出lift見到門口個燈牌好光猛，啱啱行出去就被門口個人介紹啲食物俾我聽。佢話有火鍋有埋燒烤，所以我就入咗去試吓 入到去地方都OK光猛，張枱都夠闊落，我兩個人食幾舒服！佢原來個火鍋係可以自己揀要同唔要，如果要嘅話就會上埋個爐俾你～我哋嗰次就冇食到火鍋，不過見到隔籬枱有一個爐自己淥幾得意^_^ 刺身，原來佢哋有吞拿魚同油甘魚，仲有原隻嘅赤蝦，呢樣真係幾驚喜！因為出親去食啲放題嘅赤蝦都唔連頭既，但係呢間放題嘅赤蝦挑埋蝦腸，都幾爽口！壽司都係基本款式啦，冇乜特別，細細粒，不過我哋唔係叫咗好多就唔評價喇。 去到燒烤嗰part，亦都係我最期待嗰part，佢哋嘅燒羊架真係好正呀！簡直比酒店嘅水準更加好，佢哋嘅夥計話係師傅自己醃嘅，唔怪之得啦！跟住翠玉瓜都好有驚喜，燒到啱啱好，唔會太生，仲有燒大蝦，燒雞翼（我覺得好似譚仔嘅土匪雞翼）全部都上枱熱辣辣好正！ 短短兩個鐘時間，佢哋嘅夥計一見到我哋隻碟有骨就會即刻換，好爽手，同埋會關心我哋有冇爭啲乜嘢嘢食未到，係好貼心嘅招呼已經同老婆約定左，過幾日會同埋屋企人一齊嚟！