京勝豚・牛二味御膳（$178）
貪心的我今次有少少奶嘢，呢款雙併老實講真係好普通。先講炸衣，偏硬唔鬆脆，口感死死實實；豚肉質感較實，唔夠軟嫩，丁丁嚡；牛肉（翼板牛）三至五成熟（可要求鐵板加熱，但我偏好生少少所以無要），肉質不錯，有少少牛味。豚及牛各五細件，份量比預期中少（亦比餐牌相片中細）。

熟成厚切豚・柚子胡椒御膳（$148）
呢款似番啲樣，炸衣終於鬆脆少少；豚肉厚切有口感，肉質尚算軟腍，邊位肥膏爽口唔油膩，份量合理。

御膳包椰菜絲、麵豉湯、白飯，而且可以續加。
真心講，試過一次就可以了。

PS：另收加一服務費。

隔離ET執咗，咁就改試吓呢間「手作功夫茶」。

凍38奶霸（$29）少蜜（70%）少冰（70%）
招牌厚奶茶，除咗珍珠，仲有蒟蒟同仙草。珍珠Q彈、蒟蒟爽口、仙草滑溜，三樣嘢佔咗整杯四成。奶茶茶味合格，有茶香，亦都滑。

凍3Q奶茶（$29）少蜜（70%）少冰（70%）
同樣係招牌厚奶茶，除咗珍珠，仲有紅豆同仙草。紅豆是正常size，少少起沙。

去到門口已經4點有多，但午餐竟然係去到4點半，Good。

午餐 307 鵝片拼鵝腸飯（$65）
有六大片鵝片，鵝肉唔算太嫩（但唔嚡），有啲𡁻頭，鹵水味唔太咸；鵝腸約有十數小段，有啲仍帶有肥膏（正），爽口彈牙一啲都唔韌，不錯；另外仲有三片鹵水豆腐。

午餐 J1 招牌肉碎粥（$55）
除咗肉碎，仲有瑤柱、蠔仔、地魚、紫菜、香菇，配料十分足，味道淡得嚟係夠味道的。

C4 煎蠔餅（$95）
呢間啲蠔餅偏煙韌（蕃薯粉比例應該較多），邊位香脆，中間Q彈。

午餐有餐湯有餐包有主菜有餐飲，全部一舊水有找。

餐湯：龍蝦湯，有驚喜，味道幾濃厚，不錯。
餐包：小法包，無牛油，室溫，好在仍脆，但味道一般。

午餐C：蜜糖芥末原燒檸檬海鹽煙鴨胸配黑松露牛肝菌汁意粉（$62）凍檸茶（+$4）
煙鴨胸煮得唔錯，而且賣相都吸引，雖然食唔到檸檬同海鹽味，但味道還算不錯，而且肉質煮得幾嫩；意粉口感正常，有適當嘅咬口感；醬汁無咩黑松露味道，但牛肝菌味都可以，夠撈哂成碟意粉。

午餐F：芝士南瓜雞肉猫耳朵（$68）凍奶茶（+$4）
朋友叫的，試了一口猫耳朵，好有咬口，但芝士醬汁唔算太香濃。而且跟據朋友所講，啲南瓜有啲酸，最後佢食淨哂啲南瓜同雞肉。

