Lv3 美國封門柳+日本九州豚肉（$298）

湯底揀咗鴛鴦鍋，要咗鰹魚昆布湯及豚骨濃湯。

主打食呢幾款
・美國PRIME牛肩脊，肉質一般，肉味都一般，脂肪稍多。
・殼飼牛封門柳，肉質軟腍，少少肉味，脂肪比較少。
・牛舌，唔韌，爽口。
・日本九州產白豚肉，肉嫩爽口彈牙，無豬臭味，幾好食。

軟雪糕有 3.5牛乳雪糕 + 比利時朱古力雪糕，牛乳香滑，朱古力濃厚。

自助 scan QR code 落單，食物出得快，又出得足，抵讚。

兩餸飯（$40）凍檸茶（+$6）
揀咗黑醋骨同豉椒鵝腸。黑醋骨有五舊，舊舊都有番咁上下size，味道酸酸甜甜，而且仲食到微脆嘅炸粉，排骨多肉唔會淨係得骨。豉椒鵝腸惹味，彈牙唔韌，有啲仲冇些少膏痴住（正），份量足。白飯底軟熟乾身唔會濕淋淋。

一餸糯米飯（$58）
揀咗臘味炒菜芯，有臘肉、臘腸、潤腸，份量可以。菜芯夠嫩唔老無渣。糯米飯有臘肉、臘腸、花生，炒得幾乾身但丁丁油（可接受）。

椒鹽魷魚鬚（$68）
之前經過幾次門口玻璃窗望到都好吸引，今次必定要食。雖然唔係即炸，但都微溫，最緊要仍然係脆口，無回油。調味剛剛好，些少咸。魷魚鬚炸得唔過火所以唔韌。份量足塞滿一整盒。

終於試到呢間餐廳嘅厚切牛舌了，一個字，掂。

午餐#9：厚切牛舌（$108）
午餐包沙律、麵豉湯，前菜（凍豆腐）、炒飯、汽水。厚切牛舌即叫即製，應該係用鐵板燒煮。有六舊，厚度比坊間好多餐廳都要厚，牛舌外層微微焦香，裡面軟腍，仍然呈現粉紅色，煮得啱啱好，舊舊爽口彈牙，完全無筋又唔韌，調味有鹽同黑椒，味道恰到好處。炒飯應該都係鐵板燒即炒，夠乾身，唔油膩，飯係用珍珠米。

真心講，比起好多標榜食牛舌嘅專門店好味，暫時係我心目中香港No.1食牛舌（厚切）嘅餐廳。

PS：另收加一服務費。

之前試過旺角店的午市，今次轉戰尖沙咀嘅晚市。
#2 SRF美國極黑和牛片（$298）

湯底揀咗龍蝦頭鍋，大大個龍蝦頭（當然無龍蝦肉啦），湯底頗濃而且鮮味足。

牛肉都狂吃

・美國極黑和牛SRF
・美國安格斯牛板腱
・封門柳
小食當然係

・燒乳鴿，必食，食咗幾次都熱辣辣
・糯米飯
・蛇羹
・麻辣龍蝦仔
飲品今次有珍珠奶茶。


17:30入座，120分鐘，19:30前離座，$258另收一服務費。
自助 scan QR code 落單，食物出得快，又出得足，抵讚。

川味麻辣芫茜意大利粉（$88）
麻辣味啱啱好，唔會over冚咗其他味。芫茜香、粟米芯甜、蟲草花爽、豆乾入味。意粉夠哂𡁻口，煮得恰到好處。整體有驚喜，好味道。

日式咖哩八式野菜拌飯（$78）
五週年菜式，見到即刻諗起之前去倉敷食嗰個野菜咖哩。咖哩係正常日式嘅少甜微辣；飯底珍珠米撈咗啲藜麥；野菜有蓮藕、茄子、青翠玉瓜、黃翠玉瓜、西蘭花、四季豆、車厘茄、粟米芯，蓮藕片即炸脆卜卜，茄子、翠玉瓜微烤過。整體味道不錯。

