2019呢年有唔少新餐廳，由過江龍到本地薑，差唔多每日都有驚喜！今年開飯編輯繼續幫大家揀咗6間推介餐廳，由素食Cafe到破格主題火鍋店，高質蠔酒吧到手工啤酒Taproom，全部真心覺得值得返兜先介紹㗎！
 

深水埗素食新體驗　素年

素食喺呢幾年有好大變化，從以前通常第一時間諗起中式齋菜或者凍冰冰嘅沙律，到而家多咗餐廳加入Go Green推出唔同選擇。眾多素食餐廳當中推薦呢間走簡約清新風格嘅Cafe，由一對夫婦主理，日式定食豐富到唔講真係唔記得係蛋奶素，不可能漢堡包同吉列豬扒三文治分別用咗Impossible™ Meat同Omnipork新豬肉，連甜品都有全素揀，畀平時少食素食嘅朋友一啲新選擇。

►詳細介紹：歎豐富日式定食、Impossible漢堡 深水埗新開素食Cafe

夢想成真Cafe　Dreamer Cafe

週末喺香港想嚟個Café Hopping，中上環之外其實西環都係個好選擇。呢間Cafe位於港大附近，一入門口就會畀張長木枱同英文霓虹燈吸引，呢個空間不時會用嚟搞Workshop等活動，或者成班Friend坐喺度吹水傾下計一樣得。私心推介佢哋嘅All Day Breakfast，個自家製Earl Grey蘋果果醬真心無得輸，同編輯一樣係Earl Grey控嘅話記得點埋杯Earl Grey Choco！

►詳細介紹：嘆All Day Breakfast配伯爵蘋果醬！西環新開文青Cafe
 

青樓主題火鍋店　怡紅院  

講到有gimmick，中環呢間火鍋店真係可以爭認第一！餐廳以古時青樓為主題，踏入餐廳嘅時候，見到寫住怡紅院嘅紅色燈籠、模仿賣身契嘅菜單，唔講真係以為坐時光機返咗古代～食物方面破格又用心，好似湯底咁，有香濃蒜味避風塘炒肉蟹鍋、熬製6小時以上嘅養顏濃厚花膠雞鍋及麻辣鍋同芫茜皮蛋鍋合體嘅燈紅酒綠添！

►詳細介紹：去青樓滾？中環青樓主題火鍋 惹味避風塘炒肉蟹鍋+養顏濃厚花膠雞湯
　

高質素意式蠔酒吧　So, Oyster &Wine Restaurant

餐廳所有嘅海鮮都係親自同相熟嘅供應商拎貨，質素有一定嘅保證，而且店內有自己魚缸飼養所有新鮮海鮮同埋蠔，鮮上加鮮啊～每日都會有八款或以上嘅生蠔供應，老闆偏向選擇鮮甜爽口、重海水味同埋甜鹹味適中嘅蠔。另外pasta都幾出色，如意式細扁麵配西班牙大紅蝦，每一條意粉都吸收咗紅蝦味道，啖啖都係蝦膏味！

►詳細介紹：私家魚缸飼養海鮮、生蠔 北角新開高質素意式蠔酒吧
　

酒迷必到Taproom　TAP The Ale Project  

好多時有酒飲嘅地方，食物水準就未必太高，不過呢間taproom就唔同喇，無論小食輕食定係主食都相當有質素。開飯仔私心推介麻婆nachos，次次落親去都要食一碟，麻辣香口，食到停唔到口，送酒一流！如果唔食得辣嘅朋友仔，羊奶杏鮑飯係另一個推介，以羊奶芝士同巴馬臣芝士製作，羶香又拉絲，但呢碟一定要襯熱食啊！至於手工啤酒，21個TAP頭梗多款，IPA、stout定酸啤等點都有款啱你，呢度仲有咖啡添呀，啤迷啡迷都可以坐埋一枱，各有所得。

►詳細介紹：荃灣終於有Taproom！ 旺角人氣手工啤酒餐廳進駐南豐紗廠
　

自助燒肉+自助斟酒　牛魔  

燒肉一定要配埋啤酒咁食先至夠爽！呢間燒肉店就識玩喇，唔單止可以自己燒美國、日本等和牛，仲可以自己斟啤酒。成部機喺正隔籬，想飲幾多就斟幾多。介紹返啲牛肉，全部都靚牛嚟㗎，牛脷牛肩牛肋骨等部位都有，最推介係入口即溶嘅A4無敵霜降和牛小排，啖啖都係滿足感。

►詳細介紹：尖沙咀新開燒肉店 A4和牛 + 自助啤酒機
　

文：Kar、Cathy、Yanica
相、片：Kar、Cathy、Yanica、Tom