午餐G：溫泉蛋風乾火腿卡邦尼長通粉（$68）熱即磨咖啡（$0）
朋友叫的，試了一口長通粉，口感正常，但同樣醬汁唔夠濃厚。溫泉蛋及風乾火腿正常。

本來仲有加多一份小食，但等到食哂都未有，原來無落單，慳返。
整體嚟講，普普通通，合格之作。店內空間感十足，唔會太侷促，坐得幾舒服。

PS：另收加一服務費

飲品：Spanish Dessert Tea（$68）
見到寫明沒有咖啡因，所以晚上都可以飲茶了（笑）。聞落有淡淡的香甜味，但飲落只有淡淡的茶味。

飲品：Tokhm-e Sharbati（$58）
味道十分特別，唔係太識得點形容，大概就係香草檸檬汁（味道應該再複雜啲）。估唔到是旦亂點，但味道又幾好飲。

小食：墨西哥三重芝士雞肉餡餅配自家制四川麻辣醬（$88）
餡餅餅皮軟熟，芝士味唔算太濃，但麻辣醬好惹味，又麻又少辣，估唔到又好夾芝士餡餅，好味道。

主菜：伊朗香草燉羊（$178）
大大隻羊膝，啖啖肉，燉得頗腍，肉質軟嫩，帶有少少羊騷味；香草茄醬清新，中和羊肉味道；配菜有蕃茄同薯仔。

主菜：印度Masala慢煮牛肋條燴飯（$148）
醬汁少辣，十分惹味，燴飯飯粒係我鍾意嘅外軟內微硬；牛肋條肉質超腍，味道不錯。失策，唔記得影相（哭）。

店內裝修充滿異國風情，近門口位有三張特色餐枱。其他餐桌空間比較近（所以隔離枱交談會有啲嘈），而且桌面唔係好大，放兩碟食物已經無咩位。

PS：加一服務收費。用餐時間120分鐘。

J12 麻油薑母鴨 併 白飯（$62）
大約有六件鴨，薑味微辣，麻油味唔出，醬汁咸咸甜甜，味道是可以的。鴨件入味，但肉質好嚡，完全唔嫩滑。白飯可以免費加大。

tm12 燒仙草奶茶鐵觀音（+$18）
半糖微冰，鐵觀音味幾濃，但整體味道普通。仙草份量適中。

J5 養生花雕醉雞濃湯麵（$62）
好濃嘅花雕味，而且味道不錯，但可惜雞肉同樣都唔嫩滑，連雞翼、雞槌啲肉都係嚡的。半隻糖心蛋算係最好味。湯麵湯底好清，只有咸味。麵條普通，似759貨色。

tm3 黑芝麻泡沫奶茶（+$14）
微糖微冰，黑芝麻好似好多，但味道唔出，整體味道又係普通。

如果一定要搵亮點，唯有揀醬汁，其他都無咩特別。唔試唔可惜。

PS：自己 scan QR code 落單。沒有加一服務費。

一人前定食（$110）
前菜：溫泉蛋、溫野菜
炸物：薯寶配芝士醬、炸忌廉蟹肉薯餅、唐揚雞肉
燒肉丼：牛角燒牛肉丼（草飼牛腹腩）、雞爽肉丼、鹽燒牛舌丼、牛角次男坊丼（+$10）
其他：味噌湯、飲品

叫咗兩個「一人前定食」
溫泉蛋（正常合格，蛋黃流心） + 唐揚雞肉（三件，脆口） + 牛角燒牛肉丼（草飼牛腹腩約六/七片，有牛味，不算太軟嫩但唔嚡唔韌，醬汁咸咸甜甜，味道不錯） + 可樂
溫野菜（白烚加醬汁） + 薯寶配芝士醬（好耐無食，食回憶，芝士醬香，但太少了） + 鹽燒牛舌丼（約七/八片，爽口唔韌，加蔥絲食好夾） + 可樂

招牌限量羊雜粉（$55）
雖然叫羊雜，但得兩款料。一款似牛柏葉，另一款似牛肚，兩款都好爽口彈牙，勁有咬口。羊雜完全無羊騷味，但有羊（黑草羊）獨特的香味。粉係粗身嘅米線，口感較軟身，份量都多。湯底清，極少油，味道不錯，不知不覺成碗飲哂（其實都驚有落師傅，但好在之後沒有勁口渴）。

招牌清湯羊肉粉（$45）
羊肉切絲，有肉有膏有皮，同樣無羊騷味，而羊肉嘅香味比羊雜濃。

洋芋粑粑（$18）
外層薄薄的炸到好脆，裡面軟糯，好似麻薯（但口感更稀），幾有趣。

吉列厚切豬扒定食（$98）
真係好厚切，足足有平時坊間嗰啲嘅一倍厚。吉列炸衣薄薄一層，脆口，無油膩口感；豬扒肉質未算軟嫩，但唔會好嚡，邊位有少少肥膏，爽口彈牙唔油膩；吉列醬汁酸酸甜甜，可作中和作用。要咗加飯及加菜，所以白飯及椰菜各多一碗。前菜牛蒡絲味道幾濃。白飯好有誠意，有紫菜同芝麻。麵豉湯味道正常，但頗多昆布片。茶碗蒸夠滑有蛋味。

南蠻炸雞定食（$76）
並不是炸雞件，係雞扒，又係勁厚勁大塊。雞扒肉質軟嫩，而且仲有少少肉汁。南蠻醬酸味偏少。呢個定食CP值高。

吉列竹筴魚（+$18）
加多咗一份小食，竹筴魚比預期中厚，但有少少魚腥味，要加啲檸檬汁癖一癖，試過就算了。

總括嚟講，呢間餐廳會再次幫襯，食物質素可以，收費合理，服務員有禮態度好（依家好多餐廳都無），環境尚算寬敞（坐位唔會太逼）。

PS：自己 scan QR code 落單。午市無加一服務費。

前排行完荃灣 Donki，發現 food court 開咗我鍾意食嘅炸雞店，咁之後唔使專登出荔枝角 AEON 食了。

2人套餐（$139）
可以選8件炸雞，或者8隻雞翼，但我揀咗各樣4件。
醬汁可以六選四，最後要咗明太子強黃醬、甘辛醬汁、極醬汁、鹽醬汁。
仲有白飯兩碗、麵豉湯兩碗、汽水兩罐、小食一客（炸薯角）。

炸雞保持水準，外皮香脆，肉質嫩滑仍有肉汁。
雞翼第一次食，雖然都炸得好靚，但下次都係食炸雞開心啲，因為啖啖肉。
四款醬汁各有不同，清爽的、帶辣的、咸甜的、酸甜的，各有各味道。