大病康復後, 終於可以約朋友大吃一番, 當然要食放題先夠滿足啦!
揀咗旺角嘅放題集中地兆萬中心13/F嘅一間主打韓燒烤肉餐廳---平昌, 一打開lift門為開放式座位, 環境裝份樸素, 幾有韓國地道風味。到店目測有已有7成左右滿, 但都唔會話好油煙, 抽風做得幾好。晚市分別有三個價錢套餐選擇, 我地就揀咗個中位價---世子御膳。入座起限時120分鐘任飲任食, 店員先送上韓式泡菜同埋大豆芽, 再注入爐邊蛋。所有食物均scan QR code落單, 食物上檯速度快, 而且當晚冇漏單。肉類選擇都幾多, 有齊牛、雞、豬、海鮮, 仲有數款韓式料理。

生蠔算不上肥美, 但味道唔腥。
而帶子同埋帆立貝都冇調味過, 主要吃出原汁原味。肉類方式order咗多款牛, 嫩紅新鮮, 烤嘅時候滲出鮮紅血水; 牛舌烤至金黃, 有咬口。芝士腸炸至爆開, 流出流心芝士, 美味。

雞翼醃得入味, 雞腎又爽又有咬口, 雞軟骨好爽脆, encore咗好幾轉。蝴蝶蝦配他他醬: 蝦幾爽, 配上鹹甜他他醬, 提升味道。醬油蟹: 蟹肉偏林又入味, 不過嫌過於鹹。醬油蝦: 原隻蝦去醃, 都好入味, 蝦肉爽口, 而且冇醬油蟹咁鹹。
炸物叫咗個一口炸芝士, 外層鬆脆不油, 芝士奶酪味香。

忌廉蟹肉薯餅: 外層同樣鬆脆, 入面忌廉蟹肉餡料比例少, 還好冇咁易飽。海鮮煎餅: 雖然海鮮份量少, 什至唔太食得出係咩海鮮, 不過煎得幾香口。海鮮豆腐湯: 熱得滾下滾下上檯, 微辣鮮香, 幾開胃。最後仲有韓式雪糕做甜品。

假日同朋友做完gym, 體力耗盡, 就係沙田新城市廣場搵野食。太耐冇食過車仔麵, 就去咗永年呢間茶餐廳。正好6點轉咗dinner menu, 選擇更多。除了招牌主打嘅車仔麵, 仲有懷舊鐵板餐、滑蛋叉燒系列、番茄豬扒蛋飯等…選擇多多。
車仔麵有自選組合套餐, 但如果想豐富、大大碗咩都想要d, 主打三款車仔麵組合就最perfect喇! 可自選麵種同埋調味。


永年大碗麵:
揀咗油麵, 係極為飽肚嘅一款麵, 湯底濃郁, 配菜豐富, 包括有豬腸、魚蛋、蘿蔔、豬紅、豬皮、雞翼、雞翼尖、魷魚、紅腸、時菜。豬腸厚厚的, 帶些少油脂, 口感爽彈; 豬紅彈滑; 雞翼、雞翼尖同樣好林好入味; 魷魚爽口; 不過魚蛋就唔夠彈牙。男神麵:
有齊牛內臟嘅車仔麵, 包括有牛柏葉、牛肚、牛丸、牛腩、豬腸、蘿蔔、時菜;
所有配料都索咗湯汁, 好入味。 另外我地仲encore咗個小食---豬三寶
包括有豬紅、豬腸、豬皮, 份量都唔少。懷舊鐵板餐質素亦唔差, 鐵板熱辣辣、滋滋聲上檯, 可自選汁醬, 揀咗黑椒汁,
淋上去, 散發香噴噴,
美國安格斯封門柳: size有手掌般大, 揀咗五成熟, 肉嫩多汁, 肉質有彈性, 配上黑椒汁, 好惹味。另配有脆卜卜麵, 食完成個set好飽肚。套餐跟餐湯, 自選升級了--酥皮湯羅宋湯
酥皮鬆脆, 唔會太厚, 羅宋湯味道偏淡, 甜酸開胃, 不過濃返d會更好。飲品方面就揀咗港式懷舊嘅紅豆冰, 另一杯係抹茶紅豆冰,
紅豆綿密, 甜度剛好, 抹茶配練奶絕對係perfect match! 好飲!

