滿足啦~

esca 鹹蛋巴馬臣芝士奶皇月餅

素食月餅就唔一定要係水果口味嘅!芝士月餅一樣可以好天然啦!呢款「流心鹹蛋巴馬臣芝士奶皇月餅」自上年推出,就大受好評!採用上乘食材,包括素食巴馬臣芝士、椰奶、日本雞蛋等。濃郁嘅鹹蛋流心配上奶皇餡,仲有素食巴馬臣芝士嘅鹹香!

李好純 山楂烏梅純素月餅

新派中式素食餐廳推出嘅當然都係純素月餅,仲要係無添加嘅添,每盒兩款口味,包括紫薯薑汁同埋山楂烏梅,健康得嚟又可以應節。

Buttercup HK 月餅禮盒送6粒小青柑普洱茶

食月餅最啱就係配杯熱茶解膩,八玥十五月餅禮盒有3款口味—流心奶黃、抹茶麻糬、陳皮豆沙共6個,並附送6粒小青柑普洱茶,慢慢食餅品茶賞月幾寫意。月餅係香港人手製造,不含防腐劑,並有減糖配方,健康唔怕肥。

餐飲券:85折 八玥十五月餅禮盒1盒 (6個裝) 送6粒小青柑普洱茶


更多【2020中秋合集】:
1. 台式流心奶皇、電車限量版月餅 早鳥優惠及限量預購精選集合
2. 齊撐本土小店ssss 自家製蕃薯香芋金沙月餅、馬拉直送榴槤冰皮
3. 酒醇茶香 甜魔必選朱古力月餅



文﹕Kiko
編:Kar


關鍵字
中秋節
月餅
純素
健康
抹茶
紫薯
芒果
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
5天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11