東廣場入邊有唔少嘅餐廳 同朋友最後就揀咗呢間拉麵店 呢度嘅裝潢係以日式風格去設計 仲有部懷舊遊戲機比客人玩添 睇餐牌發現食物價錢唔算太貴 而且追加$22就可以有一份小食同飲品 性價比幾高 另外呢度好貼心有得揀麵嘅軟硬程度 如果有唔食嘅配料都可以剔走 吉列蝦叉燒濃蝦湯拉麵 (加糖心蛋) (加粟米) (走炸蒜) 蝦湯入口好香濃 飲落無味精味 而且唔會好鹹 仲有3大條吉列蝦 粟米亦好香甜 仲有椰菜 葱 海草同木耳呢d配料 食落口感好豐富 人氣雞白湯叉燒拉麵 (加糖心蛋) 湯底係好鮮嘅雞味 同蝦湯一樣都係無味精味 兩碗嘅叉燒大塊得嚟都肥瘦適中 同埋呢度嘅糖心蛋係真係有流心的 滋味雞軟骨 雞軟骨炸到表皮好酥脆 份量都幾多 炸章魚球 章魚球食落唔會太粉 食得出粒粒章魚 吉列牡蠣 炸蠔食落幾鮮味 而且外脆內軟

好耐無食過炸雞所以同朋友嚟咗利舞臺呢間Dodam Chicken 發現呢度炸雞嘅種類好多 除此之外仲有烤雞揀 啱晒唔想咁熱氣嘅人食 辣卡邦尼Rose炒年糕 Rose姐係玫瑰醬 但其實係指用蕃茄醬同忌廉去炒 而炒出嚟嘅顏色偏粉紅色所以先叫玫瑰醬炒年糕 當中係無落到玫瑰的 之前一直想試下今日終於試到! 年糕好煙靭同炒得好入味 仲有煙肉 魚糕 寬粉等配菜 食落都唔會好辣 無骨黃金鹹蛋脆雞 (半份) 半份嘅份量已經好多 雞肉好嫩滑好juicy! 食落好濃鹹蛋黃味 而且無骨啱晒我呢d懶人食 一啖一舊好方便 醃蘿蔔 炸雞食耐咗會覺得有少少鹹 呢個時候附送嘅醃蘿蔔就大派用場 食落酸酸地咁好解膩 Yuja Yogurt Smoothie 柚子乳酪沙冰口感好順滑 飲落好清新 同埋好大杯!

最近想食pizza但又食連鎖店食到厭哂 上網見人介紹呢間Pizza Monster就決定嚟試下啦 呢度最出名就係限量供應嘅心型pizza 除咗有唔同種類嘅pizza仲有炸雞 意粉 焗飯等等 價錢仲好親民添! 怪獸多寶 (細) (千島醬底) (走洋蔥) 一上台就見到我心心念念嘅心型pizza 有青椒 辣肉腸 火腿 蘑菇 菠蘿 牛肉同豬肉係入邊 咁多饀料食落口感真係好豐富 同埋雖然係厚批但就算凍咗少少食個餅底都唔會好硬 仍然keep到好鬆軟 海鮮焗長通粉 (白汁) 本身呢款係焗闊條麵不過比我轉咗做長通粉 每一條長通粉都裹滿濃濃嘅白汁 入邊仲有蟹柳 蜆肉同八爪魚仔 檸檬蜜糖雞翼 (4隻) 雞翼烤到外脆內嫩 面頭再淋上檸檬蜜糖醬 酸酸甜甜咁食落好開胃 飲品方面叫咗凍檸茶同柚子梳打(少甜) 非常解渴!