天氣唔隱定, 呢幾日又凍返, 打邊爐癮即起, 唔想自己又買又洗, 出街食就最好不過, 特別係火鍋火題, 唔洗就住就住。
之前同同事去過佐敦呢間大鍋口, 價錢唔貴, 兩小時任飲任食雞煲+火鍋, 火鍋配料選擇多, 好過自己買料返屋企打邊爐!
餐廳環境企理, 座位闊落, 通風好, 唔會感覺焗促。 自由混醬: 飲品自助, 全部任飲。 入座隨即送上麻辣雞煲, 無辣度選擇, 辣度超微, 大部份人都可以接受到。
雞件已預熟, 上檯好快滾起食得, 雖然雞件未至於嫩, 不過微辣汁醬配上大量配料, 包括有洋蔥、乾蔥、辣椒同芫荽, 味道都唔錯。 之後自選湯底打邊爐, 侍應將雞煲換上了另一煲湯底, 我揀咗沙爹湯底, 沙爹味幾出, 好香。 首先送一碟安格斯肥牛(非任食), 色澤嫩紅, 油脂分佈均勻。 牛魔王嘅我期後再點任食項嘅手切肥牛, 質素亦唔錯。 肉類、海鮮、丸類、蔬菜, 款式多, click order紙落單, 因應人數而配給, 全晚都冇漏單。 海鮮:
海蝦串, 蝦肉鮮味爽口。
魚雲新鮮, 充滿魚香味。
鮮蝦滑: 微彈, 口感好滑。
白鱔片冇骨, 爽口有鮮味, 大愛!! 魷魚、牛柏葉好爽。
鵝腸雖然連帶多餘油脂, 不過厚身幾爽。
粟米清甜。 皇帝菜同埋鮮腐竹索咗湯底味道, 更為美味。 甜品有兩款口味軟雪糕, 極之香滑, 仲可以自加配料。

今晚又要OT, 同同事五點幾係太古坊附近來個速食, 再趕返公司繼續駁殺。
今日終於食到呢間一直好想試, 主打鯛魚湯底嘅餐廳,  餐廳地方整潔企理, 六點前仲有午餐、下午茶等套餐供應, 更加抵食。海鯛魚片烏冬套餐 (配帶子刺身、罐裝可樂)
奶白色湯底, 面層佈滿了多片無骨海鯛魚片、木耳絲, 豆卜絲、海帶等配料;
湯底魚味濃郁, 富有魚鮮味, 烏冬軟淋, 稍為吸咗湯底精華, 啖啖魚鮮味, 海鯛魚片夠滑, 而且啖啖肉。 套餐配有兩片帶子刺身, 肥美, 鮮甜味十足。

三文魚腩 (2切): 非常厚切, 口感爽, 充滿魚油香。豬軟骨鯛魚湯烏冬:
同一鯛魚湯底, 放上了調味過嘅豬軟骨, 令湯底多一點豬肉味, 豬軟骨有少少肉相連, 軟骨微微爽脆。另外套餐再追加了白桃梳打。

相約同事LUNCH到康怡AEON食lunch, 順道辨年貨, 無意中發現AEON入面新開咗間沾麵小店。設有堂食角落, 無加一服務費。 提供多款沾面、拉麵跟丼飯,  每款沾麵底跟食材都一樣, 都包括有兩片龍平自家製叉燒片、半隻半熟蛋、筍、蔥。 不同之處在於每款湯底。
沾麵以石鍋滾熱辣上檯, 製作需時, 所以點單後店員都給我取餐提示器, 可以到堂食角落靜待。
石鍋中嘅沾汁散發陣陣香氣。 極上3L廣島蠔龍蝦沾麵 HK$118
3L廣島蠔size果然好大隻, 好肥美, 吉列皮超香脆, 一咬蠔味juicy濃郁, 正!! 龍蝦沾麵湯底濃郁, 甘香味濃, 易掛汁, 湯底中仲有好幾粒爽口嘅龍蝦肉。 沾麵為常溫, 麵質彈牙; 自家製叉燒片有驚喜, 唔會過於油膩之餘又幾嫩。 特製赤海老沾麵 HK$79
呢款湯汁鮮香回甘, 蝦膏味突出, 還有些少櫻花蝦, 更顯香氣。 沾麵都附上凍煎茶, 正好食完沾麵為口中降溫。

