去過兩次，但坐低食嘢只有一次。 首次去係下午四約五點，室內還未有客，可以選擇室外，被告之要最低消費$150（happy hour 時段），無所謂，飲下嘢加小食都要二百蚊。侍應態度一般，可接受嘅。啤酒正常，但個炸雞，睇顏色可知炸嘅油應該好耐嘅，所以炸成頗深色，食落係乾而無味，無調味，只係面頭有少少甜嘅汁醬，整體真係好差，可能普通小食店、連鎖快餐店都好質素過佢。 第二次有外國朋友想歇歇腳去飲下啤酒，今次侍應態度就差少少，有空枱都唔畀坐，似乎要留畀熟客？ 但咁嘅食物、服務質素，好懷疑會有幾多熟客。最後朋友都好詫異侍應嘅態度，所以都係走人，其實有好多選擇。 呢度價錢中上價位，地點係好嘅，浪費咗個位置，米芝連嚟講真係好低廉格局同質數。

幫襯過幾次，有日頭亦有夜晚，個景同服務都無得彈，食物中上，價錢正常，如果Happy Hour 飲一送一係好抵嘅。我都試過幾間阿根廷菜，呢間嘅牛扒唔算最好食，偏向燒得燶啲，所以要order rare多啲先好，不過肉味係濃嘅，其他食物如沙律好有水準，之前有芒果蝦蟹肉沙律好大碟，凱撒沙律佢有加鯷魚仔，幾特別，provoleta 烤芝士好咸香，bar bites 之中pizza 算最抵食。逢星期五六都有live music ，另外有播波，氣氛非常熱鬧，都好多熟客、遊客，幾國際化，似去咗外國咁，所以要用英文溝通嘅。

見到新開無耐，試吓掂唔掂。九點幾十點食宵夜，叫咗雞粥、椒鹽鮮魷、肉鬆四季豆、乾炒牛河。粥比較稀，雞無乜調味，當然唔係生滾粥，無乜期望。但個鮮魷切十字花，脆漿唔厚，賣相好靚，但一咬落去，完全唔使𡁻，已淋之之，完全無味，預咗唔係新鮮生猛魷魚，但似係雪咗好耐，喇到淋曬，椒鹽亦都冇乜味，好失望。牛河同四季豆比較正常，但唔算好鑊氣。唯一可取係價錢算合理，呢方面冇伏，食物真係強差人意，希望日後有改善啦，不過應該唔會再嚟，尖沙咀都有幾檔幾好食，有得選擇。

外國朋友來港，0+3之下已經困咗四日，所有手續、防疫措施令佢好煩，琴日終於轉藍碼，今日諗住去食晚飯遇啱睇波，於是求其搵間見有波睇就入去，地方好迫窘，唔算好理想，不過都想幫襯下本地店。朋友原來唔識將藍碼scan返去安心出行，剩係cap圖，於是個男侍應一見安心入面唔係藍碼，就好唔耐煩，朋友今日已係第六日，亦喺政府網站download咗個藍碼，但個男侍應唔聽人解釋，一臉不悅不耐煩咁對住外國人，令人覺得係趕佢走。外國朋友好嬲，佢話點解當佢係乞食咁。其實酒吧餐飲業係水深火熱之中，有咁嘅「服務」只係會趕客。令到外國朋友咁不愉快，真係以趕客之道唱衰香港！

多年前去飲茶，印象不錯，最近再去，點心自製，都係幾啱口味，蝦餃、叉燒腸、排骨、鳯爪、春卷都好過大型連鎖酒樓，鳯梨酥，好似自製嘅，熱熱地嘅，好正。星期六一行七人去食晚飯，都好滿意，價錢合理，用料都新鮮，冷盤蛋黃片肉，有特色，咸蛋黃好香，蒜片黃花魚好大條，多肉、少骨，味道調得好，沙茶牛仔排、滷肉、油鹽水海瓜子、屏東小炒都有水準，樟茶鴨、台式蒜香腸、炒A菜、新竹炒米粉都正常無伏。叫咗十樣嘢，每位$220，夠食又好味，值得捧場支持。

好多年無嚟，以前都係同外國朋友或回港同學嚟食，而家好多酒樓都有填鴨食，不過都好參差。今次再嚟北京樓，裝修過係好啲，估唔到全埸滿晒。填鴨水準保持到嘅，唔會太多肥膏，皮脆加埋皮出片鴨肉，一咬之下咇少少鴨油，夠香而唔會好膩，薄薄餅皮有爐烘住保暖，而且有蒸氣令個皮保持濕度，每塊皮有一張墊紙，好方便唔怕撕爛。呢啲細節加分嘅。我哋三個人食半隻鴨，份量好足，餅皮都夠多，靑瓜大蒽唔夠可以添加。其他菜式，份量幾足，味道唔錯。半隻鴨、雞丁、牛肉、炒飯、炒蒿荀，連酒水，一千蚊左右，合理價錢。老字號企得住，難怪唔少捧場客。如果一班朋友，訂窗口位，睇埋夜景，應該幾正。

經常經過，今日早收工有時間，本想喺晚飯前飲兩杯食下小食。五點鐘，餐廳入面同出面只有幾枱客，但侍應話只可外賣，用紙杯裝酒，自己出去海傍地方飲，或坐低喺門口食下雪糕之類，全部已訂位。講真，根本10%嘅客都冇，大可話七點前要交檯畀已訂位客人，可以畀walk in 客試吓幫襯，咁先儲到客人。所以無緣光顧，可惜可惜….