跟餐有斯里蘭卡伯爵茶（凍）及京都宇治玄米茶（熱），兩杯都好濃茶味唔會淡茂茂。

PS：另收加一服務費。

葵涌廣場人氣食店之一，經過仲有下午茶餐（下午2:30至6:00），有啲肚餓入去幫襯支持一吓。

下午茶：孖寶車仔麵（$44）三餸配熱飲
豬大腸、牛腩、魚旦、油麵，豬大腸有咬口入味，牛腩一般般有幾舊比較嚡，魚旦好味有彈性，油麵合格。
牛柏葉、牛肚、豬紅、米粉，牛柏葉雖然爽口但無咩味，牛肚煙韌唔太痴牙，豬紅普通又係伙無咩味，米粉正常。

爽滑腸粉（$10），有三條，尚算滑，撈埋甜醬、麻醬、芝麻，合格之作。

整體合格以上，味道OK，價錢合理。

京勝豚・牛二味御膳（$178）
貪心的我今次有少少奶嘢，呢款雙併老實講真係好普通。先講炸衣，偏硬唔鬆脆，口感死死實實；豚肉質感較實，唔夠軟嫩，丁丁嚡；牛肉（翼板牛）三至五成熟（可要求鐵板加熱，但我偏好生少少所以無要），肉質不錯，有少少牛味。豚及牛各五細件，份量比預期中少（亦比餐牌相片中細）。

熟成厚切豚・柚子胡椒御膳（$148）
呢款似番啲樣，炸衣終於鬆脆少少；豚肉厚切有口感，肉質尚算軟腍，邊位肥膏爽口唔油膩，份量合理。

御膳包椰菜絲、麵豉湯、白飯，而且可以續加。
真心講，試過一次就可以了。

PS：另收加一服務費。

隔離ET執咗，咁就改試吓呢間「手作功夫茶」。

凍38奶霸（$29）少蜜（70%）少冰（70%）
招牌厚奶茶，除咗珍珠，仲有蒟蒟同仙草。珍珠Q彈、蒟蒟爽口、仙草滑溜，三樣嘢佔咗整杯四成。奶茶茶味合格，有茶香，亦都滑。

凍3Q奶茶（$29）少蜜（70%）少冰（70%）
同樣係招牌厚奶茶，除咗珍珠，仲有紅豆同仙草。紅豆是正常size，少少起沙。

去到門口已經4點有多，但午餐竟然係去到4點半，Good。

午餐 307 鵝片拼鵝腸飯（$65）
有六大片鵝片，鵝肉唔算太嫩（但唔嚡），有啲𡁻頭，鹵水味唔太咸；鵝腸約有十數小段，有啲仍帶有肥膏（正），爽口彈牙一啲都唔韌，不錯；另外仲有三片鹵水豆腐。

午餐 J1 招牌肉碎粥（$55）
除咗肉碎，仲有瑤柱、蠔仔、地魚、紫菜、香菇，配料十分足，味道淡得嚟係夠味道的。

C4 煎蠔餅（$95）
呢間啲蠔餅偏煙韌（蕃薯粉比例應該較多），邊位香脆，中間Q彈。

午餐有餐湯有餐包有主菜有餐飲，全部一舊水有找。

餐湯：龍蝦湯，有驚喜，味道幾濃厚，不錯。
餐包：小法包，無牛油，室溫，好在仍脆，但味道一般。

午餐C：蜜糖芥末原燒檸檬海鹽煙鴨胸配黑松露牛肝菌汁意粉（$62）凍檸茶（+$4）
煙鴨胸煮得唔錯，而且賣相都吸引，雖然食唔到檸檬同海鹽味，但味道還算不錯，而且肉質煮得幾嫩；意粉口感正常，有適當嘅咬口感；醬汁無咩黑松露味道，但牛肝菌味都可以，夠撈哂成碟意粉。

午餐F：芝士南瓜雞肉猫耳朵（$68）凍奶茶（+$4）
朋友叫的，試了一口猫耳朵，好有咬口，但芝士醬汁唔算太香濃。而且跟據朋友所講，啲南瓜有啲酸，最後佢食淨哂啲南瓜同雞肉。

午餐G：溫泉蛋風乾火腿卡邦尼長通粉（$68）熱即磨咖啡（$0）
朋友叫的，試了一口長通粉，口感正常，但同樣醬汁唔夠濃厚。溫泉蛋及風乾火腿正常。

本來仲有加多一份小食，但等到食哂都未有，原來無落單，慳返。
整體嚟講，普普通通，合格之作。店內空間感十足，唔會太侷促，坐得幾舒服。

PS：另收加一服務費