下晝係銅鑼灣見完客差不多入夜, 就打算係附近隨便搵間餐廳食埋dinner先歸家。
專程走到餐廳集中地嘅百德新街, 就比我發現到間有唔少配搭嘅burger餐廳, 吸引咗我入去一試。餐廳設有室外同室內座位, 安排入座後自行scan QR code落單。呢度供應嘅burger款式應有盡有, 豬、牛、雞、海鮮、素食都有, 滿足不同食客口味, 另有多款小食、coffee、果茶、啤酒等等….
【Café Mocha】HK$38
面層奶泡打得幼滑, 幻得幻失, 咖啡同朱古力味同樣濃郁而不澀。【單骨雞翼 配蜜糖芥末醬】HK$65
炸得金黃而不油, 炸皮香脆微辣, 肉嫩多汁, 沾蜜糖芥末醬食, 好味得忍唔住一口接一口。【鵝肝牛肉漢堡】HK$168
Burger size同質素對比大型連鎖快餐嘅真係冇得比!
首先食材配搭好豐富, 疊得高高的, 仲要用支竹簽固定, 食材有新鮮生菜、清甜多汁蕃茄片、千島醬、厚厚又多汁嘅牛肉同半溶芝士溶為一體, 再有熟度做得剛剛好兼入口即溶嘅鵝肝, 脂香味濃; 而漢堡包內側亦塗上了薄薄牛油再輕輕烘過, 外層微脆內軟熟, 整個包製作用心有誠意, 對得起個價錢! 伴碟有少少加咗黑醋嘅爽脆沙律菜, 用以平衡食完burger口中重口味。

出糧日同同事食餐好, 去咗公司附近呢間Eiffel Bistro食lunch。餐廳環境開揚, 天然光跟自然風透入, 令感覺更天然不焗促。餐廳全外國人主理, 感覺有如置身外國一樣, 更能吃到外國地道風味。我地各人order咗個set-lunch, 包括有前菜沙律/Soup, 自選main course, 包coffee/tea/柚子檸檬, 自選 +$20 追加法式焦糖燉蛋。Starter 我地分別叫咗沙律同埋湯。
香燈紅菜頭沙律:  紅菜頭爽而不硬, 香燈新鮮多汁, 整體好fresh。忌廉蘑菇湯: 口感同味道都比較稀, 食到淡淡忌廉香。美國頂級牛腹扒配薯條+沙律 HK$228
Order了 minimum rare牛腹扒, 果然肉質keep到粉嫩多肉汁, 食落幾有彈性, 沾上鹹甜燒汁, 味道更提升; 配有脆薯條同埋沙律菜, 飽肚又滿足。水煮海鱸魚配香蒜蛋黃醬+炒嫩菜 HK$188
海鱸魚有手掌般size, 幾厚肉, 肉質頗嫩有鮮味, 不過未知是否刻意還附有幾片魚鱗, 另配搭蔬菜幾新鮮。+HK$20 追加法式焦糖燉蛋
燉蛋好creamy, 有濃郁蛋香, 配上薄脆面層嘅焦糖, 唔會太甜又有焦糖香。最後送上餐茶, Honey Citron Lemon & coffee

