新開張當日就去左食，試業黎講還可以，係酸菜魚要等半個鐘，希望以後可以改善。 座位寬鬆，坐得幾舒服。 午餐跟包裝飲品同一個小食，呢個價錢非常抵食。 麻辣香鍋（田雞） 足料，有薯仔，蓮藕，黑木耳，田雞。 田雞炸過冇腥味，但唔夠入味。份量大，完全食唔曬。 酸菜魚（小辣） 超抵食，酸味夠，配菜多（萵筍，雞髀菇），魚肉都多 小辣大概係譚仔5小，加麻會更好味 薑味濃左少少，可能怕魚腥。我個人覺得薑可以落少啲 呢個價錢有機會一定會再食。

星期六日食太飽，星期一返工就想食清淡啲，清下腸胃。 九龍灣工商區好似得一間粥鋪，去到排兩個位。外面貼左靠得住既米芝連推介紀錄，令人對佢期望高左。 午市有套餐，不過全部都係客飯，粥餐同平時一樣。整體唔錯，乾淨企理上菜快，但離米芝連就好似有返少少距離。 蘋果紅茶：有蘋果香味。一坐低就有呢壺茶，餐牌有其他茶，但侍應話只有呢款⋯唔問都唔講聲。 去骨雞粥：雞既份量好多，粥都夠綿。可惜雞油同粥係分開，只係雞+粥，自己再撈一撈會好啲。雖然係去骨雞，其實都有少少骨，食既時候要注意。 雲吞撈麵：招牌雲吞，多蝦多肉，肉似肉碎而唔係肉膠，比較特別既口感。撈面乾爽。 湯就太咸⋯幾鮮味都飲唔落 腸粉：醬料自己落，想食幾多都得。腸粉質素正常，比較黏，冇層次分明既感覺。

收工後到旺角覓食，諗起鐵火堂夜晚有拖羅食，就佢啦 平日7點半唔洗等位，我比較鍾意食中拖羅，另外選了三文魚子，燒左口魚邊，燒三文魚腩同赤蝦。 中拖：厚肉，油香，唔腥 燒左口魚邊：超肥，可以燒耐少少，香味會濃d 三文魚子：量多，醬漬，送飯一流 赤蝦：還可以，細條，隔離有頭甜蝦好似好啲 燒三文魚腩：比較硬，唔係好肥 有麵鼓湯，略咸，湯料足。 店內比較凍，秋風起（冬風就到），日料鋪冷氣可以開細啲，畢竟都係食凍野。 茶水一般，略有漂白水味。 美食維持水準之餘，店舖既細節位可以做好啲。

請左一日假，睇完玩具展，去完GU，兩個百無聊賴既友仔不停諗食咩好。
時間尚早，好多排隊店都未出現人龍，難得唔洗排，梗係要去食人氣拉麵啦!（注意，排隊係要排係斜坡既，企得耐都唔舒服）

霸嗎氣氛好好，甚至比日本大型少少既拉麵鋪更有日本feel。（咁先開到係尖沙咀旺位既⋯）朋友叫既拉麵，雞湯拉麵比較少見，算係嚐新。雞叉燒煎過下，焦香脆口不會柴。雞湯比較淡同稀，同一般豬湯底相差甚遠，不適合想食濃汁掛湯既朋友。圖中可見，濃郁到略似湯羹，拉麵拉起仲有一堆湯汁掛住，拍得住沾麵。湯底濃郁，但與一般拉麵鋪（一蘭之類）唔同，冇豬油浮面，完全撈左落個湯底到。索索聲食十分過癮
味玉完整一大粒，咬開係流心既。
叉燒炙燒過，多了一重口味，減少油脂。代價係唔會入口即溶，不過又香口左好多。太乾身，辣汁冇咩特別，建議試沙律味可能清新d，搭配番濃郁拉麵