見好耐無食過烤肉就同朋友嚟咗呢間試下 餐廳空間好大 座位好寬敞坐得好舒服 而且店員好有禮貌 會主動問洗唔洗幫手燒 又會幫我地換網同換碟 前菜有沙律 薯仔沙律 辣蘿蔔絲同醃蘿蔔 同生菜一樣都係可以任添嘅 第一次用麻醬嚟點烤肉食 呢個係店員推薦嘅醬汁 估唔到又幾夾 我地兩個人就叫咗個招牌烤肉二至三人餐 份量都幾多下 老太太特色肥牛 呢個係我同朋友嘅最愛 肥牛油脂分佈好均勻 相信無人會唔鍾意食 老太太特色瘦牛 牛肉味會比肥牛較出 而且瘦得嚟食落唔會太靭 燒汁橫隔膜 本身已經用燒汁醃好咗仲灑上咗芝麻係面 肉質幾嫩 雪花肋條 雪花紋理好靚 而且充滿肉汁 店員仲教我地可以點辣汁嚟食 豬五花 燒到外表金黃色 入口好焦脆 夾埋生菜食可以中和個肥膩感 錫紙金針菇 用錫紙包住燒 金針菇辣辣地好惹味 芝士粟米粒 一定要趁熱食 入口好”芝”味

係荃灣行完街經過呢間餐廳比門口嘅甜品display吸引咗 加上好耐無食過泰菜 所以最後就決定食呢間 6點半左右嚟到仲未洗等位可以直接入座 食到一半已經見到出面好多人排隊 建議大家可以預早少少嚟攞位 蟹肉魚子醬脆筒沙律 脆筒上面有滿滿嘅蟹肉 仲有魚子醬點綴 一口一個好過癮 造型亦都夠哂精緻 蝦頭油大蝦炒金邊粉 蝦肉大隻得嚟好彈牙 而且金邊粉好乾身唔會炒到黏埋一舊咁 蒜蓉炒通菜 通菜份量好足 而且落得幾多蒜蓉下 不過食到最後覺得有少少咸 D24樂園 (榴槤丹麥厚吐司) 吐司名符其實好厚身 上面有炸榴槤波波 榴槤肉 棉花糖同雲呢拿雪糕 每一啖入口都充滿住榴槤香味 好邪惡阿! 生椰楊枝甘露 (少甜) 飲落似椰汁西米露 仲有芒果粒同柚子係入邊 沙冰夠哂凍! 爆打香水檸檬茶 少甜 飲落有淡淡香茅味 溝埋香水檸檬個味感覺幾特別

朋友生日話想食西餐 之前同其他朋友食過呢間覺得幾好食就決定encore啦! 我地揀咗個精選二人套餐 對於2個女仔嚟講都已經好夠食 是日餐湯: 甘筍忌廉湯 有淡淡嘅甘筍味 飲落好creamy 前菜: 煙三文魚凱撒沙律 份量係好大碟 沙律面頭灑上咗芝士粉 仲有煙肉碎同多士粒 食落好開胃 北海道帶子松露野菌意大利粉 意粉好掛汁 每一條都充滿黑松露嘅香味 而且有3粒帶子同少量菇菌係入面 不過食到最後會覺得有少少膩 所以2個人share食就會比較好 主菜: 炭燒澳洲肉眼牛扒 牛扒方面我地揀咗7成熟 肉質幾嫩食落唔會鞋口 伴菜嘅焗薯連埋蛋黃醬同煙肉碎咁食 感覺幾有驚喜 是日精選甜品: Movenpick朱古力雪糕 甜品有得揀日式芝士餅或者雪糕 但食到最後我地2個都已經好飽 所以就揀咗雪糕 希望下次有機會試個芝士餅 飲品方面就叫咗冰果茶同凍檸檬茶(走甜) 冰果茶飲落係水蜜桃紅茶 凍檸茶茶底唔錯 2杯凍飲都好解渴

今日去開荔枝角做野 住呢頭嘅同事就話帶我去佢經常食嘅餐廳 位置係d2 place隔離嘅工廈 餐廳裝修偏浪漫風 有唔少嘅乾花同吊燈擺設 好啱女仔嚟打卡 而且職員服務態度好好 見我地兩個人會主動問洗唔洗比碟仔我地share 呢度嘅lunch menu除咗主食之外仲會包埋是日餐湯同野飲 甘筍湯 口感好順滑 飲得到一粒粒嘅甘筍 蟹肉蟹籽忌廉汁意大利粉 呢個係同事極力推薦 一上枱已經聞到好濃郁嘅蟹味 而且蟹肉份量一d都唔吝嗇 食晒成碟都唔會覺得膩 燒美國豬肉眼扒伴牛肝菌忌廉汁 平時牛扒就食得多 豬肉眼扒比較少食 外皮煎到金黃色 賣相好吸引 食落好厚肉同有好香濃嘅豬味 伴碟就有薯角 蕃茄 紅蘿蔔等等嘅配菜 Mixedberry smoothie 莓果沙冰酸甜適中 好啱而家咁熱嘅天氣飲! 凍檸茶 口感清爽

