過完母親節之後就到父親節啦，作為乖仔乖女嘅你不如提早準備！父親節大餐嘅其中一個好選擇就係去食自助餐，因為無論你爸爸係大胃王、貪新鮮定食肉獸都一定搵到佢嘅「賣飛佛」，同時自己亦可以大飽口福。所以，Why not both？

牛魔王至愛　　花月庭

如果爸爸係牛魔王嘅話，咁呢間餐廳嘅自助餐就啱哂！牛肉美食包括海鹽燒澳洲M5和牛配帶子、竹炭和牛漢堡包、紅酒香草燴和牛尾、迷迭香汁煮和牛面頰、香茅蒜片安格斯牛肩粒等，唔同口味都試到。另外仲有12 吋巨型吉列咖喱豬扒同24 吋巨型箱押壽司兩款重量級料理，相機食先嘅記得要影低啦。

2016年6月18至19日　全時段6pm-11pm，首段5:30pm-8pm，次段8:30pm-11pm
價錢：每位港幣$428起(全時段) / $318起(首段或次段)
*首100客人預訂及繳付訂金可享優惠價

新「鮮」大滿足　　意廊

鐘情海鮮嘅爹地可以盡情食海鮮大餐啦！呢間意大利餐廳嘅父親節自助餐有即開生蠔伴自製雞尾酒汁同香煎鵝肝多士拼香檳忌廉汁燴鮑魚兩大王牌坐陣，另外仲有野菌龍蝦鮮鮑魚薄餅、扒和牛肉眼扒配黑松露燒汁同香煎石斑柳配番茄水欖醬。最尾食埋百利酒芝士蛋糕拼半熟咖啡芝士撻，愛品酒嘅爹地同鐘意芝士撻嘅你同時大滿足。

2016年6月19日　6pm - 11pm
價錢：每位港幣$398
*兩位起，6月3日前預訂可享7折，6月4日至12日預訂可享75折

一齊食好「西」　　城景閣

自助餐其實一個好處，就係可以試到唔同國家嘅菜式，而呢間餐廳今次以西班牙美饌做主題，供應包括西班牙芝士焗生蠔、龍湖豉椒炒西班牙蟶子、西班牙魚子醬伴煙三文魚、花尾蠆帶子西班牙焗飯等美食，仲每位奉送海鹽焗加拿大石蟹一隻，實行味遊西班牙。記得試埋父親節嘅限定甜品68%黑森林冧酒櫻桃啫喱蛋糕xMovenpick特濃咖啡雪糕呀！

2016年6月16至7月15日　6pm - 9:30pm
價錢：成人每位港幣$398，長者每位港幣$328，小童每位港幣$248
*出示城景國際Facebook電子優惠券可享優惠價

邊食邊保養　　儷廊咖啡室

雖然話「女人唔補好易老」，但其實男士都要進補一下嘅，呢間餐廳今次以花膠同燕窩做主題，就啱哂想滋補下嘅吃貨啦。有花膠海鮮周打湯、古法花膠蒸石斑、花膠扒鮮菇、雛菊花配蟹籽燕窩凍豆腐同菊花燕窩馬鈴薯意式蛋批等中西美食任揀。女士們亦可以試琉璃花配香梨火腿芝士沙律、白酒萬花凍批、血橙楓葉糖燒豬肋骨等以鮮花或者生果入饌嘅美食。

2016年6月17至19日　6:30pm - 9:30pm
價錢：成人每位港幣$438(6月17日) / $468(6月18-19日)，長者每位港幣$358(6月17日) / $378(6月18-19日)，小童每位港幣$298(6月17日) / $318(6月18-19日)
*須提早預訂

矜貴鮑魚盛宴　　Park café

一年先一次父親節不妨食豪啲！呢間餐廳呢次以創意鮑魚料理做主題，美食包括黑松露鮑魚雞絲腐皮卷、鮑魚鵝肝醬酥盒、鮑魚蝦膠魚柳卷伴巴馬火腿、鮑魚花膠燉雞湯等。另外平時自助餐當中非常受歡迎嘅生蠔海鮮拼盤同鐵板燒櫃檯亦有唔少好選擇，例如紐西蘭生蠔、加拿大雪花蟹腳、紐西蘭藍青口等海鮮，同香煎鴨肝、扇貝、串燒等。

2016年6月18至19日　6:30pm - 9:30pm
價錢：成人每位港幣$458，小童每位港幣$298

驚喜加分　　萬麗咖啡室

自助餐勝在有豐富選擇，呢間亦唔例外，回本之選海鮮有新鮮生蠔、阿拉斯加長腳蟹、蒸焗新鮮波士頓龍蝦、同即切魚生等。鐘意食熱嘢嘅亦有甘香鵝肝、蜜糖香茅烤蝦、韓式牛肋骨、迷迭香豬扒等鐵板燒。咁驚喜位係咩呢？就係父親節當日會有美食對對碰小遊戲，只要估中爸爸最鐘意嘅美食或飲品，就有機會免費額外品嚐到和牛、日本帶子、精選紅白酒等！

2016年6月19日　6:30pm - 10pm
價錢：成人每位港幣$588，小童(3 - 11歲)每位港幣$388