譚仔間唔時都會推出一款特別既推廣米線，今次新出品係滷汁牛肚蜂巢豆腐香辣蕃茄湯米線，咁啱2款配料我都鐘意，梗係要試下啦。 🍴滷汁牛肚蜂巢豆腐香辣蕃茄湯米線$43 首先講湯底，食辣BB班既我揀左十小辣，湯底幾正，辣味同蕃茄味融合得好好，又唔會搶到對方既味道，仲會有蕃茄粒係入面👍滷汁牛肚同蜂巢豆腐都係好索汁既食材，一咬落去就會有湯噴出黎🤣牛肚仲會有滷水既味道添，但係蜂巢豆腐既口感就麻麻地，好似霉霉地咁，唔知係咪因為浸湯浸得太耐。

三哥米線真係可以話係平民飯堂，只要諗唔到食乜就會去三哥度食碗米線，價錢唔貴之餘，大大碗又食得飽飽。我最鐘意呢度既普通酸辣湯底，三哥酸辣同普通酸辣係有分別，三哥酸辣有得揀辣度，會帶有少少麻，而普通酸辣就會酸d，冇得揀辣度。 🍴豬潤墨丸酸辣米線 酸辣湯底好夠酸，佢唔係醋酸味，係酸菜既酸，味道比較自然。雖然冇得揀辣度，但個辣味對於我黎講係完全可以接受到，係酸＞＞辣。豬潤同墨丸正正常常，份量都可以接受啦。4粒星係俾湯底既🤣

無論壽司郎開左幾多間分店，都仲係咁多人去食，就知道d壽司質素幾咁高🤣11月主題係【大大大祭】，好多款食品都加量不加價，抵！ 特別推介 🍴大切特選大吞拿魚腩 🍴厚切中吞拿魚腩 睇相都睇到有幾厚阿🤤完全遮住左下面舊飯，油脂分布係大拖羅靚d既，但其實2款都好肥美，新鮮。 🍴蟹膏軍艦 蟹膏帶有鮮味同少少鹹香，最重要係唔會腥。 🍴厚切燒鯖魚壽司 呢款魚又係好厚😆，醬汁既味道入晒鯖魚入面，仲有少少燒烤既香味添👍 🍴茶碗蒸 蛋蒸得好滑溜，湯汁都非常鮮味，入面仲有一粒帶子。 🍴1.5倍份量卡達拉娜 類似焦糖燉蛋+芝士蛋糕既質感，好creamy，好味。 仲有熱食都唔錯架，薯條係新鮮即炸，熱到辣口，香脆夠味😋 壽司郎真係性價比好高既一間壽司店，每人百幾蚊一定食得飽，仲要壽司質素高，只要預啱時間拎飛，真係冇咩野好挑剔。

呢排天氣涼左，又有藉口打邊爐喇！(其實夏天咪又係成日打🙊) 🍴豐鍋招牌麻辣雞煲$288(全隻) 好惹味既雞煲，入面落左好多香料，乾辣椒乾葱頭洋蔥芫荽芹菜等，但食落一d都唔麻，唔知係咪我地嗌左BB辣既關係。雞肉係ok既，真係會有雞既唔同部位。煮得耐會越黎越鹹，建議要食快d轉個火鍋湯底打邊爐🤣 🍴台式養生鍋$49(半價後) 有食雞煲既話火鍋湯底會有半價優惠。呢個養生鍋湯底會有輕微既藥材味，但更多既係豬骨味，普普通通。 🍴頂級安格斯牛(大)$268 牛肉淥到啱啱變色就可以食，好軟熟唔會韌，亦食得到牛味。👍 🍴手工即炸魚皮$52 超大片原片魚皮，即叫即炸，比起正常魚皮厚好多，係食餅乾既感覺。🤣 🍴即炸爆芝響鈴$42(3件） 炸到脆卜卜，一咬落去就脆到d碎碎周圍跌😆，都係鐘意浸湯食多d。芝士要咬到中間先有，個人覺得麻麻地，芝士同響鈴唔係好夾，食完一舊就滯左，飽肚之選。 🍴脆鯇魚腩$95 魚腩好靚阿，件件都大大舊，肉質好實淨唔會鬆散 ，冇腥味好新鮮。 🍴餃餃陣$88 鮮蝦雲吞、魚皮餃、韮菜餃、麻辣雲吞各2粒，比較特別既係麻辣雲吞，其他餃就正正常常。 🍴十優狀丸$102 黑松露墨魚丸、蝦丸、墨魚丸、黑墨丸、鯪魚丸各2粒，粒粒丸都好爽口，黑松露墨魚丸，好重黑松露味架。 🍴嫩鴨血$58 鴨血好嫩滑，每件都係厚切，索湯一流。 🍴皇帝菜$39 蔬菜好新鮮好嫩，唔錯。 總括黎講，麻辣雞煲正正常常，火鍋料係靚既，碟碟都大大碟，今餐食到好飽，但價錢偏貴呢。