同朋友又嚟咗大埔呢頭覓食 經過見到呢間餐廳個名幾得意叫Hi Tea茶舍 感覺好似同一般茶餐廳唔同所以就決定試下佢啦 呢度食物種類好多元化 有常餐 焗飯 蛋包飯 pizza 意粉同意大利飯等等 就連甜品都有 感覺好似去咗cafe咁 濃蝦湯海鮮湯飯 (走洋蔥 走芫荽) 湯底係好濃郁嘅蝦味 但又唔會過咸 有青口 大蝦 帶子 魷魚圈 蜆係入邊 d飯索哂湯汁食落好惹味 如果唔想食湯飯嘅人呢款亦有得轉做扁意粉 鮮蜆白酒煙肉蒜香天使麵 呢碟天使麵嘅份量好大份 有蜆肉 菇同大量嘅煙肉 食落唔會太油 但白酒味就唔算好出 蒜香雞翼 雞翼炸到表皮好香脆 而且幾大隻下 雖然只係跟餐追加嘅小食 但幾有驚喜 芒果雜果生椰乳特調 飲落去係芒果椰汁同乳酸嘅混合體 呢個組合又幾清新 玫瑰普洱茶(樽裝) 幾濃玫瑰味 不過有少少蓋過咗茶味

最近睇返之前去韓國d相搞到突然好想食韓國野 所以最後同朋友就嚟咗呢間hoo韓國包車 呢度嘅環境設計係根據韓國路邊攤為主 用咗唔少霓虹燈做裝飾 好有氣氛 再一邊聽住kpop一邊食野 真係好似置身係韓國咁 街頭魚糕串串(半份) 朋友好鍾意食魚糕串所以叫咗半份嚟試 入面有5串魚糕串 煮到勁入味嘅白蘿蔔同其他款式嘅魚餅 如果係冬天食完肯定成個人都暖笠笠 卜卜脆炒豬脆骨拼拳頭飯 豬脆骨入口脆卜卜食落有少少辣 拳頭飯充滿麻油香味 呢個配搭一流 薯仔煎餅 海鮮或者泡菜煎餅就食得多 第一次試薯仔煎餅 外皮煎得好脆身 食得出一條條嘅薯仔絲 芝士蟹膏蟹肉蛋捲 蛋捲食落好滑溜 入面有芝士 蟹肉同蟹柳 面頭仲有蟹膏點綴 食落有多重口感 飲品方面就叫咗粒粒葡萄汁同熱情果梳打 飲落酸酸甜甜咁好解膩

次次行美麗華都見到呢間食burger嘅但一直都無試過 今日行完街諗唔到食咩又見到佢就決定試下啦 一入餐廳見座位好闊落 裝修係以工業風為主 好有特色 Burger亦有好多唔同款式 有牛肉 魚 海鮮 雞 鴨類 最驚喜嘅竟然有素肉同素類 咁多款總有一款啱你! 另外可以用qr code落單 有唔食嘅配菜都可以自己選擇 而且burger一上枱就分開咗兩份 方便大家同朋友share嚟食 蜜糖芥末大烤菇煙肉牛肉漢堡 (走番茄 走洋蔥) 牛肉好厚而且充滿肉汁 牛味都幾出 大啡菇食落好juicy同好重煙燻味 煙肉都煎得好香口 配埋蜜糖芥末醬感覺好滿足 菠蘿燒烤醬牛肉漢堡(走芝士) Burger一上枱係好大個 朋友都認同牛肉一樣厚身又多汁 菠蘿甜甜地成個配搭食落就無咁膩 直薯條(套餐) 薯條係我最鍾意嘅粗薯 熱辣辣食落好重薯味 唔洗落茄汁都已經好好味 凍榛子朱古力 榛子味幾突出 不過甜咗少少