呢間餐廳位於中環蘇豪區，沿住半山電梯一直上，過左大館就會見到，入口位都有明顯指示，唔會太難搵。

從大門入去果一刻已經感覺到餐廳老闆用心既設計，客人會收到一塊恐龍牌，方便員工辨認帶位，即使座位要上一層都唔會造成混亂。

加上店入陳設都好用心，有好多隱藏恐龍，等緊野食既時間都可以周圍打下卡。座位設計係偏日式簡約風，店員會主動拎個箱比我地放袋，十分貼心，唯獨是佢地張櫈偏硬，坐得唔算舒服。點都好，呢度全日都限用餐時間90分鐘，座位既質素對用餐既感受都沒有大影響。

講返野食先, 打頭陣既係呢度主打既腐皮壽司。我地今日試左四款, 包括:

1. 牛油蒜香赤蝦 ($35)

赤蝦有少許腥味, 好在有牛油搭救，配上甜既腐皮，反而搶左蝦既鮮味, 食落主要淨係食到腐皮味。

2. 炙蟹膏厚燒玉子 ($32)

玉子做得夠厚(~8mm), 配上蟹膏既香味同沙律醬將甜味平衡左，整體不錯。

3. 辣味三文魚 ($33)

三文魚大大粒, 但辣味就唔係好食到, 都係被腐皮既甜味蓋過左鮮味，有點可惜。

4. 明太子芝士蛋黃三文魚 ($35)

明太子醬沒有驚喜，但三文魚依然新鮮，唔太食到芝士味。


對我個人而言, 腐皮壽司有點名過於實, 腐皮既甜味再加上醋飯既甜酸味已經足以將我既味蕾打爆, 其餘再加既料反而真係變左配角，一方面可以話佢突破左固有壽司以海鮮為主角既框框, 但另一方面都難免覺得心理有點不平衡。

可能對於嚐甜既朋友們會較為適合，如果你好似我咁係喜好比較香口鹹辣食物既話, 留返資金去食其它食物會較享受。

我地另仲試左以下三道菜式:

1. 特濃芝士雞肉烏冬 ($128)

芝士醬調得十分濃郁，奶同芝士既比例捉得好好, 保留到芝士鹹香既同時都加入左牛奶既幼滑。配上煮過既雞脾肉，配料真係無得頂。但係份烏冬真係敗筆，煮過左龍，完全無曬口感，如果店家可以自家手作或者用上較耐煮既烏冬種類相信效果會好好多。始終呢個價錢我會期望較高。

2. 西雅圖肥妹半份 ($74)

牛油果蟹柳卷物配上燒三文魚腩，魚生片應該係刻意用比較薄既切法，令到燒完之後做到入口即溶既效果。而成個卷物最令人驚豔既係佢個醬，聲稱係泡菜醬, 但係食落既味道係似泰式甜辣醬加上白醋既感覺，好開胃而且完全昇華左牛油果+魚腩既油香，真係有衝動去問大廚個醬係點整!

3. 蜜糖芥末炸雞 ($89)

本身叫黎當前菜食, 但竟比我意外發現左呢份人間美味。炸雞採用帶皮雞腿肉，切至一口大小，劣得外脆內軟，炸漿做到好薄唔會失真, 但依然保留到大量肉汁，火侯捉得非常好。另外醬汁係蜜糖芥末醬，已經預先幫你平均地掛左上雞肉表面，少許火辣少許酸甜既感覺，絕對令人想追住黎食。

最後當然唔少得甜品:

1. 奶蓋白玉烏龍($62)

賣相吸引，係其中一款熱門菜式，味道都唔差,。茶同奶依舊係好平衡既配搭，面頭有一串麻糬波串燒, 真係用火槍燒燶左，顏色豐富左之餘多左一份焦香，再搭上一層餅碎，整個配搭係外觀上加左好多分。食用麻糬波時可以沾點奶蓋配搭，否則只會食到燒焦的味道。

2. 甜品師今日的心情 ($78)

難得一場黎到, 當然要試下佢既驚喜菜式，今日係火炙綿花糖croffle。除左綿花糖好大粒，食到最後太甜呢個問題之外，都無咩野可以挑剔。Croffle做得香脆, 比起傳統waffle多左一種煙韌感，配上綿花糖更加有一種奇妙既化學反應，食到停不了。如果佢既甜味可以加入更多層次，相信又可以變成常設甜品了。



總括一下今次既體驗，餐廳及菜式既設計都感受到老細既用心，每一個地方都有花時間去變得與眾不同，就連一舊壽同、一舊炸雞、甚至餐廳既一個角落都唔會放過，用餐體驗係充滿驚喜的。

為食龍既主菜、壽司無小食、甜品等等做得咁好，但我反而會諗呢個情況不就是正正反映左為食龍不求大眾化口味，只求與別不同既特色嗎?