小西灣開左間好搶眼既舖頭，係ig見到都幾多人讚，一直都想試下，今晚晚餐買左佢既外賣。 🍴無骨海南雞飯 打開飯盒就有d失望，入面有青瓜、雞翼、雞翼尖同無骨雞胸，可能係因為menu轉左，我見其他人po既相會有大量醃紅蘿蔔絲同菜。雞肉質唔算鞋，但都唔係嫩滑，雞肉本身冇咩味，要靠點醬汁，兩款醬汁都ok，係泰式酸辣汁同甜醬油，飯係油飯，食到有香味既。配菜青瓜係肉眼就見到好乾收晒水，好似係切好擺左係度風乾左好耐咁。😣最差既係送既雞湯，飲到有雞味，但真係鹹到一個點😣飲左一啖就放棄左。 🍴黃咖哩牛腩飯 呢個咖喱飯相對比較好食，雖然咖哩有d鹹，但都可以接受，牛腩份量多，亦煮得軟腍有牛味，用料唔錯，仲有炸薯仔粒配埋一齊食，略嫌咖哩汁唔夠，唔會撈到白飯食。 可能係期望越大失望越大，係廚房失手落多左鹽，定係我口味同其他人唔同🙈覺得仲有好大進步空間，認真希望呢間小店可以做得好。

慶祝朋友生日，特登黎試下呢度既酸菜魚，入到去地方好大，裝潢環境同擺設有中國風，一行4人嗌左個4人餐，食物款式都幾多，即場做會員仲有個優惠價。 前菜 🍴貢菜拌紅海蜇花、招牌口水雞、青瓜麻辣粉皮 平時好少食到貢菜，咬落去好脆口，同爽口既海蜇花好夾。口水雞都好味，但麻辣粉皮就好似白烚粉皮加辣油咁，咸味都冇，得少少辣味，要改進下。 主菜 🍴宮保蝦仁 蝦仁份量唔少，係酸甜口味既醬汁，粒粒蝦仁爽口既，一匙羹咁食都幾爽。 🍴招牌祥仔酸菜魚 辣度我地揀左微辣，賣相都幾靚，d魚好嫩滑，個底有大豆芽，本身鐘意食酸，覺得酸味唔係好夠，如果酸味都有得揀唔同程度就好喇。 🍴香辣孜然一字骨、干鍋福建椰菜花 排骨炸得好香口，非常惹味，啖啖肉，正。 椰菜花普普通通，味道正常。 🍴招牌櫻花蝦炒飯 炒飯炒得乾身，櫻花蝦都算香，但調味有d咸。 🍴酒釀桂花湯圓 桂花酒釀酒味唔重，帶有適中既甜味同淡淡既酸味，配埋軟糯香甜既芝麻湯圓，食完辣野有呢個甜品，有一種療癒既感覺。 環境好靚，每枱都有私人空間，食完仲可以慢慢坐傾下偈。食物味道不過不失，份量多，對食物要求唔高既我地覺得係滿足既一餐黎既。呢款套餐唔知做到幾時，而家好似有另一款4人餐，有興趣既要book位嗰陣問下喇。