豚骨湯超好味！朋友都話下次要再黎食豚骨既

元朗出名大舊壽司，開左好多間賣拳頭大既加洲卷同其他壽司。不過試過一次派隊名店之後，我個人都係比較鐘意一啖可以食曬成舊既size。
幫襯左魚一幾次，佢既性價比令我決定帶埋朋友一齊再去食
鋪頭十分細間，7點後就要排隊，為左避開人流，6點半已經坐低係樓上。設計簡單舒服，屋細但枱少，都唔會覺得逼。

兩個人點左蟹子沙律先，蟹子非常之多，沙律就係青瓜絲加沙律醬，性價比之選！

另外仲食左以下壽司～點菜時發現餐牌靚仔左，已經唔係當初既黑字彩紙，心諗一定加左價。

不過咁，咩都貴左，唔加價又好難做既，埋單兩位$17x，食到飽一飽，抵！

雖然小妹生日過左一段時間，但同事都好有心補祝番。
收工後直接去The Stadium, book 左7點半，好似7點9左右先去到。

到左發現好多人等位，遲到都怕怕，侍應仲話有人攞左我地既booking（同名？），不過虛驚一場，都係優先俾番位我地。
餐廳非常之大間，weekday都好full，期待值上升。員工帶左我地去一排好似戲院櫈既枱，裝修同氣氛都幾好。
大家都好肚餓，急急腳叫野食。不過pizza都要等一陣，建議一坐低就可以叫左先（如果肚餓）。黑松露醬同芝士好夾，火箭菜不會苦，薄餅脆邊。可能好肚餓，又或者我太喜歡菇類，十分好味～

太肚餓，同事影都影唔切已經俾我地拎左兩件。有炸栗米球，辣汁雞翼，洋蔥圈，芝士條，魷魚圈同麥樂雞。芝士條太凍，可以拉長絲但太硬冇流心效果。4款醬汁，其中3個白色一個係沙律汁，仲有酸奶味、較稀的醬和一個酸度介乎兩者中間的汁。紅色係類似炸雞翼上的辣汁，唔係茄汁。大家平時都食唔到魚，叫左個烤爐魚食下。雖然唔係必定菜式，但質素好好，魚香略乾身，加上Creamy既青白醬好好味。底下是薯泥，可以一齊食，口感再豐富D

雖然性價比唔高，但係好適合聚會，野食質素亦不俗。好多人幫襯，最好訂左位先。

友人補祝小妹生日，讓我在EXP和慕茶中選一間。由於我對墨魚同貝類完全冇抵抗力，不用思考就選了有墨汁帶子意粉既EXP。
星期五晚收工去到大概8點，門外頗多人等待，但兩個人睇左5分鐘溜冰就入得。

細枱似乎都幾多，人少不用怕等位。

（美中不足係坐在近門口位，一開始人多有D嘈吵，食一陣先靜番，不過可以望到溜冰都幾得意呀）

講咁多⋯食野先燒帶子軟綿帶少許焦香，建議不要撈墨魚汁食，會搶走鮮味。重點意粉，濃黑creamy，意粉軟硬適中，容易捲起，超出我預期質素。分量不小。

注，一個人食可能會膩，女仔食要小心變黑唇，小妹好小心都黑左小小，最好帶定鏡仔。男仔就隨意啦⋯軟殼蟹好似有5舊，大大件，可惜不太熱有點淋，但味道還好。沙律好好味，侍應見我地唔食太得辣，主動開口話沙律汁另上，不過其實沙律dressing絕對冇譚仔十小辣，大可撈定先（接受唔到咸沙律可考慮汁另上）。沙律汁咸香中帶點魚露既鮮味，走酸甜路線，同沙律菜中既炸蒜片十分夾。

仲叫左杯大CCup, 入口似橙汁，餘香有草莓味，奇異果增加口感。不算很特別，就係一杯果汁，口渴都可以點黎飲飲。

食野途中睇溜冰都幾好，有情侶扶住手學，小朋友跌跌撞撞，業餘人士轉下靚靚圈，感覺新奇得意～

雖然好想食甜品，但係沙律真係太大份，為左唔浪費食物⋯⋯小妹唯有下次再食甜品！！