應承丫爸得閒帶佢飲茶食一盅兩件, 趁今晚可以準時收工, 帶丫爸去咗尖沙咀漢口道呢間「樂意點心」, 各式點心全日供應, 而且全日不設加一, 感覺抵食! 店舖面積不大, 座位唔多, 所以門外經常要排長龍, 但當然係要好食先多人排, 仲吸引唔少遊客排就知幾有實力。 入座送上熱茶 (茶位: HK$8/位), 食物自行click order紙落單, 【絕配套餐】HK$68/位 +HK$55升級: 花鵰蛋白臘腸蒸紅花蟹(餐)
原隻紅花蟹放面, 清蒸更顯鮮味, 墊底蛋白滑得入口即化, 配上幾片唔硬又甜甜地嘅臘腸薄片, 送飯一流! 鮮無花果雪耳沙參玉燉排骨(餐)
熱辣辣燉湯, 冬天飲最岩, 足料無味精, 清甜味美又滋潤。 【咖哩魷魚】HK$26 魷魚份量足, 口感彈牙, 咖哩味濃, 仲有索滿汁嘅蘿蔔, 好惹味! 【芝麻蝦多士(3件) 】HK$30 沾滿芝麻的蝦多士大件又厚身, 面層d蝦又夠大隻, 食落每啖都香脆又鬆化, 香口超好食。 【碧綠叉燒腸粉】HK$26 腸粉滑, 叉燒唔硬, 配有少少翠玉瓜碎, 配搭新鮮又好食。
【杏汁燉蛋白(熱)】HK$26 杏汁味濃, 清香甜甜地, 蛋白滑得入口即化, 性價比極高, 推介!

厚福街係尖沙咀美食集中地之一, 今晚去咗一間食沾麵嘅小店---「元祖沾麵專門店」, 估唔到食咗一次就令我愛上!!
餐廳面積不大, 座位亦唔算闊落, 不過簡單食個沾麵需時唔太耐, 可接受。
沾麵款式多, 每款亦可額外加錢升級追加配料, 


每Order沾麵, 可以優惠價$16追加$29嘅飲品, 有數款口味嘅波子汽水選擇。
每款沾麵都以石鍋裝住熱辣辣沾汁送上, 熱得有如溫泉咁仲起緊水泡。

我地order嘅沾麵除咗沾汁外, 其他配料都係一樣,
麵底分開上, 常溫一大碗, 麵條粗, 煙韌彈牙,
每碗有三塊帶有焦燶香口嘅日式叉燒、軟滑流心嘅溏心蛋、竹筍同紫菜…

豚肉魚介沾麵:
豚肉魚介沾汁中有好幾粒豚肉角, 將麵條沾上沾汁, 鹹香惹味, 超正!
沾汁仲可以免費無限添加!



最後食完整個沾麵, 店員再加入木魚湯於餘下沾麵汁中, 比食客飲用, 味道有如淡味嘅味噌湯似的。
原隻極上芝士蟹皇豚肉沾麵:
呢款沾汁完全滿足芝士+海膽控嘅我!!
上檯時個沾汁已經散發陣陣芝士香。
沾汁容易掛汁, 芝士味濃郁又唔會過鹹, 將麵條沾上芝士沾汁食, 真係夠晒邪惡!! 而且沾汁中仲加咗海膽, 甘香美味。
另外仲跟咗個燒芝士蟹蓋, 蟹蓋中有日本松葉蟹膏同埋蟹肉碎, 金黃芝士佈面, 鹹香芝士配埋甘甜蟹膏, 味道甘香鮮甜, perfect match啊! 而且伴碟嘅沙律菜上, 仲加咗大量蟹籽, 再豐富咗口感層次。

放工自己一個人Dinner, 平平地唔想食快餐, 走到通菜街橫巷, 定會找到平野食。
果然搵到呢間平民燒肉店, 價錢由$48起, 就可以食到一人份燒肉、珍珠飯、沙律/泡菜、湯。餐廳環境光鮮整潔, 每張檯都有個小爐, 以發熱管式烤肉; 而檯上亦放了多款燒肉醬汁供自行調味。自行scan QR code落單, 首次食, 揀咗最平嘅套餐。
【牛五花套餐】HK$48湯入面有好林已盡索湯嘅白蘿蔔片同埋豬肉, 味道清甜。牛五花嘅牛脂較為集中, 但比例佔半, 燒後滲出了部份牛脂, 入口有少少爽口嘅筋, 頗有咀勁, 配上一大碗白飯, 夠哂飽肚。