近排麥當勞出左新口味既炸雞阿，鐘意試新野既我當然要拉埋朋友去試一試啦。 🍴麥炸雞二人派對超值套餐$85 套餐包含4件炸雞，2份中薯條，2杯汽水。炸雞我地就揀左新既爆蒜麥炸雞，雖然佢既外表同原味望落差唔多，但一咬落去就會食到蒜既味道，應該係表面有灑左蒜粉。表皮炸得算脆既，入面既肉唔會好乾，熱辣辣食都幾正，果然食炸野配埋冰凍既汽水就爽🤣整體黎講，味道不過不失啦，蒜味同炸雞唔係好夾，原味會好食d。 同場加映， 🤣🤣呢個先係重點

而家越黎越多人都開始食素，其實食素除左對身體好，對環境都有大好處，所以平時食飯都盡量多菜少肉，呢間素食私房菜，地方好闊落，每枱都有自己空間，食物好食加有新意，唔係出面食到既菜式。 🍴椒鹽炸雞脾$38 個賣相真係超似雞脾🍗！其實佢係好多層腐皮繞住雪條棍扮既，椒鹽好惹味，但又唔會過咸，因為包係入面既腐皮可以中和返味道。超正！ 🍴台灣炒米$78 俾佢menu既介紹吸引而叫既，寫住有好多配料，有素叉燒、素餐肉、銀芽、冬菇、椰菜、蛋，真係好豐富。米粉炒得好乾身👍亦都唔會太油，素叉燒同素餐肉好似真既一樣，好神奇😆 🍴斑蘭包$68 雖然蒸包會有d飽肚，但其實佢size唔係好大，都可以當佢甜品咁食。出面未見過用斑蘭汁整既包，賣相好吸引好靚，味道都好好阿🤤好軟熟，斑蘭味好香，甜度適中，食晒都想繼續食阿。 呢間素食餐廳真係好好食，素食唔再係好寡好悶既代名詞喇，對未食過素既人黎講，真係可以踏出第一步黎試下。✧٩(ˊωˋ*)و✧

疫情到而家咁耐都冇去過旅行，實在太掛住日本喇😭決定去食日本拉麵安慰下自己。 🍴招牌蝦湯拉麵 (鹽味)$88 第一次食蝦湯拉麵，係香港都唔算常見，真係超超超重蝦味😍😍一啖麵一啖湯真係停唔到口，麵上面既紅色粒粒係紅薑天婦羅麵酥，可以增加脆脆既口感好得意，溏心蛋都整得啱啱好，而叉燒就有2片，普普通通。 🍴餃子$35 相比之下，餃子就顯得好普通喇，唔太推介。 蝦湯拉麵係特別既，未食過既話可以去嘗鮮，但食到最尾有d咸，返到屋企都要飲多d水😆

呢間係尖沙咀好出名既台式餐廳，而家係觀塘都開左分店，今日返工冇帶飯就買個lunch試下。 🍴排骨便當 拎返公司嗰陣已經一路都聞住好香既味道🤤打開便當就知道原來係排骨濃濃既五香粉香味，咬落去好香口，肉質唔會過硬，但味道偏重口味同單一五香粉味。 令我驚喜既係配菜方面非常豐富，有芽菜椰菜酸菜冬瓜甜不辣酸蘿蔔同半隻鹵蛋，係整得有心機既，因為食到每樣配菜唔同煮法唔同味道，例如椰菜用左蝦米一齊煮，冬瓜係落左薑絲，鹵蛋亦都好入味。👍 總括而言，味道中規中矩既便當，價錢有少少偏貴，性價比唔高，可能牛肉麵先係佢既招牌菜，下次有機會再試啦(´⊙ω⊙`)