可能就係老闆呢種求變既心, 先吸引到咁多食客慕名而來。如果你只係想搵好食既食物，可能附近就已經有好多更好既餐廳，但係如果講到成個食野既體驗，為食龍的確做得十分到位，的確係一件藝術品。

今日第一次去食呢間聽講好出色既泰國菜，夜晚8:30去到門口，仲係見到人頭湧湧😫 大約有10幾人等緊位，本身都有諗住打退堂鼓，但係女朋友話想食，唯有照等…佢話一定值得喎😌 最後等咗唔使半個鐘就入得，比想像中快，餐廳設計比較簡樸，好有泰國小店既感覺，坐位比較窄少少，但勝在冷氣夠，太熱天時都唔會覺得辛苦。 我哋等位嘅時候已經諗定咗食咩，一入到去就落單，見侍應姐姐一路聽一路寫左張泰文既單比我地。 當我仲好好奇咁研究緊佢寫既泰文既時候，奇蹟發生左… 所有食物竟然喺5分鐘之內全部到齊曬！！😍 我地總共叫左5個菜式兩杯野飲，出菜速度快到好唔真實，完全食正無耐性既香港人口味，值得一讚。 偷偷望左入廚房，大約都有3-4位廚師開緊工，分工明確，確實專業。 食評如下： 1. 柚子鮮蝦沙拉 $42 沙律用左金柚、白灼蝦2隻、紅蔥頭、炸蒜，再配以泰菜必備既魚露底混合而成。金柚十分鮮甜、喺大量配料及調味料中都唔會顯得失色，同之前食過既泰菜相比，呢度既柚子沙律調味比較清淡，唔會有調味料搶過食材味道既情況，更能突出金柚既味道。真係要挑剔既就係隻蝦，份量較少以及灼得過左火，肉質唔彈牙，我個人覺得唔加好過加。 2. 泰式酸辣鳳爪 $41 水準同其他地方食到既相約，調味都係恰到好處，鳳爪爽口而且全部切到一口大小，唔怕彈到成身都係。口味唔會過辣，配料亦比較清新，唔會食到好口渴。 3. 雙拼豬雞串燒 $42 串燒睇得出唔係鐵板/碳燒，而係傳統泰國街頭既無漿油炸方式，比起平時食開既日式串燒少左份碳香味。之但係雖然佢油炸，但係炸既火侯唔錯肉質保持到嫩滑，即使佢豬肉串燒用左好難燒得好既厚豬扒肉，都唔會鞋口。串燒配有泰式沙嗲醬，但無咩味道，好在本身串燒炸得好，唔點醬都一樣美味。 4. 泰式炒粉絲 $45 用料同傳統嘅泰式炒金邊粉幾乎一樣，只不過係金邊粉換咗做粉絲。配料包括雞肉、豆腐乾、雞蛋、芽菜、蔥、花生碎，相當足料，粉絲嘅口感比較貼近香港常見既龍口粉絲，而且粉絲係全部剪碎晒，令到炒嘅時候所有配料同調味料混合得好平均，唔會有粉還粉、料還料既情況，呢個心思位又係值得一讚。 5. 泰式炒椰菜苗 $45 叫嘅時候純粹好奇泰式炒菜到底係咩一回事，本身都驚會伏左自己，但係一黎到就知岩我口味。泰國椰菜苗用上辣椒、蒜茸、豆豉去炒，帶細葉既椰菜苗掛汁能力超卓，一食落口香味爆發，唔會太鹹，而且辣勁十足，絕對會追住黎食！唔食得辣既朋友就唔好叫喇，可以食返較鹹香既馬拉盞。 6. 珍多冰 $20 同街邊飲到既差不多，甜度適中，椰香尚可。 7. 青檸梳打 $20 梳打水另上，糖漿預先加左入冰，應該可以要求少甜。青檸都好足料，唔會hea你比得半個檸。 成餐飯由入座到埋單雖然只係用左大半個鐘，但已經足夠比到好深刻既印象我—食物選擇多，出菜速度快，調味料同香料既運用恰到好處，性質比極高。比著喺市區既泰菜店，同樣食物應該要兩倍價錢，仲要無咁出色，呢啲舖頭真係買少見少，仲可以食到係我地既福氣。 唯一可以批評既可能係廁所衛生情況未算理想，但小店本來都無期望啲咩，唔影響食物質素就得。 非常期待下一次再訪，試埋其他小菜同甜品，例如泰式烤魚、泰式咖喱、芒果糯米飯、椰汁糕…諗下都覺得幸福☺️ 十分推薦仲未試過既大家，同家人朋友一齊黎呢度仔細品嘗正宗泰國味👍🏻